tlhIngan-Hol Archive: Mon May 02 01:29:21 1994
[Date Prev][Date Next][Thread Prev][Thread Next]
KSRP: Play within play, Hamlet
- From: [email protected] (Nick NICHOLAS)
- Subject: KSRP: Play within play, Hamlet
- Date: Mon, 2 May 94 14:26:41 EST
'el DawI' loS, lIHwI' DataHvIS.
D4: DaH lutmaj 'It wIjeSchoHnIS.
checherghchoHmeH matortaHvIS,
gho'Ij. petuv. 'ej wej ghonIS.
mej.
H: lIHbogh SoQ 'oH'a' QIchvam'e'?
Degh mu'tlheghHom 'oH'a' neH?
'o: nI'be', joH.
H: vaj be' muSHa'ghach rur.
'el cha' DawI'. ta' ta'be' je Da.
D1: wejmaHlogh bIQ'a' wIb, yuQ moQ je bavpu'
pemHov Duj. wejvatlhjavmaHlogh DIS wavpu'
Dotlh wov ngIpbogh maS'e', rInDI' ghu':
muv tIqmaj, bang DIDamo'. Qap je Qu':
matay'taH, tlhoghvaD muvmo' ghopDu'maj.
D2: pIj maS pemHov je leng DItoghtaHjaj,
rInpa' muSHa'ghachmaj! 'ach DaH bIropmo'
qaStaHvIS poH chu', 'ej Dotlh ngo' DaHopmo'
pay' bI'IQtaHvIS, QI'yaH! Qugh vIpIH.
toH, joH, jIpIHchugh jIH, vaj not DuQIH;
SaHqu'mo' be', loDDaj muSHa'ghach ghaH.
be' muSHa'ghach rap SaHtaHghach. rep Dach cha',
pagh (chay' qamuSHa' 'e' Datu') reH lach cha'.
ngojDI' muSHa'wI', ngojnIS je SaHwI'.
muSHa'chugh nuv, vaj HajnIS HonchoHDI'.
'ach Hajbejchugh ghaH, vaj muSHa'rupchu'.
D1: va, bangwI', tugh qatlheDnIS. puj 'ej ru'
porghlaHmeywIj. qo' 'IHDaq leS bImob.
bIquv. 'ej Do' DuSaw ---
D2: not latlh vIlob!
va, tIqwIjDaq 'urmang'e' not vIlaj.
loDnalqoq cha'mo' jIquvHa'nIS. vaj,
loD cha'DIch nawjaj be' --- loD wa'DIch HoHDI'!
H: wIbqu'.
D2: muSHa'be' be', tlhogh cha'DIch ruchmeH boHDI'.
'ach chepmeH neH quvHa''eghmoH. jImatlh!
loDnal vIHoHqa', wuSwIj chopDI' latlh.
D1: DaH vuD Daja' DaQubmo'. 'e' vIHar.
'ach nuQbogh nab DIqIlmeH pIj maghar.
leSqawtaHghach luwuvnIS nabbogh Duj.
vIDqang bIH boghDI', 'a DIDajDI' luj.
DaH naH Qup rur bIH. SorDaq HuStaHba',
'ach qanDI' pum bIH, Sorchaj puvlu'pa'.
Qu'maj DIlay'pu'bogh DIlIjnISlaw'.
chavvetlh wIchuppu'bogh manongDI' Qaw'
SaHQo'ghachmaj, manongpu' 'e' wImevmo'.
Sorgh'egh Dotlh Quch, Dotlh 'IQ joq ral, QIt jevmo'.
lopchugh QuchwI', vaj SaQnIS je 'IQwI';
meq rammo' 'IQ yonwI' 'ej Quch 'ItwI'.
ru'nIS ngeHbejmaj. vaj Hujbe' wanI':
choH mamuSHa'ghach, choHDI' je San nI'.
wej ngoD wIwuq: muSHa'ghach wuv'a' San?
pagh, San wuv'a' muSHa'ghachvetlh? ghaytan
quvHa'DI' potlh, Haw' bangDaj. jup moj ghol
'e' SIgh mIpbe'pu'wI', ghaH DuvDI' yol.
San toy' muSHa'ghach. vay'vaD chaq 'utbe'chugh,
vaj ghaHvaD reH SaH jup. jup Dotlh buD nge'chugh
ghaH tlhobmo' vay', SIbI' vaj jagh chu' leH.
'ach taghbogh DaqDaq SoQ vIrInmoHmeH:
Sanmaj DonHa'moH' neHtaHghachmeymaj,
reH nabmeymaj Hoch ngeplu'. qech DIghaj
'ach qechvam ghochmey DIghajbe'. toH mub:
loD cha'DIch DanawQo' DaH 'e' yIQub.
'ach Heghjaj vuDvam HeghDI' joHlI' wa'.
D2: not yavvo' Soj vISuqjaj; Hurghjaj qa';
reH jIHvo' Quj leSpoH je nge'jaj moch;
jIvoqtaH 'ej jItul 'e' mevjaj ngoch;
bIghHa' Saj'uQ vIpIHjaj; qaqbogh ghu'
ghomjaj 'ej Qaw'jaj qab Quch ghol Hoch qu';
naDev Dat je multHa'jaj nI'bogh Seng ---
be'nal vImojqa'chugh jIH. 'Ip vIqeng!
H: DaH 'Ip pabHa'jaj!
D1: bI'Ipchu'ta'. 'ach bang, DaH loQ HImej.
Doy'choHlaw' qa'wI'. Qatlhmo' pem, jIDej.
vaj DaH jIQong.
D2 bIQongmo', jotjaj yablIj.
'ej not Qagh Qavmo' qabwIj Hopjaj qablIj.
Qong Dabogh ta'. mej Dabogh ta'be'.
[...]
D3: qech qIj, ghop po', tar 'um, poH lugh je vImuv.
boq jeS 'eb poH. ;ej DaH mulegh pagh nuv.
ramjep tI boSlu'mo' bIchen, molDargh.
wejlogh Dungej 'ej DunaDHa' veqlargh.
pay' pIvbogh yInDaj lurIHHa'meH jIj je
wIchlaHlIj motlh, ghIjchu'bogh Dotlhna'lIj je.
ta' qoghDu'Daq tar chagh.
--
Nick.