tlhIngan-Hol Archive: Mon Dec 20 21:23:25 1993
[Date Prev][Date Next][Thread Prev][Thread Next]
KSRP: _paghmo' tIn mIS_, 'ay' cha' DoD wej
- From: [email protected] (Nick NICHOLAS)
- Subject: KSRP: _paghmo' tIn mIS_, 'ay' cha' DoD wej
- Date: Tue, 21 Dec 93 16:23:06 EDT
2.3.
'el *be'neDIq* mob
ben: loDHom!
'el loDHom
loD: chay'!
ben: QongDaqpa'wIj lojmItHomDaq paq tu'lu'
naDev naHSorghomDaq jIHvaD yIqem
loD: naDev jIpaw'ta', jaw
ben: 'e' vISovba'
naDevvo' bIjaH 'ej naDev bIpaw'qa' vIneH
('el loDHom)
ben: mumerqu'
muSHa'ghachvaD DaghachDaj buSmoHtaHvIS, vaj, Dogh ghot;
'e' leghpu'DI' ghot latlh,
'ej ghotmeyDaq rambogh SaghHa'ghachvammo' Haghpu'DI',
vaqghachDaj DoS mejlaw' ghaH, muSHa'choHmo'
ghotvam rap *tlhaw'DIyo*
Hu', ghaHvaD chuSHu' qIpghachDIr jachghachnaQ pagh latlh je;
Hu'vam vISovpu'
DaH beltlheghghom chuStIS je maS
Hu', nI'taHvIS, yoDSut QaQ leghmeH, wa'maH chuqjIvghach chuq vItrup
Hu'vam vISovpu'
DaH, qaStaHvIS, yIvbeH chu' Sar chenmoHmeH, wa'maH jaj, QongHa'rup
nappu' 'ej Qu' buSpu' QIchDaj
DaH Human Suy mojpu'law'
'uQ'a' Huj bIH mu'meyDaj'e'
motlhbe'bogh may'mey rur
nem jIchoH'a' 'ej mInDu'vam vIlo'taHvIS jIlegh'a'?
vISovbe'
jIchoH 'e' vIHarbe'
'er tam vImoj 'e' qaSmoHbe' muSHa'ghach 'e' vI'IplaHbe'
'ach Dochvam'e' vI'Ipbej:
'er jIH, wej 'e' qaSmoHtaHvIS,
qoHvam jIH, not 'e' qaSmoH
'IH wa' be', 'a vISujlu'be'
val latlh, 'a vISujlu'be'
quv latlh, 'a vISujlu'be'
wej wa' be'Daq bIHtaHvIS 'umghach Hoch QaQ'e'
wa' be'mo' jIQaghQo'
mIp ghaH 'e' vIvoqbej
valbe'chugh, pagh vItlhapqang
quvbe'chugh, tlhogh'e' not vISutlh
'IHbe'chugh, not vIbej
ralchugh, mucholbe'jaj
ghaH chuQun'e', pagh, nuQchu'
ja'chuqlaHchu'
chuSchu'wI' pov ghaHba'
'ej jIbDajDaq wov... nuq?
wovjaj joH'a' belmoHbogh wovghach neH
jISaHbe'
toH! joH, *mISter* muSHa'wI' je
ngemHomDaq jISo''egh
DoH
'el joH *pe'tlho*, *tlhaw'DIyo*, *baltlhaSar* je, chuSchu'lu'taHvIS
qP: Ha', tugh chuSchu'ghachvam wIQoyqang'a'?
tlh: jIQoybej, joHwI' QaQ. tam choS, qar'a'?
chIch belvaD ngaqmeH tammoHlu'law'ta'!
qP: vogh So''egh *be'neDIq*. Daqvam Dalegh'a'?
tlh: joHwI', vIleghchu'pu'. rInDI' chuSchu'ghaH,
toQDujvam peghvaD pay' wItlhongbej jay'!
qP: Ha', *baltlhaSar*. SoQvetlh wIQoyqa'jaj.
Bal: cha'logh chuSHu'ghachvam vItIchta'meH,
ghoghwIj qabqu' yItlhobQo', joHwI' QaQ.
qP: povghach'e' tobtaH ghu'vam: pupba' vay',
'e' vaqtaHvIS. yIjach. choSawmoHqang'a'?
Bal: Sawghach Daja'mo', DaH jIjachchu'neS.
tlhIb be' 'e' Harlaw'taHvIS SawqangwI' law',
pIj be'vam SawmoHtaH 'ej pIj 'e' 'IptaH.
jItlhIb je...
qP: Ha', wejpuH! SIbI' yIjach!
'ej wej bIghoHQo'chugh, ghoHjaj chuSghachDaj
Bal: jIchuSpa', QaghmeywIj yIjuSba'neS:
jIrammeH QuSta' qa'. jIghuSqa'be'.
qP: Doghghach nujatlhba' ghaH! Do' ghagh 'ej jaw:
buS wuS, ghuy'cha', 'ej nuS
chuSchu'lu'
pegh'eghtaHvIS jatlh *be'neDIq*
Ben: toH, DaH chuS QIch quv!
DaH qa'Daj belmoHlu'law'!
Huj:
ghot porghDu'vo' wa' SalmoHlaw' Qogh chor tlheghmey!
Qo'; chuS'ugh'e' reH vImaS
pItlh
jachchu'ghach SoQ
Bal: pebepQo', be'pu', pebepQo',
loDpu' quvmoH pagh matlhghach.
luma'law' 'et; luma' je 'o'.
pagh Qu'chajvaD potlh ratlhghach.
vaj, pebepQo'; tIDochnISchoH.
DaH peQuch 'ej HItlha'qa'.
'IQghachraj QIchmey Hoch tIDoH!
chenjaj "Ha' Ha' majQa' Ha'!"
tIjachQo', SoQ tIjachtaHQo',
Dalchugh 'ej 'Itchugh SoQraj.
reH ghu' letlh loSlaH, 'ach taH qo'.
tuvghach'e' neH wIpoQjaj.
vaj, pebepQo'...
qP: va, QaQ jachghachvam
Bal: qab je jachwI', joHwI'
qP: toH, ghobe', va
wa' Qu'vaD yap bIjachghach
pegh'eghtaHvIS jatlh *be'neDIq*
Ben: chaq ghaHchugh targh'e' 'ej SoQvam jachchugh, lumuHbej
joH'a'vaD jItlhob:
pagh Do'Ha'ghachvaD ghuHmoHchugh QIchDaj qab
chaq ram Qa' vIQoy 'e' vImaS,
Quch Hoch, latlh Hoch joq nungchugh 'oH
qP: 'eH, va, cho'Ij'a', *baltlhaSar*?
SuH, maHvaD chuSchu'ghach pov yISuq
wa'leS ram, jaw *Hero* QongDaqpa' lojmItHomDaq, wIlo' wIneH
Bal: 'oH QaQ law' latlh Hoch vISuqlaHbogh puS, joHwI'
qP: maj. yIDoH.
mej *baltlhaSar*
qP: yIchol, *le'ona'to*
DaHjaj nuq choja'pu'?
qaH *be'neDIq* muSHa''a' be'nI'puqbe'lI', *be'terIS*?
tlh: toH, HIja'
pegh'eghtaHvIS qaH *pe'tlho* jatlh
tlh: DayonmeH yISo'
pa'taH Qa'
peghHa'egh
tlh: loD vay' muSHa' jawbe'vam, not 'e' vIHarpu'
L: ghobe', vIHarbe' je
'ach Dunqu':
qaH *be'neDIq* Ho'qu'
'ej reH ghaH cherghlaHbe' 'e' narghmoHlaw' DaghachDaj'e', tu'laHbogh vay'
Ben: DuH'a'?
HeHvetlhDaq SuS tu'lu''a'?
L: ghay'cha', joHwI', qatlh vIyaj 'e' vISovbe',
wanI'vam vIHarQo'chugh:
Qay'moHbogh nongghach ghajtaHvIS, muSHa'
'e' junlaHbe' Qubghach
qP: chaq ngebmoH neH
tlh: va, DuHqu'
L: Qu'vatlh! ngebmoH'a'?
not nongghach ngeb, nongghach yInDaq Sum law'
nongghach 'angbogh Sum puS!
qP: qatlh? nongghach narghmoHwI' bIHbogh nuq'e' ghaj?
pegh'eghtaHvIS jatlh *tlhaw'DIyo*
tlh: yIpuSchu', vIHQo'law' DoSvam
L: narghmoHwI' nuq'e', joHwI'?
pIj pa'taH ghaH, qarbej --- chay' pa', Duja'ba'pu' puqwI'
tlh: muja'bejpu'
qP: chay', chay'? yIjatlh
chomer
muSHa'ghach HIvghach HochvaD qa'Daj jeylaH pagh 'e' vIHarpu'
L: jeylaH pagh 'e' vI'Ipqangpu', joHwI'
jeylaHbe'qu' *be'neDIq*
pegh'eghtaHvIS jatlh *be'neDIq*
Ben: 'oH ngorghach'e' 'e' vIHarruppu', ja'be'chugh rol chIS ghot
vumnISlu'ghachvamDaq So''eghlaHbe'bej 'ongghach
pegh'eghtaHvIS jatlh *tlhaw'DIyo*
tlh: ngejchoHlu'; yIruchtaH
qP: *be'neDIq*vaD muSHa'ghachDaj SovmoHpu''a'?
L: ghobe' 'ej not SovmoH 'e' 'Ip
ghaH Seng wanI'vam'e'
tlh: teHbej
ghu'vam ja' puqlI'. jatlh:
vaqghach vIlo'taHvIS pIj maghom
vaj, "qamuSHa'" qatlh ghaHvaD vIghItlh?
L: DaH QIchvam jatlh, ghaHvaD ghItlhchoHtaHvIS
qaStaHvIS wa' ram, cha'maHlogh vem
'ej pa', QongwI' yIvbeHDaj tuQtaHvIS pa'taH
pa'Ha', wa' nav beQwI' ghItlhpu'DI':
Hoch nuja' puqwI'
tlh: beQwI' DabuSpu'
vaj, belmoHbogh lut tlhaQ, nuDelbogh puqlI', vIqaw
L: toH! 'oH ghItlhpu' 'ej laDqa'taHvIS,
beQwI' bIngDaq tay' *be'neDIq* *be'terIS* je 'e' tu'
tlh: Dochvam'e'
L: QumDe' ghorchu' 'ej SanID DIHom chenmoH jay'
qun'egh, tlhIvmo'
tlhIvmo', ghotvaD Qumqang, 'ej ghaH vaqrup ghotvam 'e' Sovbej
jatlh:
qa'wIj vIlo'taHvIS, ghaH vIjuv,
vIvaqnISmo', muQumchugh
HIja', vImuSHa'chugh, pagh, vImuSchugh, vIvaqnIS
tlh: 'ej tormeH pumchoH, SaQ, jach, pa'Daj pej
tlhob, tIch:
Qu'vatlh, *be'neDIq*, bangwI'!
tuvghach munoblu'jaj!
L: Dochmeyvam vIbej, muja' puqwI'
ghaH ruQqu' maw'ghachvam
vaj, tulHa'mo' rIQ'eghmoHlaH jay' rut 'e' Har puqwI'
teHbej
qP: QaQ wanI'vam 'e' vIHar:
ghot latlhmo' ghu'vam Sov *be'neDIq*, 'oH 'angqangbe'chugh *be'terIS*
tlh: ngoQ nuq ta'meH SovmoHlu'?
ghaHvaD tlhaQ neH ghu'vam
'ej jawbe' vIvupbogh joy' 'e' vIpIH
qP: joy'chugh, Qu' quv 'oHbej muHlu'ghachDaj
ghaH be' pov'e' muSHa'nISbogh
'ej nublaHbe'bej quvDaj
tlh: valqu' je
qP: Qu' HochvaD val, 'oHchughbe' *be'neDIq* muSHa'meH Qu''e'
L: joHwI', porghvam QupDaq Suvchuqchugh valghach nongghach je,
yay ghaj nongghach, 'e' tob wa'maH 'ej 'e' tobHa' wa'
vIvup 'ej QaQ vIvupmeH meq, SoSloDnI'Daj QanwI'Daj je jIHmo'
qP: jIHvaD qImghachvam nob 'e' vImaS
nobchugh, Hoch latlh vumghachwIj vIroQ
'ej ghaH batlh qochwI' 'e' vIqaSmoH
*be'neDIq*vaD ghu' yIja' 'ej nuq jatlh 'e' yI'Ij
L: boQ wanI'vam 'e' DaHar'a'?
tlh: tugh Heghbej 'e' Har *Hero*, jatlhmo':
jIHeghqang, mumuSHa'chugh,
'ej jIHeghqang, vImuSHa'ghach vI'angpa',
'ej jIHeghqang, munaymoH 'e' nIDchugh
'e' qaq law' ghu'vam qaq puS:
jIqejghach motlhwa' tlhuH vIjatlhQo'
qP: maj. muSHa'ghachDajmo' qejHa'choHchugh,
qItqu': vanHa' ghaH
wanI'vam boSovqu'mo':
qa' naDHa'nISlu'bogh ghaj loDvam
tlh: ghaH loD 'umqu''e'
qP: Quchghach QaQ 'ang 'e' vIDIS
tlh: vI'Ip: valqu' je 'e' vIHar
qP: tlhaQghach lururbogh laHHomHeymey ghajlaw' 'e' vIDIS
tlh: 'ej yoHlaw'
qP: yoHmo', Qugh rur ghaH
'ej Solghachmey vu'taHvIS, val net ja'laH:
bIH jun, yoj Hojmo'
pagh, bIH nIDtaHvIS, lalDan yaj, Hajmo'
L: yejquv lobchugh, mangghomDajDaq roj leHba'
'ej rojHa'chugh, jaghvaD nuH pov HIjlu' 'e' HajnISba'
qP: Hojmo', tlhIvvIp 'ej HajvIp HujwI'vam, matlhmo' loDvam
'ach 'e' So' neH lut'a' tlhaQ ja'bogh
be'nI'puqlI' ghu' vIpay
*be'neDIq* wIghoS'a' 'ej ghaHvaD muSHa'ghachDaj wIja''a'?
tlh: not yIja', joHwI'
SIQjaj, qeS QaQ lobtaHvIS
L: Qo', chaq DuHHa'
qaSpa' SIQghach, Qop tIqDaj
qP: lu', puqlI'vo' tugh latlh wI'Ij
wej qaStaHvIS wanI'vam, bIrchoHjaj SuvwI' 'Iw
*be'neDIq* vIparHa'qu'
'ej HemHa'taHvIS, be'vam QaQqu'vaD QaQbe' ghaH 'e' yajmeH nuD'egh vIneH
L: joHwI', bIyItqang'a'?
'uQ qeqlu'pu'
pegh'eghtaHvIS jatlh *tlhaw'DIyo*
tlh: Dochvammo' *be'terIS* toy'rupbe'chugh ghaH,
not jIpIHghach vIvoq
pegh'eghtaHvIS jatlh qaH *pe'tlho*
qP: latlhvaD jonwI' rap qeqlu'jaj
'e' ruchnIS puqlI' toy'wI'be'pu'Daj je
tlhaQ, muSHa' latlh 'e' HarDI' cha', pagh tobghach lughajtaHvIS
ghu'vam vIbej vIneH
QaQbej cha'ghachvam
'uQ ghoSmeH 'elmeH ra'meH *be'terIS* wIngeHjaj
mej qaH *pe'tlho*, *tlhaw'DIyo*, *le'ona'to* je
'et ghoS *be'neDIq*
Ben: 'oHlaHbe'ba' tojghach'e'
ja'chuqtaHvIS Sagh
*Hero*vo' vItvam lughaj
jawbe' luvuplaw'
ghaH Sevlaw' nongghachDaj
mumuSHa''a'?
toH, yonnISlu'
chay' munoH 'e' vIQoypu'
lujatlh:
Hemqu'ba', ghaHvo' muSHa'ghach tu'chugh
lujatlh je:
Hegh maS law' muSHa'ghach vay' 'angghach maS puS
jISaw not 'e' vIqel
HemHa'wI' vIDanIS
pummey 'Ijchugh vay', 'ej tI''eghmeH bIH lo'laHchugh, Do'
'IH jawbe', lujatlh: vIt; vIja'laH
quv je: qaS, vIpumlaHbe'
val je, 'oHbe'chugh mumuSHa'ghach neH:
va, valghachDajvaD pagh chellaHghach 'oHba' wanI'vam'e'
'ej DoghghachDajvaD pagh toblaHghach 'oHba' je wanI''e',
pe'vIl vImuSHa'chu'mo'
chaq mu'qaD, tlhaQghach DI je lo'lu'taHvIS vIHIvlu',
tlhogh vIvuvHa'mo', qaStaHvIS nI'wI'
'ach choHlaHbej neHghach
qantaHvIS, Ha'DIbaH'e' SIQlaHbe'bogh vay', tIv QuptaHvIS ghaH
DujDaj Sanvo' ghot ghIjlaH'a' tIghmu', lutmey je, yab nav chaqoq je?
Qo'. qo' tebnIS ghotghom
jIleghDI', not jISaw: vIjatlhDI', jISawDI' jIyInbe' 'e' vIpIHpu'
chol *be'terIS*
QI'yaH, 'IH be'vam jay'
ghaHDaq muSHa'ghach tobwI'Hey vItu'
'el *be'terIS*
Bet: vIneHbe'taHvIS, 'uQ DaghoSmeH qatlhobmeH vIngeHlu'
Ben: *be'terIS* 'IH,bIvumghachvammo' qatlho'
Bet: jIvumghachvam, tlho'vamvaD vIta' law'be',
bIvumghach, chotlho'meH Data' puSbe'
jIvumnISchugh, jIyaHQo'
Ben: vaj, Dubel'a' choQumghach?
Bet: HIja'
bel rap ghajlu' net ta'laH vay', HughDaj taj lanlu'chugh 'ej voQchugh
bISopqangbe'law', jaw
qaDoH
mej
Ben: toH!
vIneHbe'taHvIS, 'uQ DaghoSmeH qatlhobmeH vIngeHlu'
cha' Hechghach 'oSba' mu'tleghvam
jIvumghachvam, tlho'vamvaD vIta' law'be',
bIvumghach, chotlho'meH Data' puSbe'
nIb mu'tlheghvetlh mu'tlheghvam je:
tlho' rurSoHvaD Hoch vIvumbogh, ngeDmo'
vIvupbe'chugh, mIghwI' jIHbej
vImuSHa'be'chugh, verengan jIHbej
DaH *Hologhram*Daj vISuq
mej
--
***
"Relax." -- "yIleS." [Three seconds pause.] "Stop Relaxing!" -- "yIleSHa'!"
--- the Conversational Klingon tape.
Nick "I am not a Klingon. Much." Nicholas. [email protected]
nIchyon jIH. nIchyon SoHbe'. nIchyon ghaHbe'. nIchyon tlhIHbe'. nIchyon jIHqu'.