Qo'noS QonoS

chovnatlh wa'maH wej

DIS cha'SaD wa', jar wa'


ghItlhvam HIDjolev


Crouching Tiger, Hidden Dragon

tera' Suchbogh tlhIngan SoHchugh, vaj muchvam DaleghnIS. batlh, ghob, vaj je qelbogh lut 'oH Crouching Tiger, Hidden Dragon'e'. (HIvrupbogh vIghro''a', lung So'lu'bogh je 'oS pongvam.)

cha'vatlh ben ChinaDaq qaS lut. Sub noy ghaH Li Mu Bai'e' (ghaH Da Chow Yun-Fat). qaStaHvIS DIS law' batlh SuvtaH, 'ach DaH qanchoH, 'ej 'utlh moj neH ghaH. jaghpu' law' HoHta'. Suv 'e' mev 'ej lalDan, yIn je buSchoH 'e' Hech.

batlh buplaHpa', wa' Qu' Qav ta'nIS. ghojmoHwI'Daj HoH Jade Fox («nagh boch Qogh»), 'ej bortaS SuqnIS Li Mu Bai.

'etlh nIvqu' ghaj Li Mu Bai, yan'a'vamvaD «Green Destiny» («San SuD») ponglu'. Suvbe'choHmo' Li Mu Bai, latlhvaD 'etlhDaj nob. jupDajvaD Te joHvaD nob 'e' wuq, 'ej Hopmo' Te joH, yan HIj Shu Lien (Dabogh Michelle Yeoh) 'e' voq. HIjDI', San SuD yan'a' nIHlu'.

ngugh Te juH'a'Daq mebpu' Da Yu qumwI', qorDu'Daj je. tugh nay puqbe'Daj Qup, Jen (Dabogh Zhang Zi-Yi). 'ach pIHqu' Yu qorDu'. tojlaw' Jen.

ngabmo' yan'a'Daj, wej bup Li Mu Bai. 'etlhDaj'e' nejnISbej SuvwI'na' 'ej pIch ghajmo' Shu Lien, Li Mu Bai tlhej ghaH. Shu LienvaD nong Li Mu Bai 'ej Li Mu BaivaD nong Shu Lien je. 'ach Do'Ha', Li Mu Bai 'Ip loDnI' ghaH Shu Lien Heghpu'bogh loDnal'e', vaj parmaqqaypu' moj 'e' bot quvchaj.

yan'a' nIH 'Iv? nuq So' Jen, 'ej chay' rar Jade Fox, Jen je? tay'qu'choH'a' Li Mu Bai, Shu Lien je? yan'a' ghajqa' 'ej bortaS ta' Li Mu Bai 'e' poQ ghob. vaj Jen peghmey tu'choH.

lutvam parHa'qu'bej tlhInganpu'. wa' tera'ngan SuvwI' quH qellu': Chinangan SuvwI' lurDech 'ang. «quvnIS 'ej ghobnIS 'ej matlhnIS SuvwI'» jatlh Shu Lien, 'ej 'ang muchvam. 'ej SuvtaHvIS, tlham SaHbe'law' gholpu'. tojbogh mIwmo', SuvDI' tlhoS puvlaw' SuvwI'pu'. 'ej pIm latlh muchmey law', muchvam je, HoSghajqu'mo' be'pu'.

muchvam che' Ang Lee (Sense and Sensibility, The Ice Storm je che'pu'). Qobbogh qoj SeymoHbogh ghu'mey 'ogh Yuen Wo-Ping (The Matrix).

DIvI' Hol lo'be' muchvam. Chinangan ta' Hol (Mandarin Hol) jatlh Hoch, 'ej mughbogh DIvI' Hol mu'mey cha' HaSta. 'ach Dutung ghu'vam 'e' yIchaw'Qo'; mughchu' mughwI'pu'.

povqu' lut'a'vam. quv, ghob, matlh, 'ej nong SuvwI''a', 'ej rut Hoch Qu'meyDaj ta'laHbe'. chay' vang SuvwI''a'? tlhInganpu' DuQchu' lutvam.


[HeD]

Qo'noS QonoS juH chegh

[juH]

tlhIngan Hol yejHaD juH chegh

[Duv]