tlhIngan-Hol Archive: Mon Jun 04 15:25:52 2012
[Date Prev][Date Next][Thread Prev][Thread Next]
Re: [Tlhingan-hol] muD Duj SIrgh'a'
At 14:04 '?????' 6/4/2012, ghunchu'wI' 'utlh wrote:
On Thu, May 31, 2012 at 9:53 PM, Robyn Stewart <[email protected]> wrote:
> toH. QuQ vIlaQtaHvIS nIn 'Iq Hevchugh, Qapbe'choH. SIrgh'a' DaDelbogh yuv
> naQ qIj 'e' vIpIH. ghor SIrgh'a' SeHbogh naQwIj Doq'e'. HoS poQ
naQ qIj 'ach
> DujwIjDaq nIn SeHbe'.
nguv naQmey 'e' vIqawlaH, jIQubqu'chugh. 'ach Segh 'oSbogh rItlh
vIqawbe'. nIn luSeH cha'.
nIn SeHbe' chang'eng wa'DIch (qIjwI'mey). motlh muD neH luSeH. QuQ
'elDI' muD law', nIn law' poQ QuQ, 'ach 'el nIn 'e' luchaw'be'chugh
chang'eng wejDIch (DoqwI'mey), nIn 'elmoHlaHbe' qIjwI'mey.
vo'wI' tajvaj luSeH cha'.
SuDwI'mey
nIn muD luDuDlu' 'e' luSeHlaw' cha'.
muD wIvlu'DI' qIjwI'mey, nIn choHDI' DoqwI'mey, nIn muD luDuDlu' 'e'
luSeH. 'ach DoqwI'mey luvIHmoHbe'chugh qIjwI'mey DavIHmoHtaHvIS, nIn
muD luDuDlu' 'e' luSeH qIjwI'mey.
vaj 'aqroS nIn vIwIvmeH DoqwI'mey vIyuvqu'pu'DI', SoQtaHvIS
qIjwI'mey, QuQDaq nIn 'Iq tu'lu'. qIjwI'mey vIyuvchu'DI' QuQDaq
yapbe'choH nIn vaj tujqu'choH QuQ. (HoS lIng nIn 'ach QuQ bIrmoH je.
yapbe'DI' nIn, tujchoH QuQ, Qapbe'choHpa'.
>> 'IqtaHvIS je DIngqu'taHghach Qapbe' nIn SeHwI''e'. nIn ghurlaH 'ach
>> nuplaHbe'. QuQ laQHa'meH, "magneto" leQ chu'Ha'nIS.
>
> toH, naQ Doq Daqelbej. Dajqu'. ghorbej'a' SIrgh'a'? chaq ghor nIn SeHwI'
> jan'e'.
qaSDI' jIQupqu'. jIqawchu'be' 'ej 'orwI' vIyu'laHbe'. vItna'
vISovnISchugh Duj QonoS vInuDlaH 'e' chup SoSwI'. Duj rI'Se' per'e'
vIqaw.
Duj rI'Se' per'a' QonoS? Daj.
'ach Duy'bej SIrgh'a' 'e' vIqaw. Seng wI'olmeH QuQDaq 'er'In vIbej,
me'ghan SeHwI' naQ ruQtaHvIS vavwI'. yuvDI' naQ, vIH "throttle"-Hey
'er'In. luHDI' naQ, vIHbe' 'er'In. yuvbe'taHvIS naQ, "throttle"
vIvIHmoHlaH. yuvpu'DI' ghIq luHpu'DI' naQ, poSlaw'taH "throttle" 'ach
vISoqmoHmeH vIvIHlaH. chaq "throttle" 'oHbe' Doch'e' vIbejbogh 'ej
vIvIHmoHbogh 'ach rurbej.
DaH jIyaj. muD DujlIjDaq ghor naQ qIj SIrgh'a'. DujwIjDaq ghor naQ
Doq SIrgh'a'.
> SIrghmaj tammeH qaStaHvIS wa'maH rep vumqu' loHwI'ma'. jISaHtaH 'ej loQ
> vIboQ.
tI'lI'ghach vIbuSHa'. vumlu'taHvIS jIDach. maghIQtaHmeH qaS, 'e' neH vISaH.
>> jajvetlh lujmo' SIrgh'a' maDo'bej. ngugh loS Hu' "Chichen Itza"-Daq
>
> vISuchta'!
chaq nagh letlh wab DaQoypu'.
nagh letlh gho'DI' SuchwI'pu' wab lIng'a'? wab le' vIqawbe'.
> vISIchmeH <<Let>> muD DujDaq vIlIgh. SeHlawDaq raSya' Hol, DIvI'
> Hol je ghItlhlu' 'ach 'eSpanya' Hol neH lujatlh 'orwI'pu'.
DIvI' Hol jatlhwI'pu' ma'qang mIch muD Duj SeHwI'pu'. DIvI' Hol neH
jatlh 'orwI'. loQ 'eSpanya' Hol jatlh be'nalDaj 'ach 'ormeH lI'be'
mu'tay Sovbogh. Do' ra'wI' lupwI' ja'meH yap. wa'logh "Espera!" jatlh
'e' vIqaw.
maj. DuSaQDaq 'eSpanya' Hol vIHaDtaH. qen Puerto Rico vISuch. (ngugh
pa' DIvI' Hol jatlh HochHom wej 'e' vISov). muD Duj vergh qachDaq
maHtaH 'ej Huch wISuq wIneH. yabwIjDaq lIS'eghchoH mu'mey nov 'e'
vIra'. SIbI' ?sabe usted donde esta' ...? vISam 'ach yabwIjDaq beylI'
jan 'oSbogh mu' vISamlaHbe'. pay' meq vItlhoj. DuSaQDaq jIHtaHvIS
chu'mo' Huch nobbogh janmey'e', DuSaQ paqDaq qonbe'lu'. not mu'vetlh
vIghojpu'mo' pIch ghajbe' yabwIj.
- Qov
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol
![[KLI Member]](/pics/KLImemberbutton.gif "[KLI Member]"){kind=small}
![[Hol po'wI']](/pics/level3_big.png "[Hol po'wI']"){kind=small}