tlhIngan-Hol Archive: Mon Feb 22 23:33:50 1999
[Date Prev][Date Next][Thread Prev][Thread Next]
Re: maleng
wa'Hu' ram *Savannah*vo' machegh. HoS 'ej bIr SuS, 'ej rut SIS, 'ach
maSaHbe': wej jajmeyvam DItIvbej. reH Soj 'eychu' lujabbogh Qe'mey wISamlaH.
*Ireland* QoQ wIQoy 'e' wItIv je; motlh vengvamDaq nom Samlu'. 'ach
qaStaHvIS jajmeyvam Qu'vam ngeD law' qaStaHvIS latlh jajmey Qu'vam ngeD puS.
qatlh? loSHu' tagh *Ireland* QoQ yupma', 'ej cha'Hu' rIn yupma'. QoQ much
ghommey law' Sovchu'bogh 'ej parHa'chu'bogh QoywI'pu'. ngoDmeyvam DIlaDpu'mo'
DISov, 'ach yupma' wISuchbe'. wejHu' *Kevin Barry's Pub*Daq wa' *Ireland*ngan
QoQ muchwI' wIlegh 'ej wIQoy. Dun 'ej yap ghaH.
wa'Hu' *St. John's Cathedral* wISuch. qen Hegh wa' jupma', 'ej vengvam
chIrghvam je parHa'qu' ghaH. jupma'vaD weQ meQmoH 'e' neH be'nalwI'.
DISvam qach Dubqu'lu'taH. Hewmey, nagh beQmey, tutmey, pa' reDmey, tlhoy'mey
je DIjqa'taH po'wI'pu'. pIj qaStaHvIS nungbogh DISmey qachvam wISuchDI',
'IHqu' 'ej le'qu' qach 'e' wIlegh. DaH lupovqu'choHmoHtaH 'ej patlh veb
luchav. nIpIlmoHchugh Seghvam Dochmey, chIrghvam DanuD 'e' vIchupqu'.
--jey'el