tlhIngan-Hol Archive: Sat Sep 26 14:31:59 1998
[Date Prev][Date Next][Thread Prev][Thread Next]
tugh Hegh jIlwI'
- From: "William H. Martin" <[email protected]>
- Subject: tugh Hegh jIlwI'
- Date: Sat, 26 Sep 1998 17:33:05 -0400 (Eastern Daylight Time)
- Priority: NORMAL
cha'ben Hegh jIlwI' loDnal. yabDajDaq DaqHom qab tu'lu'pu'.
nom ghur DaqHomvam. QIt yabDaj Sop. 'oy'chu'. Hoch
juppu'Daj rI' loDvam. ghom. Hagh. roj. batlh juHDajDaq Hegh.
DaH loDvam be'nal taghDaq DaqHom qab tu'lu'. SochHu' DaqHomvam
tu' Qel. DaHjaj taghvo' 'Iw tlhISchoH jIlwI'. ghaytan tugh Hegh.
DaHjaj po jIlwI'vaD tar le' nobqang Qel. tlhoS DaqHom qab HoH
tarvam 'e' pIH Qel. yInDaj nI'moH tarvam 'ej jIlwI' HoSmoH
tarvam 'e' pIH Qel.
'ach reghchoHtaHmo' tagh, tar le' nobqangbe' Qel. paS. DaH
QaplaHbe' mIwvam 'e' pIHchoH Qel. ghaytan tugh tagh 'aD'a' Qaw'
DaqHom qab. reghqu'choH. tagh teb 'Iw. Hegh. chaq DaHjaj ram
Hegh. chaq pIvchoH 'ej tar le' lo'laH. Sovbe'bej Qel.
Sovbe'lu'bej.
juHDaq Hegh neHbe' jIlwI'. ropyaHDaq Hegh 'e' maS. 'oy'qangbe.
'oy'be'choHmoHtaHbogh Hergh wIv. puqbe'Daj ghomqangbe'. Haghbe'.
'It 'ej QeH. batlh SaHbe'. nom Heghqang.
jI'IQ'a'? jI'It'a'? jImIS'a'? jISovbe'mo' Satlhob. ghaytan
SuSovbe', 'ach jISovbe'bej.
charghwI' 'utlh