tlhIngan-Hol Archive: Mon Sep 14 04:00:05 1998
[Date Prev][Date Next][Thread Prev][Thread Next]
bIQ Hutlh juHwIj.
- From: "William H. Martin" <[email protected]>
- Subject: bIQ Hutlh juHwIj.
- Date: Mon, 14 Sep 1998 07:00:23 -0400 (Eastern Daylight Time)
- Priority: NORMAL
bID qelI'qam (qelI'qam bID?) 'ab juHwIj bIQtIqHom Hal je joj.
HalDaq wutlhvo' vo''egh bIQ. juvHa'nISbe'lu'. boSnIS neH. bIQ
Hal'a' Dechbogh bIQvam wIboSmeH bIQ bal'e' le' wIchenmoHta'.
chorghben bIQvam lo' wa' juH. Qu'vam toy'chu'. muv juHwIj.
qay'be'. muv latlh. pIjHa' Qaghmo' lo'wI' buy'Ha'choHchu' bIQ
bal'a'. roD juH wa'DIchDaq yotlh tIvaD bIQ natlhtaH 'ej mev 'e'
lIj. Qu'qoqvam vImuS. tImo' jISay''eghlaHbe'. tImo' puchwIj
vIHuvmoHlaHbe'. tImo' jItlhutlhlaHbe'. QaghDaj QIpmo' qaStaHvIS
jajmey puS loSnIS Hoch.
tIvamvaD tar vInob vIneH. juHvam vImeQmoH vIneH.
pIjHa' Sut law' Say'moH juH wejDIch nuv. Hoch bIQ natlh.
SutmeyDajmo' jISay''eghlaHbe'. jItlhutlhlaHbe'. puchwIj
vIHuvmoHlaHbe'. SutmeyDaj vImeHmoH vIneH. meQtaHvIS Sutvam tuQ
jIlwI', ghu' Dublu'.
muv latlh juH. muv latlh juH. bIQ Hal lo' vagh juH 'ej tugh juv
latlh. javHu' ghIQtaHvIS jIlpu'wI' juH wa'DIchDaq juHchaj
QorghlI' jupchaj. tI legh 'ej noH. QaDlaw'. tIvaD bIQ bach.
bachHa'. Hoch bIQmaj notlh qoHvam. qaStaHvIS cha' jaj bIQ
wIHutlh.
cha'Hu' juH loSDIch tIDaj legh 'ej noH. QaDlaw'. Hoch bIQmaj
woD.
jIlpu'vammo' jaghpu' vIpoQbe'.
bIQ luSammeH wutlh Hop SamnIS jIlpu'wI'. pa' ratlh jIlpu'wI' 'e'
vImaS.
charghwI', pab 'utlh