tlhIngan-Hol Archive: Sun Sep 13 12:03:28 1998
[Date Prev][Date Next][Thread Prev][Thread Next]
Re: meQlaH je bortaS
- From: "William H. Martin" <[email protected]>
- Subject: Re: meQlaH je bortaS
- Date: Sun, 13 Sep 1998 14:24:32 -0400 (Eastern Daylight Time)
- Priority: NORMAL
On Tue, 1 Sep 1998 09:56:31 -0700 (PDT) Alan Anderson
<[email protected]> wrote:
> qechmey puS vIQIjnIS 'e' vIpIH. mu'ghomHom vImuch:
>
> meQmeH por: pormey qatlu'meH nav lo'lu', 'ej tlhIch tlhuHlu'meH, meQlu'.
> pIj Hurgh lang rur pormey qatlu'pu'bogh.
SuD'a'? wIb'a'? na''a'?
> machqu'chugh, motlh chIS nav 'ej meQmeH porHom ponglu'.
> machqu'be'chugh, motlh Hurgh nav.
jIH qar law' SoH qar puS 'e' vInID. tlhIchnaQHom qellu'DI'
machqu'bogh tIH chIS rur. 'etDaq 'o'Daq je Hurgh. lam
yIQ rur. botlhDaq pe'qa'qu'bogh por QaD ghoDlu'. por 'ay'meyvam
qat nav chIS.
tlhIchnaQ'a' qellu'DI', HurghHey lang Hew rur. botlhDaq
pe'qa'qu'bogh por QaD ghoDlu', 'ach por 'ay'meyvam qat
pe'be'bogh por QaD. QaDmo' SuDbe'. Hurgh. lam yIQ rur.
jIQap'a'? tlhIchnaQ'a' tlhIchnaQHom je DaghovlaH'a'?
> Hurghbogh meQmeH por machbe' qel lutvam.
>
> lot DIlwI':
toH! wIchvam vIghov!
tera'Daq malja' Huj tu'lu'. ghaw' SoHchugh SuDlaw'wI' DaSam.
ghaHvaD Huch Danob. SoHvaD pagh Dunob, 'ach qaSchugh lot le'
Huch law' Dunob SoHvaD 'e' lay' SuDlaw'wI'. qaSpa' lotvam Segh
bowuq. qaSchugh lot Segh pIm, Do'Ha'. lot DaSIQ 'ej HuchlIj pol
SuDlaw'wI'. verengan rurba' SuDlaw'wI'. qoH rurba' ghaw'.
> lot DIlwI'vaD Huch puS nob nuv.
> ghaytan qaSbe' lot 'e' noHchugh lot DIlwI', roD qutlh.
> ghaytan qaS lot 'e' noHchugh lot DIlwI', roD wagh.
> qaSchugh lot, SIQwI'vaD Huch law' nob lot DIlwI'.
SuDlaw' neH lot DIlwI'. qach'a' je'laH lot DIlwI' 'ej Duj le'
ghaj. Sut le' ghaj. Qeb wagh tuQ. verengan rur.
> cha'maH loS meQmeH por je' loD. qub meQmeH pormey 'ej waghqu'.
> vaj lot DIlwI' rI'. Huq. meQmeH pormey luQaw'lu'chugh qoj
> luchIllu'chugh, loDvaD Huch nob lot DIlwI' malja' 'e' lay'.
> lotmey Delchu' mabHey: lot 'oH qul'e'.
lutvam wanI' Qav DapIHlaH'a'?
> tugh Hoch meQmeH pormey Dun natlhta' loD. wej lot DIlwI' malja'vaD
> Huch nobpu', 'ach lojmo' meQmeH pormey, malja'vo' Huch poQ.
>
> qulHommey law'mo' ngabpu' meQmeH pormey 'e' maq loD. DIlQo' malja'.
> motlhba' ghu' 'e' qap. bo'DIjDaq, Qap...loD'e'!
>
> QIj 'oDwI'. qaSchugh qul DIl malja' 'e' lay'bej. qul Hat ngu'ta'be'
> vaj loDvaD Huch nobnIS. waghbogh poH nI' SIQbe'meH malja', ghu' laj
> 'ej loDvaD wa'netlh vaghSaD DeQ nob, qulmeyDaq meQmeH por chIlta'mo'.
>
> nuqDaq 'oHtaH ruv'e' jay' bIghel'a'? petuv, tlhaQchoH lut...
QIpchoH je.
> Huch HevDI' loD, ghaHvaD qopmoH lot DIlwI'. loD pum: cha'maH loSlogh
> chIch Doch qub 'ej lo'laH meQta' 'e' maq. bo'DIjDaq, luj loD.
> qaStaHvIS cha'maH loS DIS bIghHa'Daq loD weghlu'.
maj. yuD.
> bortaS tuj jablu'DI' rut QaQqu' nay'. :-)
wejpuH.
> -- ghunchu'wI'
charghwI', pab 'utlh