tlhIngan-Hol Archive: Fri May 29 15:03:18 1998
[Date Prev][Date Next][Thread Prev][Thread Next]
qaStaHvIS wej jaj, bangwI' vIthej
- From: "William H. Martin" <[email protected]>
- Subject: qaStaHvIS wej jaj, bangwI' vIthej
- Date: Fri, 29 May 1998 18:02:52 -0400 (Eastern Daylight Time)
- Priority: NORMAL
batlh Heghpu'bogh SuvwI'pu' DIqawmeH, qaStaHvIS wej jaj malop.
[Memorial Day weekend]
jaj paghDIch pov, puHDujHomwIj DungDaq bIQDujHomwIj vIlanpu' 'ej
puHDujHomwIj qoDDaq DochmeywIj law' vIlanpu'. wa'maH
Sochvatlh rep jIvumta'DI' bangwI' juH vIghoS 'ej vISuch.
puHDujwIjvo' puHDujDajDaq Hoch DochmeywIj DIQay. puHDujDaj tIn
law' puHDujwIj tIn puS. *Deltaville, Virginia*Daq bIQtIq wIghoS.
cha'maH wejvatlh rep mapaw.
jaj wa'DIch bIQ'a'Soj wIje' 'ej wIpol. bIQtIqDaq bIQDujHommaj
DIlan. pImqu' bIQDujHommaj.
reHmeH bIQDujHom 'oH bIQDujHomDaj'e'. bIQ chIS DujHom 'oH
bIQDujwIj'e'. Do'Ha' chISbe' bIQtIqvam. tlhoS beQ. QIt vIH bIQ.
*keel* *channel*mey je ghaj reHmeH bIQDujHom. tIH rur HeDaj.
tlhe'be'chugh ngeDqu' vo'meH Qu'.
Habqu' bIQDujHomwIj Som. QIS rur HeDaj. ngeDqu' tlhe'meH Qu'
'ach bIQtIqvamDaq pIjHa' tlhe'nISlu'. Qatlhqu' tlhe'be'meH Qu'.
reH jItlhe'Ha'nIStaHmo' jIQImnIS. jIleSlaHbe'.
*I love to just find the rhythm and paddle.* muja' bangwI'.
<<bIQDujHomwIjDaq Qu'vam vIta'laHbe'.>> vIja'. muyajlaHbe', vaj
ghaHvaD jImuch. *paddle smootlhly and evenly on each side with
my kayak's double paddle* 'e' vItagh. tlhoS nIHDaq jItlhe'choH.
loQ nIHDaq jItlhe'choH. nIHDaq jItlhe'choHbej. nom nIHDaq
jItlhe'qu'choH. pay' poSDaq Sup SomwIj, nIHDaq jIpum 'ej
jIyoychoH.
Do'Ha' bIQtIqDaq jIyoytaHvIS, jItlhuHlaHbe'ba'. cha'logh
jIyoyHa'choH 'e' vInID 'ach vIvonlu'. *splash skirt*wIj vIyuvHa'
'ej narghchoHghach yIQ [a wet exit] vIta'. DujwIj bID teb bIQ.
vIchImmoHlaHbe'. DujwIj vI'uchtaHvIS bIQtIq HeHDaq cha' Duj
vo'nIS bangwI'.
Haghqu'taH bangwI'. SIbI' jIpumpa' nom bangwI' vIbejlaw' 'ej
tlhaQqu'choHlaw' qabwIj. Haghqu'taH bangwI'. Haghqu'mo' tlhoS
pum je. tlhoS tlhuHlaHbe'. DoqchoH qabDaj. qaSpu'DI' rep law'
pay' Haghqu'qa' bangwI'. raS qIpqu'qa' ghopDaj 'ej tlhoS
quSDajvo' pum. jItlhaQqu'law'pu'.
qaStaHvIS latlh cha' jaj, qaS wanI' ram.
charghwI'