tlhIngan-Hol Archive: Thu Jul 30 09:39:59 1998
[Date Prev][Date Next][Thread Prev][Thread Next]
loQ qep'a' vIDel
- From: "Andeen, Eric" <[email protected]>
- Subject: loQ qep'a' vIDel
- Date: Thu, 30 Jul 1998 09:35:12 -0700
qep'a'Daq jISaHtaHvIS, yaHwIjDaq lotHomqoq law' SIQnIS latlh vumwI',
'ach jIghIQlI'mo' yaHwIj vIbuSHa'laHchu'. Do'Ha' DaH jIcheghpu' 'ej
tera'ngan DoghwI' vIDanISqa'.
'ach QInvamvaD ghIlab ghew vIbuSQo'. qep'a' neH vIqel.
jIlengchoHmeH 'eqqu'taHvIS po jIvemnIS. lengwIj tIq law' HochHom tIq
puS. cha' lupDuj vIlIghnIS. lupDuj vergh'a'Daq jIpawDI' jIngojqu'.
jIba'taH vIneHbe'qu'. mebpa'meyDaq jIpawDI' qab chu' vIlegh 'ej tlhoS
vIghov. Holtej qab 'oHtaH tugh 'e' vItu'. nI'taHvIS poH jabbI'IDghomDaq
maQum, 'ej DaH maqIH. jIQuch. nargh charghwI', 'ej tugh jupna' law'
vIghomqa'pu'.
puS qep'a'vam jeSwI'pu', 'ej loQ mutung ngoDvam. Sar DachmeH meqmey:
QI'vaD toy'nIS DloraH; yapbe' latlh ghotpu' Huch poH joq. 'ach law'bej
jatlhchu'wI'pu' 'ej vIHtaHbogh bIQ rur tlhIngan Hol QIch. wa'nem jeSqa'
DachwI' law' 'e' vItul. jeSlaH je chu'wI'pu' 'e' vItul je.
law' wa'ben qeqmey, 'ach nIv DISvam qeqmey. <pegh mu'> wIQujqa', 'ach
chu' HochHom. rut jey'e' gherbogh *Lawrence* wIbuSHa'. Hoch qeqmey
wIta', 'ach pIj poHmey wIchoH.
*Thursday* po <mu'lIj yIwam> wIQuj. Hoch DubDaq navHom HuSmoH Qov, latlh
jeSwI' ghap (pongDaj vIqawbe'). QapmeH jeSwI', mu'Daj loynIS. latlhvaD
gheltaH net chaw', 'ach jangmeH <HIja'> pagh <ghobe'> neH ja' jangwI'
net chaw'. chutvam wIpabchu'qu'be'; tlhoS qech lI' jonchugh jeSwI' vaj
loQ wIQaH. vonlu'chugh vaj latlh qechmey DIchup. SuStel mu' Qatlh law'
Hoch Qatlh puS, 'ej moghchoHbej ghaH, 'ach loy. <jIl> 'oH.
paq qonlI' Holtej, 'ej maHvaD wa' 'ay' laD. mu'tlhegh laDpu'DI' Holtej,
loQ yev 'ej mugh Qov. Qatlh Qov Qu', 'ach batlh ta'. 'ey Holtej lut.
nentay Del. DaH paq naQ vIlaD vIneHbej.
*Friday* pov mu'qaD veS wIqeq, 'ej qeqvam Qatlh law' Hoch Qatlh puS.
law' mu'qaDmey, 'ej jejqu' 'op. jatlh *Heather*: <pIvghorlIj Dachu'DI'
Hagh paqleD>. Do'Ha' vIHtaHbogh bIQ lururbe' mu'qaDmey; ghevI' jeDqu'
lurur neH. pe'vIl mu'qaDmey bachlu'meH, nomqu' QubnISlu', 'ej wej
laHvetlh wIchav. chaq wa'nem machung.
*Saturday* pov qaDHom wIta'. HochvaD navHom nob Seqram. qech'e' Delbogh
navHomDaj qelnIS Hoch jeSwI' 'ej ghomvaD jatlh. SapwI' wa'DIch moj Qov,
'ej jatlhchoHpa' navHomDaj qelQo', vaj jatlhtaHvIS QubnISba'. butlhDaj
vIHo' 'ej mIwDaj vIlo' je jIH. rInDI' Qov Sapqanglaw'mo' pagh, vaj Sap
pagh ;-) Seqramvo' navHom vISuq 'ej vInuD. vIqel. <nIvnav mavjop je>
ghItlhlu'. chImchu'taH yabwIj. navHomvam vIlajQo' 'ej latlh vISuq.
<SoSlI' vIqotlhDI'>. loQ qechvam vIqel 'ej jIjatlhchoH. vIja'taHvIS loQ
DoqchoH qabwIj.
tIqqu'choHpu'mo' jabbI'IDvam jIghItlh 'e' vImev. Dun *Cabaret* 'ach wej
vIqel. tugh jIlabqa'.
pagh