tlhIngan-Hol Archive: Wed Jul 01 14:12:05 1998
[Date Prev][Date Next][Thread Prev][Thread Next]
RE: maghIQpu'
- From: "Andeen, Eric" <[email protected]>
- Subject: RE: maghIQpu'
- Date: Wed, 1 Jul 1998 14:06:33 -0700
lab ghunchu'wI':
>
> toghlaH'a' Sajraj'e'? QumlaHchu''a'?
> mutvam chovnatlh vISuqchugh, tlhIngan Hol vIghojmoHbej jIH.
>
> <'aq! chabHom neH pa'lIy! 'aq!>
>
toghlaHbe' Sajmaj *ZaZu*. QumlaHchu'be', 'ach loQ ghojlI'. puSqu'
Humanpu'vaD jatlhlaHchu'bogh 'ej QumlaHchu'bogh Ha'DIbaH.
pIj juHmajDaq jIcheghDI' jIHvaD jatlh *ZaZu* "Hello". "Hello" parHa'law'
'ej jatlhqangtaH. latlh mu'tlheghHommey jatlhlaH je. wejmaHHu' "How are
you?" ghojchu'. *ZaZu* luvuQ ghogh HablI'maj. ghogh HablI' DIlo'taHvIS
*ZaZu* wIbuSHa'mo' muSlaw'. *ZaZu* retlhDaq 'elDI' ghogh HablI', bItchoH
'ej QeHchoH. ghogh HablI' chop 'e' nID. 'ach rut ghogh HablI' lo'
neHlaw' je. chuSchoH 'ej ghuH rurchu'. jatlh "Hello. How are you? OK.
OK. OK. bye." *jealous* (mu' yap wIHutlh) *ZaZu* 'e' wIHar.
*ZaZu*vaD tlhIngan Hol vIjatlhbe' 'ej vIghojqangbe'moH. ghaytan Qu'vam
vIta'chugh muHoH be'nalwI'.
QumlaHchu' QulwI' chovnatlh. pel'aQchaj ghorDI' le'be', 'ach
vumqu'taHmo' jatlhmeH 'ej QummeH po'qu'choHlI'.
toghmeH mIw pIm ghoj chovnatlh pIm. 'elpI'Daq pImbogh Dochmey law' lan
QulwI' 'ej puvwI' wa'DIchvaD 'ang. <'ar?> pagh <DoqwI' 'ar?> pagh <nagh
'ar?> ghel. (DIvI' Hol poD lo'ba'). DaH jav Dochmey toghlaH. chaq ghur
mI'vam. napchu'be'mo' mIwvam toghnIS puvwI' 'e' luHar QulwI'pu'.
puvwI' cha'DIchvaD pIm mIw. jan chuSmoH QulwI'. chuSqa'moH. <'ar> ghel
QulwI'. mIwvam ghojchu'DI' puvwI' cha'DIch, mIw wa'DIch much QulwI'.
SIbI' yajlaH puvwI' 'e' lutul.
'ach ghaytan jIDalchoH. SIbI' jImev.
pagh