tlhIngan-Hol Archive: Tue Feb 10 19:06:08 1998
[Date Prev][Date Next][Thread Prev][Thread Next]
loQ rejmorgh vImoj
- From: "William H. Martin" <[email protected]>
- Subject: loQ rejmorgh vImoj
- Date: Tue, 10 Feb 1998 22:06:12 -0500 (Eastern Standard Time)
- Priority: NORMAL
loQ jImer'egh. roD SoSwI' vISaHbe'. vIparbe' 'ach vIbuSbe'.
matlhejchuqtaHvIS pIj loQ mubItmoH, vaj pIjHa' vISuch.
wa'leS wa'maH wa'vatlh rep SoSwI' Haqlu'choH. yaHDaq DaHjaj pagh
Qu' vIta'. rejmorgh jIHtaH 'e' vISovbe'taHvIS rejmorgh jIHlaw'.
Qobbe'law' ghu'Daj wanI'vam je. chorDajDaq *fibroid* tu'lu'.
tIn; ro'wIj rur 'ej ghurlaw'taH. SochmaH wejben boghpu' SoSwI'
'ach pIvqu'. ghaytan qay'be'. ghurwI'vam teq HaqwI' 'ej latlh
be' 'ay'Du' teq je. motlh mIw.
'ach jIbItlaw'. ghaytan jIDogh.
qaStaHvIS veb wej jaj jIvumbe'. ropyaH'a'Daq jIratlh 'ej SoSwI'
vIQorgh. Qorgh je be'nI'wI'. Qorgh je SoSwI' bang. vaghmaH
cha'ben tlhoS bangpu' moj 'ach vangbe'. nargh 'eb. cha'ben 'eb
lujon. Quchqu'. chorghmaH ben boghpu' SoSwI' bang 'ach SoSwI'
bang pIv law' SoSwI' pIv puS. Supghew chu'laHchu' loDvam.
QuchmoH QoQDaj. reH muchqangqu'taH. vISuchDI' vItlhejmeH
leSpalwIj vIchu'. vIqat 'e' vIHar, 'ach mu' lugh vIwIv vIneH.
vIqat 'ach bombe' ghoghDaj. bom SupghewDaj. QoQDaj 'ey law'
QoQwIj 'ey puS.
jIDoy'choH. pItlh.
charghwI'