tlhIngan-Hol Archive: Mon Dec 28 11:30:31 1998
[Date Prev][Date Next][Thread Prev][Thread Next]
jajwIj le'
- From: "William H. Martin" <[email protected]>
- Subject: jajwIj le'
- Date: Mon, 28 Dec 1998 14:30:28 -0500 (Eastern Standard Time)
- Priority: NORMAL
cha'leS loSmaH loSben jIboghchoH. yaHwIjDaq jIvumnIS 'ach
Qu'vetlh vIrInmoHDI' bangwI' be'nI' juH vIghoS. pa' QoQ wImuch.
jISey. mamuchDI' jIH, bangwI', bangwI' be'nI', bangwI' be'nI'
loDnal je, reH wanI' vItIvchu'. laHlIj vIDub vIneH. muchchu'
bangwI' be'nI' loDnal. pov laHlIj. 'ej chaq nobmey vIHev je.
QaQ yIn.
'ej DaH *Holidays* vItIvta'.
wa'ben wejHu' jI'IQqu'. DISvam wejHu' wanI' vItIvchu'. wa'ben
wanI' vIqawlaHmo' DISvam belwIj vIvuv. jIDo'qu'. tlhIHvaD je
SuQuchjaj!
'ach chaq pupbe' Hoch. Qel vISuch 'ej wej tIqwIj toblaHmo' Daj.
jIQamtaHvIS porghwIjDaq noch lan Qelvam. tIqwIj Dotlh qon.
jIH bIngDaq vIHchoH ravHom le'. jIqetnIS. tIqwIj Dotlh qonqa'.
nom vIHchoH ravHomvam. jIqetqu'nIS. tIqwIj Dotlh qonqa'.
pay' mura' Qel. jatlh <<rav le' yIlItHa'! yImev!>> HaSta laD 'ej
rejmorgh rurchoH. muja' <<chaq roptaH tIqlIj. wej DIch
vIghaj. tIqlIj tobmeH luch pIm wIlo'nIS. latlh jaj bIcheghnIS
'ej tIqlIj wItoblaH.>>
'IwwIjDaq woj tlhuDwI' lan Qel 'e' Hech Qel. latlh vIHbogh
ravHom vIlItnIS 'ej jIqetqa'. tIqwIj bej HotlhwI'. tlhuDwI'
leghlaH HotlhwI'vam vaj tIqwIjDaq 'Iw He leghlaH. 'Iw Hevchugh
Hoch tIqwIj, jIDo'. pIv tIqwIj. chaq 'Iw yap Hevbe'mo' tIqwIj
rav, rejmorgh rur QelwI'. tobpa' maSovlaHbe'.
vaj chaq jIpIvchu' pagh tugh chaq jIHegh. jIHeghchugh vaj qeSwIj
boHutlhchoH. SuDo'Ha'choH.
jIqIDnIS. jISaghtaHchugh rejmorgh vImoj 'ej yInwIj vItIvtaH 'e'
vImev. jIpIvlaw'. chaq jIpIvchu'. wej DIch vIghaj.
charghwI' 'utlh