tlhIngan-Hol Archive: Thu Oct 03 12:27:38 1996
[Date Prev][Date Next][Thread Prev][Thread Next]
tlhoraQ puqloDpu' lut, 'ay' vagh
- From: Terry Donnelly <[email protected]>
- Subject: tlhoraQ puqloDpu' lut, 'ay' vagh
- Date: Thu, 3 Oct 1996 14:26:34 -0500 (CDT)
(pongmey: tlhoraQ, qaDan, QI'merogh, moraQ, toraQ)
(<Hutlh> = "to lack" [paqvo' "tlhIngan tIgh"])
qaDanDaq pawta'DI' veSDuj QI'merogh, yuQ bavchoH. Duj meHDaq Qam
moraQ toraQ je. jatlh toraQ. "SIbI' 'otlh bIr rIHwI' laSvarghDaq maQol
'e' chaw' qaDan qum. laSvargh Quv vIghaj."
QuvvamDaq jolta'DI' moraQ toraQ je, pa' tInDaq Qam chaH. pa'vamDaq
ba'taH qaDangan law'. yoq mach puj ghaH qaDangan'e'. jIb pob joq Hutlh.
nuj tInqu' ghaj. mop tIq tuQ.
"revan, tlhInganpu'," jatlh wa' qaDangan. "DenIb QatlhvaD nuq jatlh
reghuluS 'Iwghargh?"
loQ mIS tlhInganpu'. "wISovbe'," jang toraQ. " 'otlh bIr rIHtaHghach
mIw wIje'meH matlhong wIneH."
"luq," jang qaDangan. "matlhongqang. lut tlhaQ boSov'a'?"
"nuqjatlh?" jang toraQ. "qatlh lut tlhaQ boQoy boneH? malja'
wISutlh wIneH."
"malja' luSutlhtaHDI' qaDanganpu', malja' lutlhe' lutmey tlhaQ.
maHvaD lut tlhaQ boja'chugh, vaj chevuv 'ej chevoq 'e' wISovbej. toH,
lut tlhaQ boSov'a'?"
"ghobe'," jang toraQ QeHchoHtaHvIS.
"mapay. pagh lut wIQoychugh, vaj pagh malja' wISutlhbe'ba'."
"wejpuH," Qub moraQ. toH, ngeDbej ghu'vam. lutmey tlhaQ parHa'qu'
Hoch tlhIngan. lutmey pov law' SovtaH moraQ. qaDanganvaD tlhob: "Doq'a'
SuvwI'?"
"vISovbe'," jang qaDangan.
"ghobe'. SuD."
Haghbe' qaDangan. "latlh lut DaSov'a'?"
(wej rIn lut)
-- ter'eS