tlhIngan-Hol Archive: Sun Feb 25 19:15:18 1996
[Date Prev][Date Next][Thread Prev][Thread Next]
rIyval Hoq: *voSbaD* ngan
- From: [email protected]
- Subject: rIyval Hoq: *voSbaD* ngan
- Date: Sun, 25 Feb 1996 22:15:33 -0500
tayqeq qawHaq: *voSbaD* ngan
bIQ'a'HeHDaq HubmeH lulIgh'e' luchenmoHtaHvIS SaqwI'beq, pa'vo'
HIvmeH Dup'e' Qubqu'lI' *rIyval*, tlhejDI' je qeSghom. Sep
luHotlh Hoqra'beq: Hurghmo' yInroH, bIQ'a' retlhDaq 'oH Debna''e'
neH. Hajqu'bogh Ha'DIbaHpu'vam muvmoHmeH ngeD, 'ej qeqmeH Qatlh
*rIyval* Qu'.
toqHa'mo' Qoblaw' Sep loQ 'e' boj wa' qeSwI', 'a bojchu'pa', ghaH
ja' la', "*Qe'ngIn* ghu' yIqaw; vaj rejmorgh yIDaQo'!" QobHey SIQ
tlhIngan, 'e' qapmo' je la', bojbe' qeSwI' 'ej yoHqu' beqpu'.
puHbotlhDaq ghoS 'e' lutagh nejwI'beq: Deb HurDaq law' tI Sor je.
vaj jagh bejtaHvIS, So'ba' bIH. loQ Hach vengHom, 'a pIj 'oHDaq
Dach SuvwI'. law' jonwI', 'ej juH chenmoHmeH bIH lo'chu' 'ej po'.
vengvo' nejpu'DI', tugh qeqDaq'e' luSam. pa' qeqlI' SuvwI'na',
'ej moy'bI' tIn rur nuH chenmoHbogh, Sor lo'taHvIS jonwI' po'.
ghoqbogh mughwI'jan'e' ghunbogh *qolI'pavuS* pov luchu'DI', De'
luSuqchoH: wa' puH'ay'vamDaq Qojchuq cha' *voSbaD* Segh; pa'
Suvchuq *voSjajIn* *vorghgheHIy* je. wa' Dup lo'taHvIS, bIQ'a'
ghoSmeH jagh raDnISlI' chaH. (bIQ'a' Qobna' 'ollaw' je De'vam).
Sep pIvDaq qevqu'mo' Sungpu', QojnIS, 'ej DebDaq yuvnIS latlh.
vaj DaH qeqqu'pu' chaH, 'a jaS muvmoHmeH Qatlh Qu', veSchajvo'
quchchugh yotwI'. yonbe' SuvwI' qa', veSvo' nopmoHDI' vay'.
chIch *voSbaD* veSDaq mun yotwI', 'e' wuq la'. Do' Sung puS
luquchlu'mo', vaj qay'be' qevwI'. ghu'vam Qochbe'bej 'ej *rIyval*
mangghom muvmeH HeQqangqu'. wanI'vam'e' tungHa'meH pe'vIl ghar
'e' nab la', qeSghom je, ghaytan Qojbe'taHvIS. Qapla'vam ngeDmo'
veSjochaj choqlaH.
vengDaq *rIyval* gharghom je lujollu'DI', lIH'egh 'ej SIbI'
SutlhmeH chup. 'ach Do'Ha'; lalDanmo' mul: veS potlh jeStaHmeH
ratlhnIS. ben'a' puH'ay' toqchoHmoH cha' qempa''a' (*voSjajIn*,
*vorghgheHIy* je chaH). bIQ'a'Daq Qughmey tIn SIQchu'ta'mo', tev
lumoSQo'. qaStaHvIS ben, boghmoHqu' qorDu''a'chaj 'ej puH
moSQo'bogh veS'e' lutaH. yotwI' jIvvaD jegh'eghQo'mo' je, mev
gharqepqoq 'ej bIQ'a'HeH lulIgh'a'Daq chegh *rIyval*,
SuvwI'pu'Daj je. qa' Huj 'ej ghuS'egh.