tlhIngan-Hol Archive: Sat Aug 19 15:36:23 1995
[Date Prev][Date Next][Thread Prev][Thread Next]
}} chotlut - 'ay' wa'
- From: [email protected]
- Subject: }} chotlut - 'ay' wa'
- Date: Sat, 19 Aug 1995 15:36:23 -0400
chot qelbogh lutHom'e' vIghItlhlI'. tlhIHvaD 'ay' wa' vImuch. botIvjaj -
vItIvbej vIghItlhtaHvIS. wej mu' chu' tIghuH. margh to'nal HoSom je bIH
pong.
ngemDaq qet SuvwI'. 'avwI'pu' rur luDechbogh Sormey. vang 'e'
ra'chu'meH moch luloSlaw'. HoS bIH 'ej tam. HoS SuvwI' 'ej tam. tIDaq
vIHtaHbogh 'er'e' rut Qoy ghaH. 'ach So''eghchoH 'er law' 'e' Sov.
tlhuHHommey tlhap taghDu'chaj 'ej num vumtaHqu' tIqDu'chaj. tI QIbmeyvo'
lubejbejtaH 'e' Sov 'a bIH SaHbe'. 'ermey ghIjpu'bogh ghot'e' ghochlI'.
Qu'DajvaD tenpu'pa' SuvwI' DeSDu'Daq HeghlI'bogh vavoyDaj Dech. vavDaj
Heghmu'mey qawpu': margh...puqbe'oy...tugh jIHegh...jIchotlu'ta'...
vavoy, DuHIvta' 'Iv? petaQ pong ja'!
vIleghbe'...DubwIjDaq...muDuQ... QoylaHchu'be' pujmo' tlhuHDaj vaj
HuvmeH QIchDaj vavDaj nuj chol.
mu'meyDaj Qav jatlhta': qorDu' batlh...
vaj DaH chotwI' tlha'lI', batlh Hegh vavDaj 'e' chaw'be'bogh chotwI'.
nom ngemDaq qettaH ghaH 'ej nom 'aDDu'DajDaq qettaH 'IwDaj tuj. juSpu' wa'
rep 'ej DaH tlhuHlaHbe'. loQ pum 'oy'qu'mo' 'uSDu'Daj 'a SIbI' Hu' 'ej
yabDajDaq ghojmoHwI'Daj ghogh Qoy.
'oy' yISIQ...DoSlI' yIlegh...SoHDaq HoS yInej...
langchoH ngem 'ej yoS HuvDaq qach legh. vavDaj loDnI' juH 'oH. vavDaj
to'val qan law' loDnI'Daj HoSom qan puS. 'ach HoSom tIn law' to'val tIn puS.
tlhIngan latlhpu' DevmeH valbe'chu' HoSom 'a HoSchu' vavDaj loDnI'. Hem la'
HoSom rurbogh SuvwI''e' DevDI'. tInbe' vavDaj 'ej HoSbe'. DujDaj 'oH
HoS'a'Daj. DevwI'na' yab ghaj to'nal.
QuptaHDI' Suvpu' cha' loDnI'pu'. 'ach to'nal val law' HoSom val puS 'ej
reH latlh jeylaw' loDnI'Hom. not jupna' chaH 'a loD mojtaHvIS loDnI'pu'
vuvchuqchoH. cha' SuvwI' QupvaD qaSDI' nenghep boq HoS luchenmoHta'.
HoSomoy jach margh lojmItDaq qettaHvIS. HoSomoy...HIQaH...vavoy
chotlu'ta'...
gheyIl