tlhIngan-Hol Archive: Wed Nov 23 07:33:59 2011
[Date Prev][Date Next][Thread Prev][Thread Next]
[Tlhingan-hol] nuq bop bom: 'ay' HutmaH cha': <ghoqwI' Segh>
'eSSIm has just concluded that Mahoun is a spy, and that she will
find out his goal.
89
po veb, Qu'HommeyDaj ta'taHvIS 'eSSIm, wa' pogh chIllaw'pu' 'e' tu'.
Do'Ha' nIH poghDaj Qav 'oH 'ej wej pawpa' ngaq Duj. jInmolDajvaD
qaStaHvIS DIS wa'logh Such QI' net nab 'ach qaStaHvIS wa'maH jav
jarmey Suchta' pagh tlhIngan Duj. Sung Dochmey lo'choHta' 'eSSIm.
poghmey chenmoHlaHba' Sungpu'. boQDaj rI'meH QumwI' woH. ghIq yev 'ej
Mahoun Duj rI'. ghoqwI' tu'meH 'eb lo'. poghmey chu' qem Mahoun 'ej
pogh chIlpu'bogh tatlh je. pegh tu'ta' 'e' Harmo' Hem ghaH. ghoqwI'
tlhIb DataHvIS, tlhIb. QIpqu' 'eSSIm 'e' Har'a'? 'eSSIm nuQchoH.
SaHtaHvIS Mahoun, rI' QI'. mangvaD jatlh 'eSSIm, "ghoqwI' ghaH.
vIvoqbe'." DaH 'eSSIm voqchoHmoHmeH DISlaw' ghoqwI'Hey 'e' pIH. 'ach
chIDbe'. pagh peghmo' 'eSSIm, ghoq Mahoun 'e' SaHbe'. lInDab ngoQ
SovmoHmeH tlhejtaH, ja''egh, 'ach toj'eghbe'. SeychuqmoHmo'
tlhejchuq. voqchuqchu'be'mo' ghu' DajmoH. parmaq mojnISbe'. ghaytan
lengtaHvIS Mahoun, Hoch Hogh be' chu' wIv. tugh paw tlhIngan ngaq
Duj. DISvam may'Duj *veS* 'oHlaw'. Soj, luch, mangpu' Qup je qeng.
tlharghDuj *Dugh* Sam 'e' tul 'eSSIm. ngebchugh ngoDvetlh nepwI''a'
ghaH Mahoun'e' 'ej 'Ilbe'laH belDaj je.
tlhIngan wo' toj neHchugh, qatlh Sotlaw' Hujqu' qon? "nuq bop
bomvetlh?" jatlh 'eSSIm. bom mu'mey mughlaHbe'pu' De'wI'. ngoq
SamlaHbe' je. chaq nIS QoQ.
jatlh Mahoun, "qa'ja'pu'. bang bom 'oH. vIbomqa' DaneH'a'?"
"bomvetlh vIqelbe'. Sotlaw' bom." jatlh 'eSSIm.
"ghe'naQ bom 'oH je. noy'qu'. ghe'naQDaq Ha'DIbaHmey vong," jatlh
Mahoun. "DaH vIbom DaneH'a'?"
"yImugh," jatlh 'eSSIm.
"vImughlaHbe'," jatlh Mahoun "mu'mey puS vIghov. no' Hol 'oH.
vIyajbe'. wabmey vIqaw neH. HoSghajqu', qar'a'?" 'eSSIm jIb yachchoH.
Qochbe' 'eSSIm 'ach loQ qeH. bomDaj yajbe' Mahoun 'e' Harbe'. peghmeH
peghlaw'. jatlh 'eSSIm, "not mev peghmey," 'ach latlh qech qelchoH Mahoun.
"chopeghnIS, qar'a', tujoy?" jatlh. "DuQumDI' QI' choSo'.
luSovchoHchugh DanaDHa'lu''a'?"
ba'choH 'eSSIm 'ej Mahoun ghopDu'vo' jIb luH. QeHmoH mu'meyDaj. DaH
ghu' peghmeH DIlnIS 'eSSIm ja' 'e' pIH. ghoqwI' Seghvetlh quvHa' law'
Hoch quvHa' puS.
---
SKI: Mahoun doesn't know what the words of the song mean either.
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol