tlhIngan-Hol Archive: Fri Nov 04 12:13:01 2011
[Date Prev][Date Next][Thread Prev][Thread Next]
[Tlhingan-hol] vavwI' lut - lupwI'
jIQuptaHvIS malja' tInqu' toy' vavwI'.
puH Duj wab HevwI' 'ogh 'ej lIng.
laSvargh SeHbogh 'ej jIHbogh pat 'ogh 'ej lIng 'ej leH.
puH Duj yIntaghHom lIng.
nguSDI' SeHwI' pat 'ogh 'ej lIng.
loSmaH ben jInmol tagh.
jaS laSvargh jIHbogh pat lo' net nab.
lupwI' He jIHbogh pat moj.
wa' vengDaq patvam jom vavwI' ghom.
'op lupwI'Daq Se' bobcho' jomlu'.
He bIngDaq noch puS lujomlu'.
nochmey jIH De'wI'.
He retlhDaq lupwI' jey cha' De'wI'.
qaStaHvIS wa' jar vengvetlh Dab vavwI'.
qorDu'vo' Dach.
qID SoSwI'.
jatlh: jarvetlh qaStaHvIS cha' DIS "Rochester" Dab ghaH.
QaptaHvIS pat, De' lI' Hev raQpo'pu'.
ghorgh paw lupwI'mey veb?
jang pat.
nuqDaq ghoS lupwI'mey veb?
jang pat.
luparHa'bej raQpo'pu'.
Do'Ha'luj ngong.
motlh Qapchu' pat 'ach rut Qapbe'.
paw lupwI' 'ach ghuHpu'be' cha'wI' chIm.
qaStaHvIS jaj law' vum vavwI' ghom.
QaptaH De'wI'.
QaptaH nochmey.
lupwI' lIghtaHvIS vumwI' not luj pat.
lIghbe'taHvIS vumwI', rut luj.
tagha' meq lungu'.
pat lulajQo' lupwI' DeghwI'.
lujIHlu' luneHbe'.
lupwI' ghoch bobcho' 'e' Sov.
vaj rut bobcho' Qotlh DeghwI'.
jIv 'e' ghet 'op DeghwI' 'ach nep.
chIch bobcho' chu'Ha'taH 'e' luleghchu' 'op lIghwI'.
jInmol lon veng.
taH jInmol 'e' qapchugh, bep DeghwI'pu'.
DeghwI'pu' Sujchugh veng, noD DeghwI' boq.
noDmeH boq, lupwI'mey mevmoH.
mevchugh lupwI'mey, QuchHa'qu' raQpo'.
raQpo' QuchHa'moH neHbe'bej veng.
vaj jInmol lI' qIl.
jarvetlhmo' nobHom Hev vavwI'.
Bus stop sign 'oH.
DaHjaj juH wutlh pa' reDDaq HuStaH.
-- ghunchu'wI'
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol