tlhIngan-Hol Archive: Thu Feb 10 13:08:38 2011
[Date Prev][Date Next][Thread Prev][Thread Next]
qoqqoqmey - jaj wejmaH wej
- From: "ghunchu'wI' 'utlh" <[email protected]>
- Subject: qoqqoqmey - jaj wejmaH wej
- Date: Thu, 10 Feb 2011 16:06:21 -0500
DaHjaj 'ul pat ghorlu'.
qoqDaq Somraw' rur nguSDI'.
'Iw rur 'ul.
qoq tIq vIqelDI', wa' bobcho' vIngu'bej.
'oHDaq ghom Hoch 'ul qengwI'mey.
nguSDI' SeHwI'meyDaq Haw' qengwI'mey law'.
SoSbor lurIHmoH.
nochmey rIHmoH.
muD yuvwI' lurIHmoH.
HoS Halvo' paw qengwI' tIn.
mangongtaHvIS, HoS Hal 'ul qengwI' QIv wIlo'.
tIqHa'.
DaHjaj chuq 'ut lujuv ghojwI' boQwI' je.
qengwI' wIchenmoH baS SIrgh wIghajbej.
rarwI' le' wIghaj je.
'ach SIrgh me'ghanDaq 'er'InDaq je rarwI' wIlanmeH nuH wIHutlh.
rarwI' le' lanlaH malja' Sum.
vaj SIrgh, rarwI'mey, mI'mey je vItlhap 'ej malja' vIghoS.
pa' pe'vIl rarwI' 'uyqu' nuH vIngIpbogh.
tugh 'ul qengwI' pup vIghaj.
malja'Daq latlh luch wIpoQbogh vISuq.
qoqmaj chenmeH qachDaq jIchegh.
'ul qengwI'mey QIv teq ghojwI'.
qengwI'mey nIv jomchoH.
rarwI' Qav rartaHvIS, tlhoy QeymoH 'ej qoq tIq potlh'a' ghor.
Human "aorta" rur potlhvam.
ghorlu'DI', QaplaHbe' qoq tIq.
potlhvam tI'lu'be'.
Hu'tegh.
qoq ngo'vo' 'ul pat tIq wIteq.
qoq chu'Daq 'oH wIjom.
nom Saja' 'ach QIt qaS mIw.
qaStaHvIS cha' rep vumlI' beq.
Do' qa'meH ghorlu'be'.
mayeptaHvIS Hoch wItob.
maDo'qu' 'ej Qap Hoch.
qoq ngo' wIlaghpa' Hoch 'ul qengwI' per ghojwI'.
Daq chImDaq bobcho' Duy' vIjom 'e' vInID.
loQ bobcho' vIQapmoHlaH, 'ej qoq ngo' wIlo'laH.
va, mujba' permey.
SIrghmey toghlu'chugh, <qIj Doq qIj Doq qIj Doq> leghlu'.
'ach permey vItoghDI', <qIj Doq Doq qIj Doq qIj qIj Doq> vISam.
permey Hutlh cha' SIrghmey.
jInuDqu' 'ej jIQubqu' 'ej QIt Qaghmey vIyajchoH.
'ul qengwI' vIrarqa'moH.
qoq ngo'Daq Qaplaw' SeHmeH pat nguSDI'mey je.
mangongtaHmeH yap.
'ach not 'ovlaH tIqvam lo'taHbogh qoq'e'.
vIHqa' cha' qoqmey.
'ach poH natlhqu'pu' lotHom.
puSchoH Supvam.
qoq wIHIjnISpa' ratlh wa'maH wej jaj neH.
qach vImejtaHvIS, DeS jomruplaw' qoqpIn.
Qatlhqu' DeSvam.
SIchmeH mIw wIyajbe' jIH ghunwI' ghom je 'ach 'oH wIghun net pIH.
wa'leS chaq qoq naQ vIlegh.
-- ghunchu'wI'