tlhIngan-Hol Archive: Tue Feb 08 09:15:59 2011
[Date Prev][Date Next][Thread Prev][Thread Next]
qoqqoqmey - jaj cha'maH Hut
- From: "ghunchu'wI' 'utlh" <[email protected]>
- Subject: qoqqoqmey - jaj cha'maH Hut
- Date: Tue, 8 Feb 2011 12:12:04 -0500
DaHjaj vIHbe'taH qoq.
qaStaHvIS po vumqu' ghomHom.
tagha' rIn rutlh jImwI' choHmey.
qoqDaq 'oH jomqa'lu'pu'.
SeHrupchu' SeHwI' pat.
Qaprupchu' rutlh nguSDI' pat.
Qumrupchu' SoSbor.
raQlu' 'e' lajrupchu' SeHlaw.
'ach rInbe'taH wa' pat potlh.
mIrmey vIHmoHmeH nguSDI', HoS choHwI' DIngmoH.
QapmeH HoS choHwI', muD yuvwI' pat poQ.
QIt vum muD pat ghomHom.
muD 'ochmey jomlaHbe', mujmo' 'op rarwI'mey.
rarwI' lugh Sam, 'ach meghmo' vum 'e' lumev.
rInDI' megh, latlh Qu'Hom lubuSlaw' 'ej patvam potlh rInmoHbe'.
Sap vumqangqu'bogh latlhpu'.
QaHchaj lajHa' muD pag ghomHom 'ej vumqa'...law'.
qaStaHvIS jaj Hoch ratlh rarwI'mey muj.
moghbej nuv law'.
'ach Seng'a'vam ram law' ghu' chu' ram puS.
latlh choH 'ut tu' qoqpIn.
DeS levmeH 'ej ngolmeH, bobcho' Qatlh 'oghta' qoqpIn.
nguSDI'Daq mIr lo', 'ej DeS volchaHDaq SIrgh langqu' lo'.
volchaH 'ay' HotlaHbe' mIr.
qaSchugh, volchaH botlh nan mIr 'ej gheghmoH 'ej QapHa'moH.
Do'Ha' tlhoy Sum volchaH nguSDI', 'ej nISlaH mIr.
ghIrnIS nguSDI' 'e' wIv qoqpIn.
Do'Ha' Daqvetlh DantaH SoSbor.
Seng rap ghaj latlh DeS nguSDI' 'ej Daq 'ut DantaH muD yuvwI'.
tIn Dochmeyvam 'ej 'ugh.
bIH vIHlu'meH, bobcho'mey law' Daqmey luchoHnISlu'.
qaStaHvIS wa' rep maja'chuq jIH qoqpIn je.
maja'chuqpa' Seng vIyajbe'.
nom SengHey vIlaj 'ach tI'meH nab vIyajbe'taH.
jIngachmo' QeHchoH qoqpIn.
tagha' vIt vItlhoj.
ghIrnISbe' nguSDI''e'.
ghIrnIS mIr tlhe'moHwI' neH.
HoS choHwI' wIngollaH.
ratlh nguSDI' 'ej latlh bobcho' nISchoHbe'.
SoSbor yuvwI' je jojDaq HuS HoS choHwI'.
ngong qoqpIn.
QutlhwI' chu' chenmoH.
pay' Quchqu' 'ej jach.
muja' wIgh SoH.
wIghqoq moghqu' jIH.
vIH qoq vIneHqu'.
jImejpa' vIHbe'.
qoq wIrInmoHmeH ratlh cha' Hogh neH.
jItultaH 'e' vIngIlbe'.
-- ghunchu'wI'