tlhIngan-Hol Archive: Wed Dec 21 10:12:24 2011
[Date Prev][Date Next][Thread Prev][Thread Next]
Re: [Tlhingan-hol] muchmey Dun, lutmey Dun
loDnalwI'vaD lut vImughDI', jatlh <vInaD>.
At 13:22 20/12/2011, ghunchu'wI' 'utlh wrote:
wa' ben «ram nI' lop bom» much vItIv. vIparHa'mo' vIbejqa' vIneH.
vIbej vIneH je 'ach wa' much vIbejmeH Minnesota
Chicago ghap vIghoSchugh jImaw', qar'a'?
qorDu'wIj tlhej latlh 'e' vIchup.
ghIq jImaw'taH 'e' vIqawmo', vaj ...
qech laj Qov.
cha'Hu' SaqDI' muD Duj lIghbogh wIghom jIH puqloDwI'
muD Duj verghDaq muqIHDI' ghunchu'wI' puqloD
jatlh <bIpawneS>. not mu'vetlh vIQoypu' 'e' vIqaw
'ach SIbI' vIyajchu'. muQuchmoH.
machqu' Qov tep. lengwI' po' ghaH.
jIbuDmo' Sutmey puS jIwIvpu' neH. jIghIQmo' muD
Duj 'aH vIqengnISbe' 'ej nabchu'ta'mo'
ghunchu'wI', muD Dotlh vIpIHlaHbogh vISov.
ngengDaq vIpumpu'chugh Sutmey vIngIpnIS.
juHDaq mapawpa' nutlhej be'nalwI' 'ej wovmoHwI'mey law' DIleghmeH maghoSchoH.
DoHa'wI'pu'vaD Huch boSmeH, Ha'DIbaHmey, qachmey,
wIchmey je chenmoHmeH wovmoHwI'mey lo'lu'ta'.
lung'a' chenmoHta' SIp malja'. choHtaHvIS
wewbogh wovmoHwI'mey, SIHlaw' mongDech 'ej
tlhe''egh nach ghIq pay' qul rech lung'a'! meQ SIp.
ghIq juH wIghoSqa' 'ej tlhIq wI'ep.
'ey'qu'. qe'rot 'oQqarmey So'ta' vutwI' 'ach DISamta'.
po mavem 'ej barghchab beQ vIvut. wa' chab vIyoymoHmeH bargh vIjImmoH
'ej vIpuvmoH. Qapla'! barghDaq Saqchu' chab yoy.
Do'Ha' vIqon 'e' vInop.
veng tu'HomI'raHmey legh Qov 'e' vIraD. ben law'qu' Sor tInqu'
pe'lu'pu', 'ej ratlh 'uj'a' 'aDbogh 'ay'. bey qachDaq 'ay'vam 'anglu'.
tangqa' tInqu' 'anglu' je.
tIqmo' Daj 'ach wa'vatlh ben choqlu'mo' Doj.
ghIq "Kokomo ta'Hom" van'a' wISuch.
vIHtaHmo' bIQtIq, mol yotlh yotchoH vaj yaHta'
molmey. ratlh van'a'. chenmoHmeH mol naghmey lu'lo'lu'ta'.
qoq Qulpa' wISuch je. IndianaDaq 'ovmeH DuSaQmey
qoqmey 'ogh. 'ul malja' qachDaq qoqmey law' vIleghpu'.
nom naHmey, tIr gho je DISop.
mu'tlheghvam vImughtaHvIS loDnalwI' jIjatlh "we
ate grain circles." jImIS. Soj vIqawbe'. jatlh
loDnalwI', "Sounds like bagels." lugh ghaH.
ghIq Hoqmaj wItagh. qetlh leng 'ach Daj ja'chuqghachmaj. qaStaHvIS wej
rep maghoS.
vIt jIja'laH. beQ Indiana 'ej qen SoDmo' ngengHom
law' lutu'lu'. meyIS tIr yotlhmey law' lutu'lu' je 'ach jIpawpa' yoblu'pu'.
'ey'qu' 'e' vIQub jIH. Qov QuchmoHbe'law'.
qabbe' 'ach noy Chicago pItSa' chab 'e' qotlhbe'.
Sunday maleS. lengbogh juHHom vI'agh. megh vIqaw 'ej ray' tIr chatlh
wI'ep.
not ray' tIr chatlh vI'eppu'. 'ey'. tIrmey Sar ngaS.
chaq tlhoy 'eq pawDI'
teHbe'. muHotlhDI' Hung jorlaHbogh Hap
tu'law'pu'mo' munuDqu'nIS 'ej poH natlh. chaq 'ul
malja' qachDaq jorbogh Hap tu'lu'.
jIghItlh 'e' vImevbe'chugh, QIn tIn laDqang pagh.
jabbI'ID pItlh
QIn nI' yIlaDvIpQo', laDwI'pu'. DaH lut 'ay'wIj vIlabnIS.
- Qov
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol
![[KLI Member]](/pics/KLImemberbutton.gif "[KLI Member]"){kind=small}
![[Hol po'wI']](/pics/level3_big.png "[Hol po'wI']"){kind=small}