tlhIngan-Hol Archive: Wed Jan 07 11:19:27 2009

Back to archive top level

To this year's listing



[Date Prev][Date Next][Thread Prev][Thread Next]

Heghpu' SoSwI'

Doq (doq@embarqmail.com)



qaStaHvIS DISmey, HeghlI' SoSwI'. cha'maH Soch Hu' Hegh SoSwI'.

QIt luj yabDaj. yItlaH, ghIq Qutlhlu'chugh, yItlaH, ghIq rutlhquSDaq  
reH ba'. pIj rutlhquSvo' pum.

cha' wen, pumDI' qabDaj Qanbe' SoSwI'. reghqu' ghIchDaj. ghIchmo', nuj  
teb 'IwDaj. ghIq QaDchoH. ghIchDaq *tube*meymo' tlhuHlaHtaH.

vISuchtaHvIS nujDaj HuvchoHmoH cha' rachwI'. ghIq vIje'. puq je'bogh  
vav 'e' vIrur.

tlhoy tInqu'mo' qabDaj Hap tun SoQchu' wa' mInDaj. loQ poS latlh. qab  
yInbogh rurbe' SoSwI' qab. Human rurbe'.

QIt pIvchoH SoSwI', 'ach not pIvba'.

not pumqa'laHmeH loQ SoSwI' QotmoH rutlhquS le'. puch lo'laHbe'.  
Say'moH latlh.

vISuchqa'DI', tlhuH neH. poStaH mInDu'. loQ DoSvaD Qeq mInDu', 'ach  
Qeqchu'be'. HomDu' rur porghDaj. DopDajDaq Qot. vIHbe'.

ghuplaHbe'mo' jaj veb Hegh.

SoSwI' yInmoHtaH Qel neHbe' SoSwI'. Hegh 'e' chaw' 'e' maS.

Heghtay che' be'nI'wI'. SoSma' qaw. qawmeH Hoch, lutmey ja'. yInDaj  
naQ Del.

QaQ Heghtayvam.

lojchoHmeH lomDaj, qulDaq lan. balDaq chuvmeyDaj lanlu'. bIrbe'choHDI'  
nem'ay', vavwI' mol DopDaq SoSwI' bal mollu'.

pItlh.

Doq





Back to archive top level