tlhIngan-Hol Archive: Mon Oct 13 15:44:40 2003
[Date Prev][Date Next][Thread Prev][Thread Next]
Iraq be'Hom QonoS - 'ay' cha'
- From: "clayton.rodrigo" <[email protected]>
- Subject: Iraq be'Hom QonoS - 'ay' cha'
- Date: Mon, 13 Oct 2003 20:45:27 +0000
Soj vISuqmeH jIvumnIS
DIS cha'SaD wej, jar chorgh, jaj cha'maH loS
(Hogh jaj wa'DIch)
vumbe' javmaH vagh vatlhvI' Iraq roghvaH. tlhoy qabbogh
'op ta'mey ta'mo' Bremer. Iraq mangghom Sang 'e' 'oH
ta''a' wa'DIch. chaq meq tu'lu' net Washinton-Daq Har,
'ach naDev numerchu' ta'vetlh. DaH nuHmey ghajbogh loSbIp
loDpu' po' lutu'lu'. SopnISbogh qorDu'meychaj. nuq lujaH
net pIH? yInmeH nuq luta' net pIH? jISovbe'. luSovbe'bej.
vum 'e' lutaghmeH HemeyDaq lenglI' chaH. chaHvaD janglu'
luneH. QamtaHvIS 'ej qIttaHvIs 'ej DataHvIS, mer 'ej QeH
chaH net tu'. meq lunejtaHvIS pIm mInDu'chaj. mISbogh
ghu'vamvaD ngoy' 'Iv? ngoy' 'Iv 'e' DaHar?
De' Ministry, Hub Ministry je Sang je Bremer. Qu'mey
motlh ghajbogh law'qu' bogh nuvpu' motlh'e' ngaS
Ministry-meyvam 'ej meqqoqDajmo' jISaHbe'. chelwI'pu',
Say'moHwI'pu', boQwI'pu', jonwI'pu', QonoS qonwI'pu',
chamwI'pu, SeHwI'pu' je lutu'lu'. DaH vumbe' nuvpu'vam.
beqchaj lunupmoH yaHmey net tlhob. woQ 'oHbe' meq'e'.
yaHDaq vum jonwI' ghaHbogh tennuSwI''e'. pa' vum wa'SaD
vaghvatlh nuvpu'. javvatlh chorghmaH vumwI'pu' mejmoH
yaHvam 'e' tlhob CPA. jonwI'pu', nabwI'pu',
chenmoHwI'pu', jo' SeHwI'pu', loHwI'pu' je chaH.
qaSpu'DI' noH, mIS'a' tu'lu'. nIHlu'mo' 'ej Qaw'lu'mo',
Qapbe'choH latlh yaHmey, malja'mey, tummey, laSvarghmey
je. vumbe'choH SanIDmey latlh vumwI'. nuq lujaH net pIH?
nuq luta' net pIH?
vumtaHbogh nuvpu'vaD ngeDbe' je Qu'. Sarbogh
Ministry-meyDaq, Sarbogh ropyaHmeyDaq je, $50 lunoblu'.
wa' nuv yIn DIlmeH yapbe'. wa' qorDu' yIn DIlmeH tlhoy
DuHHa'. povbe' ghu' 'ach vumlu'. Hoch po vem 'ej vay'
ta'meH meq tu'lu'.
ghellu', <qatlh Qu' nejbe' 'ej vumchoHbe' HemeyDaq
lengtaHbogh Iraq loDpu'vam law'?> jatlhlu'. Iraq
Danlu'ta'DI', qaStaHvIS Hogh law', Hoch jaj, 'Alwiyah
Club' HurDaq, chen SanIDmey loDpu' lungaSbogh Human
tlhegh. Qu'mey tlhobmeH, navmeyDaq ghItlhqa'lI'. 'ach
Qu'mey lutu'be'lu'. Iraq Hung lumuvqangbe' loDpu',
chaHvaD nuHmey lunobbe'lu'mo'! lengmeH 'ej vengmey mIS
'avmeH Iraq Hung, nuHmey lo'be' net pIH. vang nIHwI'pu',
quchwI'pu', HoHwI'pu' 'e' lubotmeH, mISbogh ghob vuvchaj
luqel neH net pIH.
Qu'wIj vIHutlhchoHmeH ghu' vIDelDI', motlhHa'be' lut.
tlhoy motlhchoH 'e' 'oH vIt'e'. 'ej motlhmo', 'ItchoH 'ej
tulHa'choH nuvpu'. ghu'vam SIQlaH pagh. DaH lut vIDellI'.
De'wI' QeD vIHaD rIntaH. qaSpa' noH, qawHaq, ghuntaHghach
je yaHDaq jIvum. Baghdad-Daq 'oH. jIghunlI' 'ej De'wI'mey
patmey vIloH (HIja', jImotlhbe'). Hoch jaj, roD wej
letlhDaq jISal, pa' mach vI'el (pa'vamDaq vum je wa' be',
cha' loDpu' je), De'wI'wIj vIchu' 'ej qaStaHvIS repmey
law' jIHDaq machbogh mI'mey, ghItlhHommey vIbuS. Dal 'ej
Doy'qu'moH 'ej motlhbe' 'ej... Dun.
'utDI' lenHom, roD internet-Daq Quv vIparHa'qu'bogh
vISuch qoj juppu'wI' vInuQ qoj "pInpu' DuHHa'",
"DuHHa'law'bogh Qu'mey DIta'ta'meH poHmey'e'" joq vIDel.
Qu'wIj vImuSHa'. jIvumDI', jIpo'qu'. nIteb yaHwIjDaq,
yaHwIjvo' je jIghoS. Bill Gates vIHemmoHmeH, chorgh rep
po, jIyIttaHvIS, roD DubwIjDaq yapbogh CD-mey,
floppy-mey, paqmey, ghItlhwI'mey vIyIvpu'bogh, mavjopmey,
screwdriver-mey je vIqeng. nIb Huch vIbajbogh, Huch
lubajbogh cha' juppu'wI' je. loDpu' chaH. chaH jIH je
nuvuv vu'wI' 'ej nIb vuvtaHghach. (De'wI' QeD Sovbe'chu'
'ej ghunlaHbe'chu' 'ej luvuvlu' 'e' luqotlh ghunlaHbogh
Hoch nuvpu' 'e' 'oH meq'e'. be'Hom ghaHchugh je. bIyaj
'e' vIHar.)
ngoDmey vIQIj 'e' vInIDbogh vIDel. De' Qoylu'bogh
yIqelHa'. Iraq be'pu'vaD nIvqu' ghu', latlh Arab Sepmey
luqellu'chugh. ('op 'ev puHmey luqellu'chugh je. Huch nIb
wIbaj!) vumbogh qellu'chugh, vaghmaH vatlhvI' maH.
Qelpu', lawyer-pu', ghojmoqpu', loHwI'pu', qach
nabwI'pu', ghunwI'pu', latlh je maH. wIneHDI' reH
majaHlaH 'ej reH mamejlaH. Sutmey DItuQ DIneHbogh DItuQ.
('ach lurDech pabbogh nughmaj'e' veHmey DIvuv.)
qaStaHvIS jar javDIch Hoch wa'DIch, Qapqa' yaHwIj 'e'
vISovchoH. qaSpu' repmey law', SanIDmey rurbogh qorDu'
qepmey'e' je, 'ach jImaw'choHbe'meH jIvumnISqa' 'e' luyaj
Hoch nuvpu' 'e' tagha' vIqaSmoH rIntaH. jIghelmeH,
jIjatlh <juHDaq Qu' vIta'laHbogh tu'lu''a'? vIta'ta'DI'
vIqem pagh vIngeHmeH internet vIlo'>, yaH vISuch
(mutlhejchugh cha' QanwI'pu'wI') 'e' luchaw'.
qaStaHvIS jar javDIch, motlhbe'bogh 'aHwIj vIqat,
yIvbeHwIj tIq vItuQchoH, jIbwIj vIbagh 'ej juH vImej.
qaStaHvIS poH rap, jIpIHqu' 'ej jIHaj.
yavDujvo' mamejDI', yaH lojmItDaq Hop. wejmaH
'uj'a'meyDaq mayItnIS. yaH tlhop He'a' lughor 'ej luQaw'
America QI' yavDujmey 'ugh, Baghdad 'elDI'. loQ jIqet,
loQ yIt. juppu', vumwI'pu', boQwI'pu' je vIlegh tlhoy
vIneHmo' nom chuS tIqwIj. ghu'vam Do'Ha'qu' Huj je
wInongtaHvIS, jIHvaD motlhbogh vay' vIlegh vIneH.
lojmIt vIveghDI', vItu'. ngo'law' Hoch 'ej loQ 'IQlaw'.
lam 'ej Qop chobmey carpet Doq. qetbogh 'ej lugho'bogh
wa'SaD qamDu' luQublu' 'e' qaSmoH carpet. qaSpa' noH,
Qorwaghmey DIlanchu'ta' 'ej DaH 'op 'ay'mey lughorlu'pu'
'ej latlh 'ay'mey luQaw'lu'pu'. Dat lam tu'lu'.
wovmoHwI'mey lughorlu'pu' je 'ej raSmey lupummoHlu'pu'
'ej lojmItmey lupuplu'pu' 'ej tlhoy'meyvo' tlhaqmey
luteqlu'pu'.
qaStaHvIS 'op poH, lojmIt tlhopDaq jIQam 'ej jImIS.
qabDu' nov lutu'lu'. qabDu' puS vISovbogh lutu'lu'. pa'
Qam 'ej leghchuq Hoch. 'IQlaw' 'ej pujlaw' 'ej Doy'law'
qabDu'. be'pu' puS lutu'lu' 'ej wa' jIH. mIS Huj vIvegh
'ej letlhDaq jISal. qaStaHvIS wa' tup, rav cha'DIchDaq
jImev. pa' bIH vu'meH pa'mey'e'. HoSchoHbogh loDpu'
ghoghmey vIQoylaH. qaStaHvIS noH Hogh cha'DIch, Hegh
loHwI', QoghIjDajDaq reghpu'mo' 'aDmey, 'ej vaj woQ
loghHom chIm tu'lu'. pIn lumojbeH 'e' luHar cha'maH
loDpu'. po'mo' lumojbeH 'e' luHar 'op. patlh potlh
lughajmo' luHar latlh. 'ej chaH luQutlhmo' woQ tlhach
(SCIRI, Al-Daawa, INC), luHar latlh.
jISaltaH. qaStaHvIS cha' jar, 'ul Hevpu'be' qach 'ej
ghu'vammo' tlhoy tuj. 'ach jIlImmo' taD HomDu'wIj. qach
chuvmey luqellu'chugh, nIvbe' pa'wIj mach ghu'. raSmey
Hutlh 'ej Dat navmey lutu'lu'. 'ach pa' ghaHtaH "A"-'e'!
vIHarlaHbe'. qab vaQHa' vISovbogh tu'lu'. lurghwIjDaq
mInDu'Daj lan 'ach muleghqu'be'. ngugh poSqu'choH
mInDu'Daj 'ej pay' ghaH mer ghu' 'ej qabDaj choHmoH.
jIyIntaHmo' muHoy', qorDu'wIj De' tlhob 'ej jatlh.
<qaSpu'DI' DaHjaj, naDev vIcheghbe'.> ghaHvaD, juHDaq
jIvummeH 'ej jInmolmey vIngeHmeH nabwIj vIjatlh. ghIq
'IQchoH 'ej nachDaj joqmoH.
qaStaHvIS 'op tup, pa'wIjDaq mIS vIbuS, QoghIjwIjDaq ghu'
vImISHa'moH 'e' vInIDtaHvIS 'ej pIgh mojtaHvIS tIqwIj.
bIngDaq muloStaH vInwI', "E" je. tlhoy vIta'meH Qu'
tu'be'lu'. jIghel, jIjatlh <chay' chaq jIQaHlaH?> 'e' 'oH
Hoch'e' vIta'laHbogh. pa' wImej "A", jIH je 'ej letlhDaq
maghIrchoH. qaSchoHpa' noH 'ay' loHwI' ghaHbogh wa'
loD'e' wIja'meH rav cha'DIch mamev. jIghel, jIjatlh
<ghorgh Qapqa' naDev Hoch 'e' boHar?> 'ach choleghQo'.
"A" qab lurghDaq bIHtaH mInDu'Daj'e' muja'DI' <qaStaHvIS
poHvam, be'pu' DIlajbe'taH 'ej be'pu''e' luQanlaHbogh
pagh DIlajbe'qu'taH>. tagha' lurghwIjDaq tlhe''egh 'ej
jatlh <SoHvaD qaSchugh vay' Do'Ha' mangoy'be'mo', juH
yIchegh.>
lu'. maj. bIDo' SoH. jItlhe''egh, letlhDaq bIng vIjaH 'ej
"E" vInwI' je vISam. pay' Hujbe'choH qabDu'. qabDu' rap
bIH, 'ach jIjQo'ghach vIHarlaHbe'bogh tu'lu'. naDev nuq
'oH Qu'wIj'e'? buQqanglaw' "E" vInwI' je. ghaytan
jI'Itqu'law'. yaHvo' nom muteq 'ej yavDujDaq mulan.
yaHvam 'oH jIvummeH Daq wa'DIch. juH wIcheghtaHvIS,
jISaQtaH 'ej jIlIm. Qu'wIjmo' jISaQtaH 'ej pIqwIjmo'
jISaQtaH 'ej Hemey luQaw'lu'pu'mo' 'ej qachmey
luQIHlu'pu' 'ej raghtaHmo' nuvpu' jISaQtaH je.
nuv Do' jIH. jIpotlhbe'. jI'utbe'. povqu'bogh 'ul jonwI'
ghaH Henna Aziz-'e'. ghaH val law' HochHom be'pu' val
puS. wa' wen, qorDu'Daj tlhopDaq ghaH HoHlu'. HoHDaj
lulegh cha' be'nI'pu'Daj, loDnalDaj je. lubuQ 'op Badir
mangghom lalDan ngotlhwI'pu' 'ej luja' <be' SoHmo',
juHDaq yIratlh. woQ Daghaj net chaw'be'>. lajQo' ghaH.
janmey luQapmoHmeH puH, 'ut po'qu'ghachDaj Dun. juHDaq
ratlhQo'. juHDaq ratlhlaHbe'. yInDaj HutlhchoH. be'
wa'DIch ghaHbe'. be' HochDIch ghaHbe'.
qonwI': Iraq botlh Dabbogh puqHom'e'
Quv: [email protected]
QonoS: http://riverbendblog.blogspot.com
mughwI': Clayton Rodrigo Cardoso
ICQ: 14972249
Quv: [email protected]