tlhIngan-Hol Archive: Sat Aug 09 02:37:43 2003
[Date Prev][Date Next][Thread Prev][Thread Next]
New Zealand vISuch
- From: [email protected]
- Subject: New Zealand vISuch
- Date: Sat, 09 Aug 2003 03:34:44 -0400 (EDT)
- User-Agent: IMP/PHP IMAP webmail program 2.2.6
New Zealand vIghoSchoH.
juH vImejDI' SISbe'.
muDDuj vergh vIpawDI' SISqu' jay'. tlhoy jIyIQchoH. jIyIQchu'. yIQchoH je
tepwIj. yIQ jey navwIj. muD yIQ law' ngeng yIQ puS. vergh vI'el, qaS wa'maH
tup, SISbe'choH. va.
ghay'cha'! DaH jevmo' paS muDDuj! muDDuj cha'DIch wejDIch je vItIjlaH 'e'
vItul.
jIlengtaHvIS lut'a' vIbejlaH. jImejpa', juHDaq, VCRvo' lut'a' vIqon. [jajlo'
Doq] vIqon, 'ej ta vImachmoH; polmeH yap 256MB CompactFlash, vaj vIbejmeH
PocketPCwIj vIlo'. (Qu'vam ta''a' toch lo'wI'pu'?) :P 'ej qaStaHvIS vagh
rep QoQ vIQoylaH 'ej pIm Hoch bom.
boy'qu' muDDuj wa'DIch. Hoch quS luba'lu'. jInoghlaHbe'.
QaDchoH SutwIj.
'oy'! paSmo' muDDuj wa'DIch 'ej muDDuj cha'DIch vItIjmeH chuq tIqDaq nom
jIqetnIS. 'oy' taghwIj HughwIj je. tlhoy QaD HughwIj. loQ jItlhov.
LAX vIpaw. jItughnISbe'. jIleSlaH. qaStaHvIS vaghmaH tup neH jIloSnIS.
(qaStaHvIS wejmaH tup lojmIt vIghoS; vaj chorghmaH tup 'oH poH naQ'e'.) DaH
cha'logh Qoylu'. jIDoy'. QIt jIghItlhtaH. jIghung.
qaStaHvIS wa'maH cha' rep puv muDDuj wejDIch. qaSpu'DI' rep puS lut'a'
muchchoH muDDuj; jIQongchoH. qaStaHvIS rep law' jIQong... 'e' vIQub, 'ach
lut'a' rap muchlu', vaj qaSbe' cha' rep. va.
tagha' NZ vIpaw. loQ bIr. naDev juH tujmoHwI' tu'be'lu'. bIr qoD. bIrqu'
puch!
pIm nughvam. naDev toch De'wI'wIj DIllu'meH cha'SaD DeQ poQlu'. yavDuj
vIngIpbogh vI'ortaHvIS voQwI' vIruQnIS. naDev yIn Daj.
naDev yavDuj mach law' US yavDuj mach puS. law' BMW LandRover je.
DSL ghajlu'be'. 28.8 lo' De'wI' vIngIpbogh.
(more later)
DloraH
![[KLI Member]](/pics/KLImemberbutton.gif "[KLI Member]"){kind=small}
![[Hol po'wI']](/pics/level3_big.png "[Hol po'wI']"){kind=small}