tlhIngan-Hol Archive: Tue Oct 29 23:53:40 2002
[Date Prev][Date Next][Thread Prev][Thread Next]
cha' qo'mey pIm 'ay' Soch (chu' 'ej Qav)
- From: [email protected]
- Subject: cha' qo'mey pIm 'ay' Soch (chu' 'ej Qav)
- Date: Wed, 30 Oct 2002 00:54:25 EST
Here is the final chapter, Chapter Seven, of Leo P. Kelley's "Worlds Apart"
jorneb
nagh tut chenmoHpu'bogh bI'raQ juSmeH ghaH, yIt. jach, jatlh, <<
vISamta'.>>
ghaHvaD ghel qara, jatlh, <<nuq DaSamta'?>>
‘uDHIchDaj pep ‘ej qaravaD jatlh, <<HIchwIj. DaH cha' DIghaj. HIchlIj
HIchwIj je bIH.>>
jatlh leQ, <<latlh qech vIQub. bI'raQ, jIHvaD HIchlIj yInob!>>
nobbe' bI'raQ. ‘ach leQ bejtaH, jatlh, <<HIch Dalo'laHbe'.>>
<<lo'meH mIw ghojmoH qara. DaH HInob!>>
qechDaj QIjtaHvIS leQ, ‘Ij bI'raQ qara je. qechvam par, ja' bI'raQ. ‘
ach QaQ qechvam ‘e' laj qara.
bI'raQvaD jatlh qara, <<lugh leQ ‘e' vIQub. qo'maj yIchegh! naDev
maratlh leQ jIH je. pa' QaH DaSuqtaHvIS, Hov jav lu'elbe' Deppu'vam ‘e'
wIraD. SuH, bI'raQ, leQvaD HIchlIj yInob! lo'meH mIw vI'ang. loghbeq
QumwI'wIj yItlhap! qo'maj Da'elpu'DI', wIQaHlu'meH yIrI'!>>
jatlh leQ, <<nutlha'chugh Deppu', ngugh bachrupbej beq.>>
jatlh bI'raQ, <<qechvam vIpartaH. leQ, wIQaHlu'meH, Hov jav
Dacheghchugh, vaj QaQlaw'.>>
bI'raQDaq ghoS leQ. pe'vIlHa' jatlh, <<qara vImejqa' vIneHbe'bej. wa'
tup jImejbe'.>>
ghaH bej bI'raQ. ghIq HIchDaj nob. jatlh, <<Qapla'! tugh jIchegh.>>
bI'raQ HIch Hev leQ, ghIq vIHchoH bI'raQ. pay' leghlaHbe'. mej bI'raQ ‘
e' luleghDI' chalDaq chaHtaHbogh Deppu', qara lurgh leQ lurgh je ghIrmeH puv.
nom leQvaD bI'raQ ‘uDHIch lo'meH mIw ‘angchu' qara. ghIq Deppu' bach cha'
ghotpu'vam. wa' mup leQ nIch. HoHbe', ‘ach QIDbej. puv ‘ej mej. ‘ach
mejbe' chuv. DungDaq puvtaH chaH.
jatlh qara, <<DaH DImuplaHbe'; tlhoy jen chaH.>>
jatlh leQ, <<QaQba'. pa' ratlh Hoch ‘e' vItul.>>
‘ach ratlhbe' chaH. qara leQ je juS ‘ej Hov jav lu'el ‘e' lunID. lu'el
‘e' lubot qara leQ je. ghIq mIw chu' lulo'choH Deppu'. leQDaq puv HochHom ‘
ej qaraDaq puv HochHom pIm.
jach leQ, jatlh, <<nujon ‘e' lunID. nujonlaHchugh Deppu' puS ‘ej
naDevvo' puvlaHchugh, vaj qo'maj lu'elbogh ‘eb Huv lughaj. yIyep!>>
HIvDI' Deppu', run'eghmoH qara. qabDaj lungeQ wa' Dep telDu'. ‘ach qara
jonbe' Dep. Do'Ha' leQ. ghaH jon wa' Dep ‘ej puv ‘ej mejchoH. qaSDI'
wanI'vam, HIch chagh leQ. nom woH qara. leQ jonta'bogh Dep bachmeH qara,
cha' HIchmey laQ. cha'logh mup. pumtaHvIS Dep, leQ ‘uchHa'. mej Deppu'
chuv. Hu'qa' leQ. ghaHvaD bI'raQ HIch nobqa' qara.
chal bejtaHvIS qara, ghel, jatlh, <<chay' nI'taHvIS wej chegh bI'raQ?>>
pay' jatlh leQ, <<yIyep! HIvqa' Deppu'.>>
nagh tut ‘emDaq joD leQ qara je. Deppu' bachbeH HIchmeychaj. DaH chaH
jon Deppu' ‘e' lunIDbe'. jatlh qara, <<bI'raQ nagh Hevo' naghmey tIn woH
Deppu'.>>
jatlh leQ, <<'ej nabchaj vISov. maHDaq naghmey chagh Deppu'. ghuy'cha'!>
>
jatlh qara, <<majunmeH DuH wIghajbe'.>>
qaraDaq leQDaq je jev naghmey ‘ugh. nachDu'chaj QanmeH cha' ghotpu',
DeSDu'chaj lo'. ‘ach chaH mup ‘op naghmey. qara qab muppu'DI' wa' nagh,
nargh ‘Iw. wejlogh vaghlogh je Deppu' bach leQ. mup puSbogh nIch neH. ‘
ach pum wa' Dep ‘e' tu' leQ. bachqa'rup ghaH. ‘ach bachlaHpa', ghaHDaq
nagh tIn chagh Dep. leQ nach mup nagh; vaj yavDaq pum leQ. vulHa'choHpu'
leQ ‘e' tu' qara. HIchDaj tlhap. nIteb Deppu' ‘omlaHbe' ‘e' Sov. qo'vam
Hujvo' tlheDnIS ‘e' Sov.
leQ vemmoH ‘e' nID. ‘ach vIHbe' leQ. wa' DuH neH ghajtaH qara. Dat
ghaH retlhDaq pumtaHvIS naghmey, yavDaq leQ luHlI'. qara mup wa' nagh.
tlhoS pum ghaH. ‘ach pay' vengchajDaq chaHqa' leQ'e' qara'e' je.
DaH vengDaq meQtaHbe' pIq law' mejtaHvIS chaH meQpu'bogh qulmey'e'. DI
lubI' ghotpu' ‘e' tu' qara. chaHvaD jach ghaH. Qan'egh chaH, ja'.
Hov jav lu'elmeH Deppu' law', puv. leghDI' ghotpu', jachchoH ‘ej
qetchoH. HIchmey ‘uchtaHvIS ghopDu'Daj, Deppu' bach qara. puv ‘ej mej wa'
Dep. ‘ach wa' be' woH latlh. be'vam ‘uchtaHvIS mejchoH. yavDaq SumtaHvIS
Depvam, bach qara. be' ‘uchtaHvIS, pum Dep. Hu' be' ‘ej qet. ghIq
chollI'bogh yavDungDuj wab Qoy qara. pawDI', yongHa' beqpu' law'. HIchmey ‘
uch Hoch. ‘ej latlh 'uch. ngaSwI'mey bIH.
yavDungDujvo' Sup bI'raQ ‘ej qara lurgh qet. jatlh, <<nI'mo' jIcheghmeH
poH, jItlhIj. ‘ach Qapbe' QumwI'lIj. chaq qaStaHvIS poH naQ, ghorlu'.
bIjatlh, QumwI' Dalo' 'ach qo' pImvo' vay' DarI'laHbe'. cha' qo'meyDaq
Qapbe' QumwI' ‘e' DaQub. ‘ach meqvam qelbe' wanI'. Qapbe' QumwI'lIj.>>
jatlhtaHvIS bI'raQ, telDu' ghajbogh Deppu' bachtaH bI'raQ lutlhejbogh
yaSpu'.
jatlhqa' bIraQ, <<Qapbe' QumwI'lIj ‘e' vItu'DI', yaHmaj vIghoSmeH jIqet.
pa' nuQaHbogh ghotpu' vISam; ngugh la'vaD qaSpu'bogh wanI'maj vIQIj. qech ‘
ogh ghaH. qechvam lutob tejpu'ma' ‘e' ra' ghaH. ghIq jIvangmeH mIw ra'.
naDev jIcheghlaHpa', Dochmey vISuqnIS.>>
loQ vIH yavDaq QottaHbogh leQ. ghaH retlhDaq tor qara, jatlh, <<leQ!>>
mInDu' poSmoH leQ, jatlh, <<macheghta''a'?>>
jatlh qara, <<macheghta'. ‘ach nutlhej je Deppu'.>>
bachtaH yaSpu'. qo'chaj lucheghmeH ‘op Deppu', puv.
jatlh bI'raQ, <<Qu' vIchavnIS. qachvetlhDaq peQan'eghmoH!>>
Hu' leQ. qach lughoSmeH chaH, leQ Qutlh qara. HeDaq tlhe''egh ‘ej bej.
yaSpu' puSvaD ra' bI'raQ. ngaSwI'vo' Dochmey lel yaSpu' ‘ej yavDaq lan.
pe'vIlHa' jatlh qara, <<jorwI'mey bIH.>>
qach qoDDaq chaHDI', qaravaD ghel leQ, jatlh, <<jorwI'mey..., bIjatlh,
qar'a'?>>
<<HISlaH. ‘ach chay' lo' bI'raQ? lo'Daj vISovbe'.>>
qachDaq Hur ghu' lubej chaH. yavDaq Qot Heghbogh Depmey law'. puvtaH
latlh. bachtaHmo' yaSpu', tagha' qo'chaj lucheghmeH Hoch, puv.
jach bI'raQ, jatlh, <<SuH! peQotchu'!>>
Qan'eghmoHmeH yaSpu', qet ‘ej mej. Qan Hoch ‘e' tu'DI' bI'raQ, Daq
jochHa' ghoS je ghaH. ghIq jorwI'mey laQ. wab chuS Qoylu'taHvIS, jorchu'.
tamqa'DI' retlh, jorpu'bogh jorwI'mey Daq cheghmeH bI'raQ, yIt. wejlogh
vaghlogh je Daqvetlh juSmeH, yIt. vay' nejlaw'meH ghaH, muD qoD SIch loS
DeSDu'Daj ‘e' ta'. ghIq yaSpu'vaD DeSDu' joqmoH ‘ej qachDaq qara leQ je
muv. chaHvaD wanI' chavta'bogh ghaH QIjchu'.
jatlh bI'raQ, <<Qap la'wI' qech. Qap ‘e' luQub je tejpu' peqIm!
ghomchuq qo'maj qo'vetlh je ‘e' raD yuQmaj ngeQbogh lIy wanI'. chevchuq cha'
qo'mey ‘e' vIraDmeH jorwI' vIlo'chu'ta'.>>
ghel qara, jatlh, <<bIchav. bIbej'a'?>>
jang bI'raQ, jatlh, <<jIbej. jItobta'. ngab rIntaH qo'vetlh.>>
jatlh qara, <<jIQuch. qo'vam vIparHa'bogh Dotlh HoS law' qo'vetlh
vIparHa'bogh Dotlh HoS puS.>>
jatlh bI'raQ, <<toH qara. qaja' ‘e' ra' la'wI': DaHjaj poH chuv yIleS!>>
jatlh qara, <<Hogh naQ jIleSqang.>>
jatlh bI'raQ, <<DaHjaj chuv neH chaw' la'wI'. yabDaj DaSovchu', qar'a'?>>
jatlh leQ, <<Ha'! mamej. SuH, bI'raQ! qatlho'. va. qaravaD SoH QaQ
law' Hoch qoch pIm QaQ puS.>>
jatlh bI'raQ, <<qoch nIv ghajba' qara. SoH'e'!>>
mon leQ. ‘ej mon qara. juH lucheghchoH.
juH lupawDI', jatlh leQ, <<DaHjaj maleS neH. SuH. yIba'! tugh
jItlhejqa'. naDev maHbe'taHvIS, jabbI'ID vIHev pagh vIHevbe' ‘e' vISov
vIneH.>>
rInpu'DI' wa' tup, qaravaD jach leQ, jatlh, <<HIghoS! yIlegh!>>
leQ paw qara. De'wI' tlhopDaq Qam leQ. jatlh leQ, <<naDev maHbe'taHvIS
jabbI'IDvam vIHevpu'.>> De'wI' jIHDaq Sen. Hov jav paq lIngwI' pImvo' ‘oH
jabbI'ID'e'. ja' lIngwI', leQ ghItlh je' lIngwI' ‘ej lut lIngqang.
jatlhqa' leQ, <<'ach jIyajbe'. lIngwI'vamvaD ghItlhwIj vIngeHta'be'.>>
jatlh qara, <<'e' vISov. vIngeHta' jIH.>>
De'wI'vo' tlhe''egh leQ ‘ej qara bej, jatlh, <<DangeHta'!>>
jatlh qara, <<lo'laH Daghajbej ‘e' vIHar. paqlIj lo'laH vIvoq.
lajQo'pu'mo' lIngwI'pu' puS, bIvangqa' ‘e' Dawuqmo', vIngeH jIH.>>
wa' mu' neH jatlhlaH laQ, <<qara!>>
leQ bej qara. jatlh, <<ghotpu' toDmeH qechmey QaQ DachenmoHbej; ‘ej
paqmey DachenmoHlaHbej, leQoy. DaH bIvang vIneH. latlh paq yIqon!>>
jatlh leQ, <<'a nI'taHvIS lut qechHey QaQ vIHutlhtaH.>>
jatlh qara, <<qo'vetlh pImDaq wanI' wISIQpu'bogh Daqawbe''a'? lut QaQ ‘
oH ‘e' vIHar jIH. paq DangevlaHbogh mojlaH lutvam, qar'a'?>>
jatlh leQ, <<qaraoy. bIval. bIlughbej.>>
(pItlh) peHruS ghaH mughwI''e'