qep'a'mey vIqawtaH...

[Bartholomew Barker <bbarker@ntplx.net>]

DISvam tlhoy jIghIQta'mo' qep'a' HutDIchDaq jIDach. loQ
jI'IQ 'ach ret qep'a'mey vIqawchu'.

qep'a' cha'DIch vIqaw. wej tlhIngan Hol vIjatlhlaH 'ach
qaSDI' jaj puS, jIpo'choH. mumerlu'. nIteb vIghojmeH Qatlh
'ach qep'a'Daq tlhIngan Hol vIghojmeH ngeD.

qep'a' cha'DIchDaq jup law' vIqIH 'ach mapuS. chob tlhoy'
toS charghwI' 'e' vIqaw 'ej ngugh mu'mey <<chob>> <<tlhoy'>>
je wISovbe'! Hamlet SoQ noy jatlh ghuy'Do. laDbe'. qawqu'!
Doj!

qep'a' wejDIch vIqaw je. Dun. maghomqa' 'ej malaw'choH.
juppu' chu' vIqIH. Okrand vIqIH je! ravDaq maba'taHvIS
lutmeyDaj wI'Ij 'e' vIqaw. qep'a' uQ'a' wISopDI', qep'a'
much'a'vaD jIbom, jIHDaq Dochmey mach vo'taHvIS Qov. not
wanI'vetlh vIlIj.

qep'a' loSDIchDaq jISaH je. pa' malaw'bej. DloraH vIqIH.
ngugh taghwI' ghaH taghwI' pabpo'ma''e'. betleHwIj par 'e'
vIqawlaw'. pagh vIqIHDI', QIn vIghItlhbogh qawmo' jIbelqu'.
mebpa'mey tachDaq matlhutlhtaHvIS, latlh QIn vIghItlhbogh
qawmo' SuSvaj, jIbelqu'qa'. muquvmoH pagh SuSvaj je 'ej
jIHem. ram lut DIja' jatlhwI' puS 'e' vIqaw. le'.

toH! jIDachmo' Sara': petIv! 'ej jIHvaD Qanqor Quch yIngeQ!