tlhIngan-Hol Archive: Fri Nov 02 22:23:20 2001

Back to archive top level

To this year's listing



[Date Prev][Date Next][Thread Prev][Thread Next]

nughIQmoH Dujmey



lutvam vIqontaHvIS jIvIt.  Hegh pagh 'ach chaq tlhIHvaD Daj 'Iw Hutlhbogh 
lutvam'e'.

muD Duj 'oH yaHwIj'e'.  qaSpu'pa' Hoch jajlo' Duj vInuDta', 'ej vIpuvbeHmoHta'.
tIjDI' beqwI' -- wa' nuv ghaH beqqoqwI''e' -- SaqmeH He wIghoS 'ej 
mapuvchoH. veng DungDaq mapuv.  muD Duj vISeH jIH, ghor He Dujmey bejtaH 
beqwI'.  paw'mo' ghor Duj qoj Qapbe'choHmo',  He' waQchugh, waw'majvaD ghu' 
ja' beq.

cha' Hogh ret, tI'wI' yaHDaq Duj vIchIj.  jIjatlh DujwIj yInuD.  QuQ yInuD, 
tel tInuD, bas tlhegh tInuD, ngaDmoHwI' tInuD, quS tInuD, yIb 
tInuD.  Saqjan, wovmoHwI'mey je tInuD.  QobHa' Duj naQ 'e' yI'ol.

pumDI' jIghIQchoH.  latlh muD Duj vIngIp 'ej *USA*Daq maleng jIH loDnalwI' 
je.  qatlh *USA* vIwIv?  *USA* tuj 'IH *Canada* tuj moH.  puHmey tuj parHa' 
loDnalwI'.  Sepmey tujDaq maleng.  Texas, New Mexico, Nevada, California je 
DItIv.  California wItlheDrupDI', muD Duj wInuD.  ghel loDnalwI'.

jatlh telvo' nIn SoD net chaw''a'?
jIjatlh nuqjatlh?  jajlo' bIQ Dalegh'a'?
taS largh.  jatlh ghobe', nIn 'oHbej.
Duj bIngDaq jIQot, tel vInuD.  telvo' SoD nIn.
Hu'tegh.  chay' Dujvam 'IH vIQIHpu' jay'?
jIbItqu'choH.  Duj bIngDaq jIQottaH.  mu'mey qu' vIjach. Dujvam vIngIp 'e' 
vIpay.  jISaqtaHvIS pupbe'law'mo' mIwwIj, nIn ngaSwI' vIQIH 'e' 
vIHaj.  wa'logh Duj QIHchugh HoD, HoDvetlh neH pagh.  DaQIHbe' SoH jatlh 
jupwI', loDnalwI' je.

tI'wI' vIrI'.  paw.  tel nuD. nIn ngaSwI' Hap yIngu' ja'.  vIngu'. nuDmeH 
lojmItHom poSmoH.  tugh vuD ja'.  Qop nIH nIn ghoSmoHwI'.   Hoch QuQvaD 
cha' nIn ghoSmoHwI' tu'lu'.  wa' ghoSmoHwI' QapmoH QuQ'e'.  latlh 
ghoSmoHwI' QapmoH 'ul'e'.  Qop 'ul ghoSmoHwI'.  jIQuch.  Duj 'IH 
vIQIHbe'pu'.  Qop neH.

nIn ghoSmoHwI' chu' jomlaH tI'wI', 'ach chu'wI' ghajbe'.  wejleS 
SuqlaH.  wa'leS yaHwIjDaq jIcheghnIS.

SengHom.

ghu' vIqeltaHvIS chuS QumwI'wIj. rI' beqwI'.  jatlh Qop Duj QuQ.  chu'wI' 
je'nISlu'.  wa' waQ puvbeHqa'.

vaj SengHa'.  nIn ghoSmoHwI' tI'lu'taHvIS *Marine World* wISuch.  tachmey 
DISuch.  Qe'mey DItIv.  Dujmeyvetlh Qopmo' maghIQchu'.

SKI: In the grand tradition of ghunchu'wI' -- Qov presents her station 
wagon in the sky vacation.  



Back to archive top level