tlhIngan-Hol Archive: Fri Mar 30 13:06:15 2001

Back to archive top level

To this year's listing



[Date Prev][Date Next][Thread Prev][Thread Next]

be'nalwI' qoS, Hogh jeywIj je



wa'Hu' qoS loSmaH lop be'nalwI'.  le'qu'be' jajvetlh.  wa'leS lopna'
pegh vInabta'bogh wItIvbej. :)  SaHmeH juppu' law' vImuvmoHta'.
qorDu' neH pIHlaw' ghaH.

cha'Hu' nob vIlaghHa' 'ej vISo'.  Hur qul 'un'a' 'oH.  wej 'uSDaq Qam.
baS 'ugh moQ 'oH porghHeyDaj'e'.  poS 'etDaj.  tlhuch 'och 'oH
yorDaj'e'.  yuvtlhe' ghaj (meQtaHvIS nIn yuvtlhe' teqnISba'lu').
pIrmuSDajDaq Sor Hap lanlu' 'ej meQlu'.  'et Qan yoDHom.

ramjep taghDI' be'nalwI' qoS, qul'unDaq weQ vIlan 'ej vIwewmoH.
ghaHvaD nobDaj vI'ang.  parHa'law' ghaH.  DaHjaj ram wIwaH.  qul
wItIvlaH.  chaq nutujmoHtaHvIS leSpal vIchu' 'e' vInID.

tugh maghIQlI'.  cha'leS tlhuch HuD Sep wIghoS.  Sor Hap mebqach
wIDan 'e' wInab.  ghaytan vaghleS machegh.  javleS leSpal DuSaQ
vIjaHnIS.  leSpal vIchu'DI' Quchbej be'nalwI' 'ach povHa' laHwIj. 
vaj jIpo'choH 'e' vIwIv.  qaStaHvIS loS Hogh qaS DuSaQ.

-- ghunchu'wI'



Back to archive top level