tlhIngan-Hol Archive: Mon Sep 18 13:57:15 2000
[Date Prev][Date Next][Thread Prev][Thread Next]
qaStaHvIS wej jaj jImI'taH
- From: "William H. Martin" <[email protected]>
- Subject: qaStaHvIS wej jaj jImI'taH
- Date: Mon, 18 Sep 2000 16:56:51 -0400 (Eastern Daylight Time)
- Priority: NORMAL
wejHu' qaStaHvIS wej rep jImI'meH 'ev vIghoS. pa' raQ
vISuch, Soj Dun vISop 'ej jImI' 'ej jImI' 'ej jImI'.
pa' law' be'pu' 'IH 'ej HoS 'ej po'. mamI'taHvIS nga'chuq
mInDu'maj. matujchoH. yIQchoH DIrmaj. matlhuHqu'. mamon 'ej
maHagh 'ej majach.
Dunchu' muchwI'pu'. munajmoH 'ej mujachmoH.
wejHu' wa'maH Hutvatlh rep jIpaw. jISop.
juHHomwIj ru' vIcher. cha'maHvatlh rep jImI'choHlI'. ramjep
jImI' 'e' vImev. yuch vISop. jIQong. bIr 'ach jISaHbe'. muD
bIr Haj tlhInganpu' net Sov 'ach pov QongDaqHomwIj.
jItujtaH. bIrtaH ghIchwIj neH.
cha'Hu' Sochvatlh rep jIvem. Soj tuj vISop. veychorgh
vItlhutlh. QaQ yIn. Hutvatlh rep jImI'choH. DungluQ jImI'
'e' vImev 'ej jISopqa'. wa'maH loSvatlh rep jImI'qa' 'ej
wa'maH Sochvatlh rep jImI' 'e' vImev. wa'maH chorghvatlh
rep bIQDep Dun vISop. yuch vISop je. cha'maHvatlh rep
jImI'qa'.
pa' ghom wejvatlh mI'wI'pu' Dun. jIQuchchu'. ramjep jImI'
'e' vImev 'ej yuch vISopqa'. latlh Dun vISop je. ghIq
tujmeH pa' vISuch. Sutmeymaj DIteq 'ej maba' wIvutlu'law'.
QIvmo' mInDu'wIj 'ej Hurghmo' vIleghlaHbe'. qay'be'.
jItujmeH 'ej juppu' vIja'meH pa'vam vIghoS. yap.
vIleghnISbe'.
qIDmey chu' vIghoj:
wovwI' choHmeH rugh jonwI'pu' 'ar poQlu'?
vaghmaH. wovI' choH wa'. wovwI' ngo' woD loSmaH Hut.
wovwI' choHmeH peDpu'DI' HuDDaq ghIrmeH ghojmoHwI'pu' 'ar
poQlu'?
vagh. wovwI' choH wa'. tlhe'qa'ghachmey noH latlhpu'.
jIQong. wa'Hu' Sochvatlh rep jIvem. nIQ vISop. Hutvatlh
rep jImI'qa'. DunluQ vISopqa'. wa'maH loSvatlh rep
jImI'qa'. qaStaHvIS cha' rep jImI'lI'. wa'maH javvatlh rep
juHHom ru' vIcherHa' 'ej tujmeH pa' vISuchqa'. jIrInDI' bIQ
bIrDaq vIqam. jIvemchoHchu'. vaj juH vIghoS.
jIQuchqu'. jI'oy'qu'. tlhoS jIvIHlaHbe'. ramvam bIQ
tujqu'Daq jIratlh. tujHa'choHDI' jIrIn.
pItlh