tlhIngan-Hol Archive: Fri Oct 06 14:57:18 2000
[Date Prev][Date Next][Thread Prev][Thread Next]
yaDpach DIngDaq tI DuQwIj
- From: "William H. Martin" <[email protected]>
- Subject: yaDpach DIngDaq tI DuQwIj
- Date: Fri, 6 Oct 2000 17:56:52 -0400 (Eastern Daylight Time)
- Priority: NORMAL
cha'Hu' jIyIttaHvIS 'oy'choH yaDwIj. yaDDu'Daq poStaH
waqmeywIj. 'oy'choHbogh yaD ghaj poSwIj qam. yaD'a'
retlhDaq 'oHtaH. 'oy'bej 'ach yaDvam vIleghDI' QIDbe'law'.
jISIQ.
wa'Hu' 'oy'taH yaDvam. vInuDqa'chu'. muDuQpu'bogh tI
DuQwI''e' loQ vIleghchoH 'ach vIleghlaHchu'be'. vIteq 'e'
vInIDDI' 'oy'qu' yoD 'ej DuQwI' vI'uchHa'. vIteqlaHbe'.
mInDu'wIjDaq yaDvam vISummoHmeH 'uSwIj vISIHchu' vIneH 'ach
loQ jIqanchoHmo' vISIHlaHchu'be' 'ej DuQwI'
vIleghlaHchu'be' 'ej vIteqlaHbe'. muQaHlaH 'Iv?
wIch vIqaw. chaq *mouse*Hey vISamlaH. qechvam vIqelqa.
ghaytanHa' jay'. chaq Qu'vammo' nuv vIqIH 'ej jup'a'chu'
moj 'e' vIqel. ghaytanHa' jay'.
DaHjaj pe'vIl 'uSwIj vISIHchu'. taj vIlo'. DuQwI'
vISuqmeH chIch jIQID'egh. jIQap jay'! tIq. jej. DaH
jImI'rupchoH. pagh vIpoQ. QaQ yInwIj.
SarrIS