tlhIngan-Hol Archive: Sun Apr 16 18:54:27 2000
[Date Prev][Date Next][Thread Prev][Thread Next]
Hegh vavwI'
- From: "Dr. Lawrence M. Schoen" <[email protected]>
- Subject: Hegh vavwI'
- Date: Sun, 16 Apr 2000 21:52:57 -0400
wejwen qoSDaj SochmaH vaghDIch lopta'mo' vavwI' Quchqu' qorDu'wI'. ropqu'.
DISmey law' qaStaHvIS porghDaj HIvtaH ropmey law'. Hergh law' ghaj.
qoSDajvaD lopno' tIn wIchenmoH. SaHmo' Hoch jupDaj Quchchu'. Quchmo' jIQuch.
wa'wen ropyaH'a'Daq yaH vavwI'. pujqu' tIqDaj. tlhuHlaHbe'. HeghtaH. 'e'
Har Hoch Qelpu'. qeli'qam law' vIleng 'ej QongDaqDajDaq Hegh jIpaw. paw
SoSwI' loDnI' be'nI' je. maloS. vav qab vInuDDI' Hegh vIlegh. tugh mej.
Sopbe'. tlhutlhbe'. ghupbe' Hoch HerghmeyDaj. Heghrup 'ej Heghqang. qaS
cha' jajmey. chol Hegh 'ach Heghbe'. tlhutlhqa'. Sopqa'. ghupqa'be
HerghmeyDaj 'ach HoSchoH. mISbej Qelpu'.
qaS jajmey 'ej leS 'ej HoSchoH. qaSDI' Hogh juHwIjDaq mungeH vavwI'. mu'mey
potlh wImech. chaq wa'leS qaSbe' 'ej chaq cha'leS qaSbe' 'ach tugh Hegh
vavwI'. vISov 'ej Sov. latlh vIjatlhnISbe'. mayajchuq. juHwIjDaq jIchegh
'ej jIloStaH.
wa'Hu' mev loStaHghachwIj. Hegh.
mu'meyvam vIghItlhtaHvIS 'oy' tIqwIj. tlheD vavwI' 'ej not ghoghDaj vIQoy.
latlh lutmey ja'be'. ghaH vIqaw neH. Hoch mughojmoH. DaH vImobqu'.
nI' yInDaj 'ej mIp yInDaj. qan 'ej rop porghDaj 'ach pIv yabDaj. mev 'oy'Daj.
yInDaj vIlop. choSovchugh vaj vavwI' 'ay' DaSov. jIHDaq taH mu'meyDaj
ta'meyDaj qa'Daj je. vavwI' puqloD jIH. reH ghaH vIquv.