tlhIngan-Hol Archive: Tue Jun 15 21:23:02 1999
[Date Prev][Date Next][Thread Prev][Thread Next]
Re: Love (jIjegh!)
- From: "William H. Martin" <[email protected]>
- Subject: Re: Love (jIjegh!)
- Date: Wed, 16 Jun 1999 00:23:47 -0400 (Eastern Daylight Time)
- In-Reply-To: <[email protected]>
- Priority: NORMAL
vuDwIj vI'angmeH pawqa'law' poH. mu' *love* mughlu' neHlu'. [I
know that last word looks strange, but since {neH} doesn't need
{'e'}, I'm guessing it doesn't use {net} either.]
qechmeyvam le'vaD wa' mu' neH ghaj DIvI' Hol. QIp ghu'. nuq
'oH *love*'e'? be' porgh neHchugh loD mu'vam lo'. be'
vuvchu'chugh loD vaj mu'vam lo'. tuq chenmoHmeH tlhejchuq loD
be' je neHchugh loD vaj mu'vam lo'. be' parHa'chu'chugh loD vaj
mu'vam lo'.
toH, mu'vam lo'lu'DI' nuq Hech jatlhwI'? chay' jangnIS be'?
qarHa'qu' mu'vam. vIpar.
ghu' qar vIDel 'e' vImaS.
qechwIj DayajmeH tIqwIj lut vIDel.
wej ben be' vIqIH. mamI'chu'. loQ mujun mInDu'Daj, 'ach loQ
tlhe' nach 'ej pIj mInDu'Daj DopDaq mubejchu' be'vam. peghlaw'.
'IHqu' 'ej mI'chu' 'ach tIqDaj vIyajbe'bej. mamI'pu'DI' tach ghoS
juppu' law'. wa' raS'a'Daq maba'. Hop be'vam 'ej luDech latlh
loDpu' law', 'ach jatlhtaHvIS Hoch, pIj muja' be'vam. wanI'vam
vItIv, 'ach qur neH be'vam 'e' vIpIH. lubej Hoch loDpu' neHlaw'
be'vam. jISop. jItlhutlh. jIHagh. jImej.
qaS cha' Hogh. mamI'qa'. tujchoH 'IwwIj 'ach wej pub. tlhabba'
be'vam. vInuQ vIneHbe'. boghDI' be'vam wa'maH ben vIboghpu'.
muneH 'e' vIHon.
tach wIghoSqa'. maba'DI' Sum be'. mutlhob latlh. jatlh <<nuq bIH
Qu'lIj'e' patlhlIj'e' je?>>
jIjanglaHpa' jatlh be'vam. <<De'wI' nuv ghaH charghwI''e'!...
marap.>>
mumerchu'. be'vamvaD Qu'wIj vIDel 'e' vIqawbe'. qub De'wI' be'
'IH. be'vam vISovchoH vIneHchoH. majatlhtaH.
vIghel. jIjatlh <<QInmey Dalab'a' 'ej DalI''a'?>>
<<HIja'.>>
<<'ach QInmey DatIv'a'?>>
<<SoHvo', charghwI', QInmey vItIvchu'.>>
pubchoHbej 'IwwIj. *San* 'oH pongDaj'e'.
qaStaHvIS wa' Hogh QInmey law' DItam. matlhejchuqqangbej 'ach
'eb wIloSnIS. qaStaHvIS Hogh cha'DIch naQ ghIQ be'vam. bIQ'a'
ghoS. cheghDI', maghom.
'ach cheghDI' tIqDaj nIHta' latlh.
pubbej 'IwwIj 'ach bangDaj chu' vISovchu'. QaQchu' loDvam.
quvqu'. reH batlh vang. loDvam vI'oy'moHlaHbe'. loDvam tIvchu'
be'vam 'ej Quch be'vam vIneHchu'. ghaytan QuchmoHmeH loDvam laH
po' law' laHwIj po' puS.
qaStaHvIS jav jar jImob. rut mamI' 'ach reH qochDaj vIvuv. latlh
bangHey vIqIH. qaStaHvIS wej jar qochDaj vImoj 'ach batlhHa'
vang bangqoqvam. 'ach ropchoH. ropmo' tugh HeghlaH. bangqoqvam
HaqnISlu'. vIQaHmeH loDnalDaj vIDalI'. ropyaH'a'Daq vItlhej 'ej
vIloS. qaStaHvIS wa'maH jaj vIQorgh. tugh paw bangna'Daj pegh
'ej jImejnIS. qaStaHvIS wej jar nIteb jISIQ.
rut mI' *San* jIH je, 'ach bangna'Daj vIvuvtaH.
*qat* vIqIH. mamI'. bIQtIqDaq DujDajDaq qatlhej. mareH. bangpu'
mamoj. qaStaHvIS wa' DIS qochpu' maHtaH... 'ach rut maSuv... pIj
maSuvchoH... reH maSuvtaH. nuHHa'choH ghu'. jIjegh. matlhejHa'.
rut mI' *San* jIH je, 'ach jIHvaD vIt chu' 'ang *San*. tlhejHa'
je bangDaj ghaH je... 'ach bangna' chu' Suqta'. batlh vang je
bangna'vam. vIvuvqa'nIS.
tIqwIjmo' pIj qoH jIH. jIDoghqanglaw'. jI'oy''eghqangmoHlaw'.
jIQIpbej.
chaq mu' *love* vImughlaHbe'. ghaytan vIyajlaHbe'. Saw latlhpu'
law'. ghaytan not vay' vISaw.
leSpalwIj vISovqa'choH. chaq vIyajlaH. QoQ laHwIj vIDublaH.
mu' *love* vIpoQbe'.
charghwI' 'utlh