pIvlaw' tIqwIj

["William H. Martin" <whm2m@server1.mail.virginia.edu>]

wa'Hu' tIqwIj toblu'meH ropyaH'a'Daq jIpaw. qach ravDaq Sap 
vIqIH 'ej jIngu''egh. mura'. jatlh <<tlhoy' SaS vaghDIch 
yIghoS.>> vaj tlhoy' SaS vaghDIch vIghoS. pa' rachwI' vIqIH. 
mura'. jatlh <<Ha'!>> vItlhej.

tlhoy' SaS wa'DIch wIghoS. wepwIj vIteq. rowIjDaq wa'maH nochHom 
Hum lan rachwI'. loQ pobwIj teqnIS. jan nochHommeyvam je rar baS 
tlheghmey. DeSwIj DuQ Hergh QaywI' DuQwI'Hom. DungDaq taS 
ngaSwI' tun 'uchlu'. ngaSwI'vam DuQwI'vam rar 'ochHom tun. 
vIHbogh ravHomDaq jIyIt 'ej jIqet. tIqwIj jIHlI' jan.

jIqettaHvIS yapDI' tIqwIj Do, tlhuDbogh Hergh 'ochHomvam veghmoH 
Qel 'ej mura'. jatlh <<ravHomvam yIlItHa'>>. nochmey DuQwI' 
je teq 'ej QongDaq le'Daq muQotmoH.

pa' jan tIn tu'lu'. nIH DungDaq ratlh. SumchoH. QIt He chu' 
ghoSchoH. ghoHey 'oH Hevam'e'. qaStaHvIS wejmaH tup ghoS. nIH 
Dungvo' poS BingDaq leng. DoSDaj jIHlI'.

beQ jan qab. qIj qabvam 'ach ghomey chIS ghaj. wa' botlh ghaj 
jav ghovam. qeqmeH DoS rur. wojmo' tIqwIj Somraw 'Iw leghlaH 
janvam. rInDI' mIw mura' Qel. jatlh <<DaH megh yISam. 
wa'maH loSvatlh wejmaH rep yIchegh.>>

ropyaH megh vISIQ. jIcheghDI' QongDaq le'Daq jIQotqa'. 
qaStaHvIS wejmaH tup jan mIw vISIQqa'. 

wa'maH Hutvatlh rep QIn mulab Qel. pIvlaw' tIqwIj. jIQuch.

DaHjaj po juHwIj HuD chuchDaq DIjbogh 'etlh rur qamDu'wIj. 
qamDu'wIj vIvIHmoHbe' 'ach jIqetlaw' 'e' chup DowIj. HuD vIlIgh. 
wa'maH wa' 'uj vI"DIj". SIbI' mev qamDu'wIj. SIbI'Ha' jImev. 
Do'Ha'.

nom jIpumqu'. chaq wa' joQwIj vIghor. jItlhuHDI' 'oy'qu'. 
jISIQtaH. ram.

charghwI' 'utlh