tlhIngan-Hol Archive: Sun Aug 15 15:16:28 1999
[Date Prev][Date Next][Thread Prev][Thread Next]
SalabmeH 'eb vIloSnIS
- From: "William H. Martin" <[email protected]>
- Subject: SalabmeH 'eb vIloSnIS
- Date: Sun, 15 Aug 1999 18:16:08 -0400 (Eastern Daylight Time)
- Priority: NORMAL
wejHu' QIn vIHev. DaHjaj cha'maH cha' vatlh rep mevchoH
QInwIj boSbogh De'wI''e'. javvatlh rep taghqa'. DaH wa'logh
Qoylu'pu'. QInvam vIlaDlaH be'. vIpolnIS.
DaHjaj ram mI'lu'meH wanI' vItIvchu'. 'IHchu' be'pu' mInDu'
law'. monchu'. mI'chu'. QaQ yIn.
juppu' vIghajbej. parmaq vISaHbe'. qaSqa' wanI' tlhaQ.
mughel jup. jatlh <<chay' DotlhlIj 'oH.>>
qajang. jIjatlh <<qaStaHvIS wej jar parmaq vIHutlh.
jIghungbe'choH. jIQuch. jIbel. jISIQta' 'ej taghqa'
yInna'wIj. jIDa'eghqa'. jIyon.>>
qechwIj qelDI' jupwI' Hujqu' qechvam 'e' Har. muja'
<<SoHvaD yap'a' wej jar neH? chomer! qaStaHvIS jav DIS
parmaq vIHutlh. not jIyon. qen parmaqqay chu' vItu'.>>
<<'Iv ghaH?>> jIjath.
peghtaHvIS jIHvaD parmaqqay chu' ngu'. juHvaD loDvam
qelbogh QIn'e' vIghItlhnISbe' 'ach jupwI' QuchmoHchugh
loDvam, jIyon.
taQ wanI' veb. muja' <<chu'mo' parmaqqay'vam tugh mamev 'e'
vIpIHbe' vaj ghaytan jIH DaloSnIS.>>
jIjatlhlaHbe'. mu'mey vIjonlaHbe'. jImob 'ej jIQuch.
parmaqqay'wI' moj jupwI' vIneHbe'. vIparHa'chu' 'ach
jImobtaH vIneH. mamI' 'ej mamuch vIneH 'ach jIQuchDI' jImob
'e' vImaS. jImIS vIneHbe' 'ej Qu'mey law' vIghaj. wa' DoS
vIbuS vIneH 'ej parmaq 'oHbe' DoSwIj'e'.
*Sony Cher* je bom ngo' vIchoH:
<<jIghaj'egh, ghu>>
[qIDwIj Dayaj'a'?]
----------------------
charghwI' 'utlh