tlhIngan-Hol Archive: Sat Aug 14 06:16:28 1999
[Date Prev][Date Next][Thread Prev][Thread Next]
DaHjaj nabwIj vIqIl
- From: "William H. Martin" <[email protected]>
- Subject: DaHjaj nabwIj vIqIl
- Date: Sat, 14 Aug 1999 09:15:51 -0400 (Eastern Daylight Time)
- Priority: NORMAL
wa'maHHu' yaHDaq nabchoH cha' jup. vItlhej luneH. DaHjaj HuDDaq
bIQ wIghoS. tun bIQDujmaj. bIQ DungDaq ratlhmeH bIQDujvam muD
ngaS. bIQDuj 'o'Daq ba' DevwI'. bIQDujDaq ba'laH Hut nuv. nom
vIH bIQ. Suyepbe'chugh nagh law' bongeQ 'ej lIQaw' nagh bIQ je.
yep DevwI'.
wa'maH vaghHu' jImI'taHvIS jIpum. poSDaq puv waqmeywIj. nIHDaq
mumevmoH wa' ghopwIj neH. HoS ghopvam DeSvam je 'ach pe'vIl
jIpummo' rIQchoH yebwIj. 'oy' 'ach jImI'taH. batlh 'oy'vam
vISIQlaH.
tugh jImI' 'e' vImev. wanI'vamDaq law' loDpu'. puS be'pu'. 'oy'
yebwIj 'ej mI'meH 'eb vIjonbe'chu'. qoch jonmeH Hoch qu' law'
jIH qu' puS vaj cha'logh mI'taHvIS latlhpu' vIbej neH. Dal ghu'.
jImej.
QIt rach yebwIj vaj nabDI' juppu'wI' jIjeS. qay'be'law' yebwIj.
wa'Hu' yaHDaq latlh jup targh tu'lu'. yIHqoq yIvtaH. reHmeH
yIHqoqvam vItlhap. jIjaD. SeychoHchu' targh. vIba'. jIHDaq
yIHqoqvam tatlhlaw' 'ach 'uchHa'Qo'. vI'uchchoHDI', muSuvchoH
targhvam. vIHchu'. 'oy'qu'qa' yebwIj, 'ach jIQap! DungDaq yIHqoq
vI'uch.
Supqa' targh. chuSchoH. nom 'uSDu'wIj jojDaq yIHqoq vIba'law'
'ach rav DontaHvIS DubwIj, DubwIj DungDaq 'etwIjDaq yIHqoq
vIba'meH yebwIj vIlo'. targh vItoj. yeb vI'oy'qu'qa'moH.
'oy'chu'.
pIjHa' Hergh vIlo'. wanI'vamvaD 'oy'chu'mo' yebwIj Hergh vIlo'.
nom rachlaw'. yebwIj vIqel 'e' vImev.
DaHjaj po 'oy' yebwIj volchaHwIj je. bIQ nabwIj vIqIl. ghaytan
bIQ qu' law' targhvam qu' puS. latlh jaj bIQ vISuv.
charghwI' 'utlh