tlhIngan-Hol Archive: Tue Mar 31 14:53:08 1998
[Date Prev][Date Next][Thread Prev][Thread Next]
chaq bang chu' vISuqta'.
- From: "William H. Martin" <[email protected]>
- Subject: chaq bang chu' vISuqta'.
- Date: Tue, 31 Mar 1998 17:53:00 -0500 (Eastern Standard Time)
- Priority: NORMAL
wejHu' muSuch mI'bogh jupwI'. bIQDaq lIghmeH-cha'-nuv DujHom
qeng. puHDujDaj DungDaq qeng bIQDujHomvam. pumbe'meH tlheghmey
lo'.
bIQtIq wIghoS. bIQDaq DujHomvam wIlan 'ej 'etDaq ba' jupwI'.
'o'Daq jIba'. DujHom wIjaHmoHmeH naQ beQ DIlo'.
Hutvatlh rep taghmeH mapaw. wa'maHvatlh rep paw HochHom
latlhpu'. paS 'op latlhpu'. wa'maHvatlh rep bIQDaq maH 'e'
wInab. wa'maH wa'vatlh rep bIQDaq matagh.
luch waghqu' ghaj wa' be'. waghqu' DujHomDaj je. wej bIQDaq
lengta'. bIQDaq naghmey wa'DIch DIghoSDI' pum be'vam. wa' He
ghoS DujHomDaj. latlh He ghoS be'vam. nom vIH bIQ 'ej nom vIH
be'vam DujHomvam je. bIQ HeHDaq DujHomDaj jon be'vam 'ej
Haghqu'. wanI'vam tIvba'. DujHomDajDaq toS 'ej lengqa'. nom
laHDaj Dub be'vam.
qech SuqlaHbe'ba' latlh be'. DujHomDaj chIjlaHbe' be'vam.
DujHomDaj jaHmeH, wa' DopDaq yuvqa'taH 'ej not naQ beQDaj
lo'choHchu'. reH nIHDaq yuv be'vam 'ej reH poSDaq ghoS DujHom.
reH <jIQoS!> jach 'ej latlh DujHom ngeQ DujHomDaj. paw'qu'.
be'vam vup latlh DeghwI'. wa' DujHomDaq ba' cha' nuv 'ej latlh
DujHom chIm tlha'moHmeH, tlhegh lulo'. latlh DujHom ngeQqa'taH.
QIplaw'.
loDna' ghaHba' DevwI'maj. reH nuchDajDaq *cigar* lang
tlhIchmoHtaH. Somraw' tIn ghaj. chuS ghoghDaj. jupwI' parHa'ba'.
ghaHvaD monqu'taH. jISaHbe'. marInDI' mutlhej.
mamI' 'e' wInab 'ach mapaSqu'. nargh 'eb. wa'maH loSvatlh rep
mamej 'e' wInab 'ach wa'maH Sochvatlh rep bIQDaq maratlh.
wa'maH Hutvatlh rep juHwIjDaq mapawpu' 'ej maSay'choHmoH.
cha'maH rep ghom mI'bogh qep. pa' wIghoSmeH cha' rep mapoQ 'ej
maghung. poH yap wIghajbe'ba'. mamI'be'. nabvetlh wIlon.
SopmeH veng wIghoS. Qe' wISam 'ej maSop. mayIt. maja'chuq.
latlh Qe'Daq qa'vIn wItlhutlh. ramjep juHwIjDaq mapaw. Doy'qu'.
Quchqu'.
cha' bIQDujHom ghaj jupvam. lIghmeH-cha'-nuv Duj lIghmeH-wa'-nuv
Duj je ghaj. cha'Hu' lIghmeH-wa'-nuv bIQDujHom vIje'. jIreH
vIneH.
charghwI'