tlhIngan-Hol Archive: Mon Jun 22 16:30:13 1998
[Date Prev][Date Next][Thread Prev][Thread Next]
maghIQpu'
- From: "Andeen, Eric" <[email protected]>
- Subject: maghIQpu'
- Date: Mon, 22 Jun 1998 16:20:28 -0700
wejHu' be'nalwI' SoS wISuchmeH mamej jIH, be'nalwI' *Sarah* je. wa'Hu'
machegh. loQ Hopmo' juHDaj lupDuj wIlIghnIS. paS lupDujmaj 'ej *Sarah*
QeHmoH ghu'. lupDuj par 'ej lupDuj malja' pIchqanglaw'taH. meqDaj
vIyajchu'be'. lupDuj wItIjHa'ta'DI' *Sarah* SoS *Max* wIghom. rut matlh
vIpong 'ej bepbe'.
mapawpu'DI' <matlh ghe'naQ Qe'> wIghoS. Daj Qe'vam. bomwI' chaH je Hoch
jabwI''e'. chatlh 'ep matlh. bIQDep chabHommey, Hurghmey Sop *Sarah*.
Ha'DIbaH vISop. yuchna' wISop Hoch'e'. maSoppu'DI' mamej 'ej juH wIghoS.
loQ nI' leng. ramjep mapaw.
cha'Hu' po Sut chu' je' luneH *Sarah* matlh je. reH Sut chu' je'qanglaw'
be'pu'. DungluQ cha' matlh juppu' DIghom 'ej maSop. maSoppu'DI' jIH'a'
much *MuLan* wIbej.
Doj muchvam. puqvaD chenba', 'ach nenwI'vaD Daj je. batlh qeltaH lut.
loQ vIDel, 'ej lut boSov boneHbe'chugh, 'ay'vam yIlaDQo'. *China* luyot
novpu'. wa' SuvwI' ghaqnIS Hoch qorDu' 'e' ra' ta'. ben law' Suvchu'
*Zhou*, *MuLan* vav, 'ach DaH qan 'ej rIgh. puqloD Hutlhmo' *Fa* qorDu'
SuvlaH neH *Zhou*. Suvchugh Heghbej net Sov, 'ach Suv 'e' poQ quvDaj,
qorDu' quv, ta' chut je. ghu'vam botmeH, *Zhou* may'luch nIH *MuLan*.
jIbDaj chIp. loD Da 'e' nID. raQ ghoS. lutlhej SarghDaj, lung'a' mach,
ghew je. machmo' *MuLan* HoSbe', 'ej be'Hom ghaHmo' not tonSaw' HaDchoH
net pIH. ghu'vammo' tlhoS luj. 'ach val, 'ej valmo' Suvchu' 'e' ghoj.
ratlhbogh lut 'ay'mey vIDelQo'. Daj HochHom lut nuv. be' ghaH *MuLan*
'ej quv luchav loD neH 'e' chaw' nughDaj, 'ach bIvchu' 'ej Suvchu'.
*MuLan* juppu' moj wej mangHom. pIj tlhaQ. matlh. rut chong. tlhaQtaH
lung'a' mach, ghew je. pov novpu' che'bogh jagh'a''e'. tInqu' 'ej
HoSghaj. val 'ej qu'. 'ach natlh wa' nuv - ta' boQ. puj 'ej Dogh 'ej loQ
tlhIb. 'IH much naQ 'ej bobej 'e' vIchup.
ram Ha'DIbaH QulwI' much wIbej. *Dr. Irene Pepperberg* 'oH muchwI'
pong'e'. *African Grey Parrots* HaDtaH. QIchchaj HaD 'ej Qublaw'meH
mIwchaj HaD je. val puvwI'vam; rut cha' ben puq rur 'ej rut vagh ben puq
rur. Doch pIm ngu'laH 'ej DellaH. toghlaH 'e' toblI' QulwI'pu'. cha' ben
puvwI'vaD laDmeH mIw ghojmoH QulwI' 'e' lunID, 'ach puvwI'vaD Dallaw'
'ej qImtaHQo' puvwI'. chaq tugh ghojqa'moH. *African Grey Parrot*
wIghajmo' muvuQmoH muchvam.
latlh Qu' DIta', 'ach Dajqu'be' 'ej nI'choHpu'mo' jabbI'IDvam jIghItlh
'e' vImev.
pagh