tlhIngan-Hol Archive: Mon Jun 15 13:50:52 1998
[Date Prev][Date Next][Thread Prev][Thread Next]
cha'leS jIghIQchoH.
- From: "William H. Martin" <[email protected]>
- Subject: cha'leS jIghIQchoH.
- Date: Mon, 15 Jun 1998 16:50:44 -0400 (Eastern Daylight Time)
- Priority: NORMAL
cha'leS jIghIQchoH. cha'maH wejleS jIchegh. jISeyqu'. Qatlh
loSmeH Qu'wIj. DaH jIjaH vIneH! 'ach jIlengrupbe'.
lengmeH DochmeywIj vIghomnISchu'.
loQ jIbItlI'. wej puH'a'vam vImejpu'. wej qaStaHvIS wej Hogh
jIghIQta'. Hop puH vISuch. *Denmark* vISuch. pa' jImI'.
wanI'vam vIDelta', 'ach tugh paw wanI'vam 'ej jItamlaHchu'be'.
leSpoH'a' 'oH. QIt vIH tlhaq.
jIlengtaHvIS jabbI'IDghomvamvaD jIjeSlaHbe'law'. jIlabmeH jeS
jabbI'ID QuvwIj 'e' chaw'be' KLI De'wI'. jIlengtaHvIS, latlh
De'wI' vIlo'. motlhbe' lengmeH De'wI' pat jabbI'ID pat je.
jIlI'meH QInmey law' chaw'be' De'wI'HomwIj. teblaHchu' yabDaj.
jIyepnIS.
jIlengtaHvIS jIHvaD QIn Dalab DaneHchugh *[email protected]*
yIlo'. pa' SoHvaD QInmey vIlablaH 'ej SoHvo' QInmey vIlI'laH,
'ach tlhIHvaD QInmey vIlablaHbe' 'ej tlhIHvo' QInmey
vIlI'laHbe'. SoHvaD QIn vIlabchugh, vaj tlhIHvaD QInvetlh
Dalabqa'laH, 'ej tlhIHvo' QIn DalI'chugh jIHvaD QInvetlh
Dalabqa'laH.
choyaj'a'?
jIlengtaHvIS jIlI'meH 'ej jIlabmeH jInab. wejleS De'wI'Hom
vIrar. javleS vIrarqa'. HutleS vIrarqa'. qaSpu'DI' latlh wej jaj
vIrarqa'. pIj jIrarchugh vaj waghchoH. qaStaHvIS wa' tup rarmeH
chaq vagh DeQ poQ ghogh HablI' pat. qaStaHvIS latlh tup rarmeH
chaq cha' DeQ poQ.
pItlh
charghwI'