tlhIngan-Hol Archive: Wed Apr 29 02:19:53 1998
[Date Prev][Date Next][Thread Prev][Thread Next]
nentay qun
- From: "d'Armond Speers" <[email protected]>
- Subject: nentay qun
- Date: Wed, 29 Apr 1998 05:19:04 -0400
- Importance: Normal
lut vIqonlI'. 'ay'vamDaq, nentay qun vIQIj. vIghItlhpa', De'na' vIQul.
cha' nentay lop Hoch tlhIngan puq! teH ngoDvam!
Dochmey vISovchu'be': chay' "Morath" ghItlhlu'? /moratlh/ vIghItlh.
ghorgh boghlu', chay' 'e' vIQIj? /ben/ vIyajbej, 'ach wot 'oHbe'. chay'
vIta'? qun yIlaD!
ngoDmey ngeb vIqonchugh, HIlughmoH. reH qar tlhInganpu'!
--Holtej
moratlh Suvpa' qeylIS, qaStaHvIS cha' DIS SuvrupmoH ghaH. buSchu'meH, qul
retlhDaq ba'. betleH tonSaw' qeqtaH ghaH. reH mobtaH. wa' ngoQ neH buS.
qaSpu'DI' cha' DIS, maq: <DaHjaj SuvwI''e' jIH! moratlh vIjeyjaj! Hoch
Qo'noS bIQtIq tebchugh jaghpu'wI' 'Iw, morath vIqaDmeH 'Iw bIQtIqDaq jIleng!
Hoch Qo'noS He tebchugh jaghpu'wI' porgh'e' vIHoHbogh, moratlh vIjeymeH lom
He vIleng! not jIjegh! not jegh tlhInganpu'! not jegh Qo'noS! jItaHmeH
jISuv!> maqta'DI' qeylIS, QapmeH 'Ipta'. 'IpDaj qawmeH, batlh 'etlh
QachtaHvIS chIch pe''egh qeylIS. 'oy''eghmoHqu'. not 'oy'vetlh lIjmo', not
'IpDaj lIj.
nentay QIj qonvam. qaSDI' DIS wa'maH wejDIchchaj, nentay wa'DIch lop Hoch
tlhIngan puq. tlhIngan SuvwI'na' moj neHchugh puq, qaSDI' nentayDaj wa'DIch
ngoQDaj maqnIS. tlhIngan SuvwI' moj 'e' Hechchugh, qaStaHvIS cha' DIS
qeqtaHnIS. qaSDI' wa'maH vaghDIchDaj, nenghep chav. SuvwI' moj 'e'
maqta'chugh, nentay cha'DIch SIQnIS. morath SuvrupmoHbogh qeylIS'e' rur
nentay SIQlI'bogh puq.