tlhIngan-Hol Archive: Mon Nov 10 12:29:58 1997
[Date Prev][Date Next][Thread Prev][Thread Next]
wa'Hu' wanI'mey
- From: [email protected] (Alan Anderson)
- Subject: wa'Hu' wanI'mey
- Date: Mon, 10 Nov 97 14:39:00 EST
vengwIjDaq DawI' yej'anHom tu'lu'.
Hoch DIS, loS lut much.
roD bom wa' lut.
DISvam <QoQ ghogh> much 'e' lunab DawI'pu' ("The Sound of Music").
<yu, bIm, 'egh> vIQubtaH.
wa'Hu' lut lumuchlI' DawI'pu' 'e' vIbej.
taQ lut pong: "Eleemosynary" 'oH.
nobqangneSghach 'oSlaw' mu'vam.
mach much. wej be' neH poQ lut.
nI' je much. yev Hutlhbogh cha' rep luSIQ bejwI'pu'.
Huj lut. be'Hom, SoS, SoSnI' je qel.
Heghpu' SoS loDnal. Heghpu' je SoS vav.
nIteb be'Hom QorghlaHbe'mo', boQqangchu'qu' SoSnI'.
SoS nISlaw' SoSnI'. qechmey Huj buStaH SoSnI'.
jumbej SoSnI'. ja'chuq ghaH qa'pu' je.
mIqta' HutlhtaHvIS puvlaH ghot 'e' Har.
be'Hom lonta' SoS vaj Qorgh SoSnI'.
laH le' ghaj be'Hom. "spell"-laHchu'.
QorHeyDaq ghobchuq "spell"-wI'pu' po'.
pe'vIl 'ov be'Hom 'ej Qap. naSlaw'. ghol Qav jeychu'.
mu' Qav 'oH "Eleemosynary"-'e'.
ghaHvaD nuH mojpu' <nobqangneSghach>.
lut naQ vIja'be'. wanI'na' vIja'choH.
ropqu' wa' DawI' vav. Qob ghu'Daj; chaq 'argh.
chaq SIbI' SuchnIS DawI' 'ej DalaHbe'.
vaj DawI' lIw mojqang SoSwI'.
lut HaDta' 'ej muchmeH qeqta'.
Do' DawI' vav ghu' Dublu'.
wa'Hu' po ropHa'lI' vaj SoSwI' boQ poQlu'be' DawI'.
Quch SoSwI' 'ej "Chicago"-Daq be'nI'Daj SuchmeH mej.
wa'maH loS vatlh rep taghbeH much.
wa'maH cha' vatlh rep De' Qoy DawI' cha'DIch: ropqu' loDnI'Daj'e'.
pay' mevpu' tIqDaj 'ej HeghbejlI'.
mejta' SoSwI' vaj cha' DuH legh much DevwI'.
qa'meH SuqlaH pagh much qIllaH.
nom qa'meH Sam.
lut Sovbe' DawI' chu' 'ej muchvaD vItmeH Daq wanI' je Sovbe'.
nom ghojlI' ghaH. SoS Da.
muchtaHvIS, lut paq laDnIStaH.
HoptaHmo' SoS, Qaplaw'.
Dachu'ta' qa'meH.
rInpu' much. tlheDta' HochHom.
much loHwI' yaHDaq jawtaH ghot puS.
ghum QumwI'. De' luQoy: Heghpu' loDnI'.
napbe'bej yIn.
-- ghunchu'wI'