tlhIngan-Hol Archive: Tue Mar 11 19:01:39 1997
[Date Prev][Date Next][Thread Prev][Thread Next]
ram QeH
- From: DaQtIq <[email protected]>
- Subject: ram QeH
- Date: Tue, 11 Mar 1997 22:01:34 -0500
ram jIQeH 'ej rambe' QeH.
jIvumtaHvIS, bom vIQoy. muQeHmoH tera'ngan bomvam. bom be': <tIqwIj
yIghorHa'.> wejpuH... mumaghmo' be'nalqoqwI', be'vamvaD jIjang:
<bangHeylI' yIngaghHa'!>
loSmaH jav Hu' be'nalwI' vISawHa' 'ach qaStaHvIS jar law' muQeHmoH.
muquvHa'moH. jIHvaD neptaH. mumaghta'. DaH jImob 'ach HuHwIj meQmoHtaH
QeHvam. chaq reH jIQeH ghaHmo'. ramvam jISaHbe'.
DaH be'pu' vIvoqHa'. qaStaHvIS wa'maH wej DIS, qunDaj wIqeltaHvIS, nep
be'nalqoqwI'. jIQIp. jI'ongHa'. batlhHa' yIntaH 'ej batlhHa' muyInmoH.
DaH batlh jIyInqa'.
ramvam jIQeHqu'. Huv chal 'ach mubelmoHbe'. 'IH maS lang Hovmey je 'ach
jISaHbe'. jIralchoH 'ach tera'Daq jISaHmo', jISeH'eghnIS jay'.
not be'nal vIqIp. reH vISaH 'ej vIQorgh 'a reH neptaH. vISawta'DI',
jIQeHDI', jIQeHqu'. jIQuchDI', jIQuchqu'. jI'ItDI', jI'Itqu'.
DaH QoQna' QeH vIQoy. *Roger Waters' The Wall* vI'Ij. chuSqu' QoQ
'ej chuSqu'taHvIS jIbom je. SajwIj vIghIjlaw'. Do'Ha'. muDuQ QoQ 'ej
QeH vIregh. qaSpa' po, loj QeH ral 'e' vItul.
va, qaSDI' po, yaH vIghoSnIS. munuQ pInwI'. vIvoqHa' je. jIHvaD neplaw'.
loQ muQeHmoH je 'ach muQeHqu'moH be'pu'.
loQ jIjotchoH...
Dunbej Holvam.
- DaQtIq