tlhIngan-Hol Archive: Wed Jul 30 17:06:46 1997
[Date Prev][Date Next][Thread Prev][Thread Next]
wa'Hu' ram ghoH be'nalwI' jIH je
- From: "Andeen, Eric" <[email protected]>
- Subject: wa'Hu' ram ghoH be'nalwI' jIH je
- Date: Wed, 30 Jul 1997 17:11 -0700
wa'Hu' ram ghoH be'nalwI' jIH je
tlhIngan Hol vIjatlh 'e' par. <moH tlhIngan Hol> jatlh.
tlhIngan Hol vIjatlhDI' muyajlaHbe' 'e' par je. <vaj tlhIngan Hol yIghoj>
SoHvaD jIja', 'ach ghojQo'.
qaSpa' wa'Hu' ram ngoDvam vISov, 'ach wa'Hu' ram latlh meq muQIj.
<tlhIngan Hol jatlh loDnalwI'> qoj <tlhIngan Hol jatlhmeH loDnalwI',
*Philadelphia*Daq ghoS> jatlhDI' be'nalwI', Dogh 'ej QIp 'e' Har. tuH.
maw' qoj taQ be'nalwI' 'e' luQub latlh 'e' Qubchugh be'nalwI', machqu'
'ej QIv 'e' Har.
lughIj je tlhInganHey. qo'na'Daq yIntaHQo' tlhInganHey 'e' Qub be'nalwI'.
tlhInganpu''e' ngotlhchugh vay', vaj Humanpu' SaHbe' 'e' Har. <Get a
life!> Qublaw'.
taQqu' tlhInganHey 'e' Harmo' 'ej maghommo' jIH tlhInganHey je, loQ
jIDuy' 'ej jIQIp 'e' Qub be'nalwI'. chaq jIHvaD tlhIngan Hol tlhIngan
tIgh je potlh law' ghaH potlh puS 'e' Qub. chaq tlhIngan Holmo' ghaH'e'
vImej 'e' Qub.
tlhIngan jIHbe', 'ej tlhIngan jIH vIneHbe'. tlhIngan Hol vIjatlh 'e'
vItIvqu', 'ej tlhIngan tIgh vIyaj 'ej vIvuv. tlhIngan Quch vItuQ
vIneHbe', 'ej tlhIngan *fan club* vIjeS vIneHbe'. ('ach tlhIngan nuH
vIparHa'qu').
mura'be' be'nalwI', 'ej mura'laHbe'. tlhIngan Hol vIjatlh vIneHchugh, vaj
tlhIngan Hol vIjatlhbej. be'nalwI' vISaHqu'taH, 'ach jIchoHQo'.
muqanglaHbe'chugh, jI'IQqu'choH, 'ach jIchoHQo'. be'nalwI' potlh law'
tlhIngan Hol potlh puS, 'ach ghaHmo' jIwIvnISchugh, loQ vIvuvlaHbe'.
jIHvaD jabbI'IDvam le'qu'mo', vImughQo'. DalaDlaHchugh, maj. ghaytan
Dayaj je.
pagh