tlhIngan-Hol Archive: Tue Aug 27 12:44:59 1996
[Date Prev][Date Next][Thread Prev][Thread Next]
Re: jIghIQta' 'e' vIDelqang
- From: Alan Anderson <[email protected]>
- Subject: Re: jIghIQta' 'e' vIDelqang
- Date: Tue, 27 Aug 96 13:43:56 EST
jaj latlh, jabbI'ID latlh. :-)
QaQqu' ghu'. Dunchu' muD Dotlh.
tuj pem vaj DungluQ 'otlh DIjun. nuQaH Sormey.
bIr ram vaj nIvnav le' DItuQ 'ej "blanket" jeD DIlo'.
rut qul wIchenmoH, 'ej "S'mores" DIvut 'ej DISop.
chay' "S'mores" vIQIj?
chab Huj rurlaw'.
yajlaHpa' Hoch, chaq "marshmallow" vIQIjnIS.
chIS "marshmallow". wIbHa'qu'. HumlaH. HaQchor watlh rur.
moQ mach rur "marshmallow" motlh.
wa' ghopDaq jav "marshmallow" 'uchlaH vay'.
DaH "graham cracker" vIQIjnIS jay'.
beQ. Hurgh. loQ let. loQ wIbHa'.
"graham cracker" chenmoHmeH tIr le' lo'lu'.
pIvlu' 'e' ghurbej 'e' maq 'oghwI'Daj.
yuch vIQIjnISbe'qu'!
"S'mores" DachenmoHmeH, qulDaq "marshmallow" yItetmoH.
cha' "graham cracker" jojDaq "marshmallow"-vam tuj, yuch beQ je tIlan.
Hoch tay'moHtaH "marshmallow" Hum.
loQ tetHa' "marshmallow" 'e' yIloS. yISop!
nI'qu'choH lutwIj. jInI'be'moH.
"Tuesday" ngengHey tujDaq mayIQqa'.
"Wednesday" matlheDruplI'. luch wIpolqa'. tepqengwI' wItebqa'.
"Thursday" juHHommaj ru' wIcherHa'. raQHeyvo' matlheD.
qaSDI' ram, latlhDaq mapaw. nom tlha'wI' wIcherqa', maSop, maQong.
"Friday" SoSwI' be'nI' juH'a'Daq Doj mapaw.
(DaHjaj juH'a'vetlh vIDelqangbe'. chaq leS vIDel.)
"Saturday" malengqa'. "Aspen, Colorado"-vo' "Indiana"-Daq majaHlI'.
cha'maH jav rep maleng. 'ej malenglI'. malengtaH jay'.
tIqqu' He. qaS jaj. qaS ram. qaS jaj cha'DIch.
"Sunday" be'nalwI' SoS juHDaq mapawDI', mayev. maleSlI'. 'uQ wISop.
paSchoH. choS chol. juHmajDaq majaHnISbej. vaj majaH.
pItlh! juH mapawta'. qaStaH ramna'. maQong wIneH.
'ach maQonglaHpa' tep wIQorghnIS jay'!
cha' rep mavum. Duj wItebHa'. tepqengwI' wItebHa'.
Sut lam wISuqmeH tlha'wI' vIcherqa'.
juH pa'mey DIghIHqu'moH.
maQongchoH. maQongchu'.
"Monday" po jIvem. yaHwIjDaq jIjaH.
va, not jImejpu' 'e' rur ghu'. choH pagh. vIvumqa'choH.
-- ghunchu'wI'