tlhIngan-Hol Archive: Thu Aug 22 12:50:27 1996
[Date Prev][Date Next][Thread Prev][Thread Next]
jIghIQta' 'e' vIDelqang
- From: Alan Anderson <[email protected]>
- Subject: jIghIQta' 'e' vIDelqang
- Date: Thu, 22 Aug 96 13:51:16 EST
maleSmeH 'ej qo' motlh wInarghmeH "Wyoming" HuDDaq majaH qorDu'wIj.
naQHey 'IH wItIv. wejmaH cha' ben Daqvam lutu' vavwI' SoSwI' je.
cha'logh pa' be'nalwI' vIqemta'. wejlogh be'nalwI' puqloDwI' je
vIqemta'. Hoch DIS cha'DIch pa' majaHqa'.
wanI'vam le' -- pa' nughom 'e' nab be'nalwI' vav SoS je,
'ej mejpu'DI' chaH paw 'e' nab vavwI' SoSwI' je.
loSmaH Hu' pa' jaH be'nI' qorDu'Daj je.
Daq luSuchlaw' "Indiana"-ngan law'!
"Sunday" po juHvo' matlheD.
'eqqu'taHvIS matagh 'e' wInab, 'ach maluj. mapaS.
maQongmeH qachHey wIghajmeH Duj tlha'wI' vIje'ta'.
tlha'wI'vam luHtaH DujwIj vaj QIt malengnIS.
jaj naQ maleng 'ej loQ qaSpa' ramjep "Omaha" juppu' juHDaq mapaw.
ghem chuplu' 'ach paSqu' 'ej maQongrupqu'.
"Monday" po mavem 'ej nIQ QaQ wISop. maSuch. majatlh.
tugh mamejnIS wIja'taH 'ach maratlhtaH. megh QaQ wISop.
qaS DungluQ matlheDchu'pa'. mapaSqa'.
cha' jaj maleng. "Tuesday" raQHeyDaq mapaw. juHmaj ru' wIcher.
"Monday" veng SumDaq pawta' be'nalwI' vav, SoS je vaj DISuch.
rep law' maSuch. qaStaHvIS "Wednesday" DaqmajDaq nuSuch 'e' manab.
raQHeyDaq macheghpa' qaS choS. HurghchoH mapawpa'.
'ach Hut jajmey pa' maratlh 'e' wInab 'ej maQuch. QaQlaw' Hoch.
Do'Ha' "Tuesday" ram Hegh be'nalwI' SoSnI' (ropqu'pu'mo' numerbe').
nom "Wyoming"-vo' "Kentucky"-Daq nolvaD lengnIS vav SoS je.
"Saturday" qaSbeH nol. "Canada"-vo' ghIQHa'nIS latlhpu' je.
vaj cha' rep neH nuSuchlaH, 'ach nuSuchta'. naQHey Doj lulegh.
pe'vIl luparHa'. retlhDajDaq juHHom luneH 'e' luwuqlaw'.
jIyev. tugh taH lutwIj.
-- ghunchu'wI'