tlhIngan-Hol Archive: Wed Dec 20 17:44:08 1995
[Date Prev][Date Next][Thread Prev][Thread Next]
ghom'a'Daq charghwI'vaD jIjang je jIH
- From: [email protected]
- Subject: ghom'a'Daq charghwI'vaD jIjang je jIH
- Date: Wed, 20 Dec 1995 20:43:21 -0500
qaStaHvIS 95-12-20 13:20:20 EST,
jIHvaD bepDI' charghwI', ghItlh:
>ghuy'Do,
>jabbI'IDlIj vIlaD vIneH 'ach vulqangan DaDataH. mu'mey law'qu' Dalo' 'ej
>qechmey law'qu' Dangach. muDoy'moH. poH yap vIghajbe'. qaparHa'qu' 'ach
>jabbI'IDlIj vIlaDchugh Qatlhqu' Qu'. latlh jabbI'ID vIwIvchoH vIneHchoH.
mu' law' vIqon 'e' vIqap, yabwIjvo' qechmey tIn vIlelnIS. qaDoy'moHchugh, vaj
HollaH DaqeqnIS. pab Dayaj 'e' 'olrupba' valwI'na', 'ach qubqu' tlhIngan
Holna' DachenmoHbogh. Hu'tegh, Qu' Qatlhvo' bIDoHqang'a' --- ghobe'. bIHoS,
'ej HoSlIj DaghurqangmoH 'e' vIHar.
Qanqor mIw Dalo'laH: qaStaHvIS wa' jar, DIvI' Hol yIlo'Qo'. SoH, latlh
Hoch'e' je lIDubmoHbej wanI'vam.
>muHoHbe' Doch 'ej Dochvam vISoplaHbe' 'ej Dochvam vISuvlaHbe' 'ej SajwIj
>'oHlaHbe' 'ej manga'chuqlaHbe' Dochvam jIH je, vaj yInchugh jISaHbe'.
bISaHbe'chugh, vaj qechwIj tIqelQo', 'ej ghItlhwIj yIqImHa'. qech Dajqu'
vIghItlhchoHmeH jaS HItungHa' SoH. tonSaw', veS je vIqelnISchoH'a' neH? Qo'
--- Sov law' vInejmeH jIDughqanglI', 'ej QeDna', lalDanmeyna' je vIghojqu'.
'ach toH, ghaytan labwI' ghomvaD qetlhqu' qa'ngerHey'e'. QeD lalDan je jojDaq
neH qechvetlh tu'lu'. 'a Su', jojvetlhDaq qaS wanI' Dajqu': reH chIch yol'a'
lujeStaH tej, lalDan'utlh je. wanI' DaSovlaH, loQ qun DaHaDchugh je.
QeD lalDan je jojDaq jItlheD 'ej jIcheghbe'. tlhIngan Hol yejHaD HablI'Daq
(ftp) ghItlh vIghItlhbogh tu'lu'. "wojnger" 'oH pongDaj'e'. QeDna' ghItlh
'oHbogh Datu'pu''a'? yIqIm, 'ej chay' DanoH jIHvaD 'e' yIja'; wanI'vam'e'
qachup.
naghmey DatoSlI'meH HoqmeylIj DaDel 'e' vItIv je jIH. tlhIngan Hol Dalo'taH
not 'e' yImev. jabbI'IDlIj DatIqmoHlaH je. tIqchugh jabbI'IDwIj, latlh
jabbI'ID yIwIvchoHQo' --- ghuy'cha', rap ghu'vam: HuD jen law', HuD latlh jen
puS. vaj HuD latlh DatoSlI' 'e' DamaS'a', jenqu'be'mo'? Qo'! HuD jenqu'
DawIvchugh, vaj HoSlIj DaghurmoH 'ej laHlIj DaDubmoHbej. jenbe'bogh HuD
latlh'e' wIv buDwI' neH. buDwI' SoHbe'mo', qatlh jabbI'IDwIj tIqmo' bIbeptaH?
va, 'e' vISovbe'.
SovlIj yIvuS, chaq nach Homvo' nIjmo' yab.
--ghuy'Do