tlhIngan-Hol Archive: Mon Dec 13 00:59:34 1993
[Date Prev][Date Next][Thread Prev][Thread Next]
paghmo' tin mis: 2nd half, 2/1 and 2/2
- From: [email protected] (Nick NICHOLAS)
- Subject: paghmo' tin mis: 2nd half, 2/1 and 2/2
- Date: Mon, 13 Dec 93 19:59:19 EDT
'el *be'neDIq*
Ben: jaw *tlhaw'DIyo* SoH'a'?
tlh: vInIb
Ben: Ha', chotlhejqang'a'?
tlh: nuqDaq?
Ben: banglojghachSorDaq, malja'lIj DaQorghmeH, jawoy
chay' tugh mop DatuQ?
tugh mang mop rur'a' Qeymo'?
tugh Suy mop rur'a' QeyHa'mo'?
mop DatuQnIS, tugh bImobmo'
*Hero*lI' tlhaplaw'ta' joH
tlh: ghaH tIvjaj
Ben: QIchvammo' qejHa'bogh Ha'DIbaH mechwI' Darur
targh ngevlu', QIchvam rurwI' lo'lu'taHvIS
ghu'vam Duta' joH, not 'e' DupIH'a'?
tlh: qajatlh: HIDoH
Ben: toH! DaH leghlaHbe'wI' Darur bIqIpmo'
SoHvo' Ha'DIbaH nIHta' loDHom'e'
'ej tlhaq DaHIvlaw'
tlh: choDoHqangbe'chugh, qaDoH
mej
Ben: va, 'erpuqvam rIQ vIvup
tugh ngemHomDaq So''eghlaw'
'ach mughov 'ej mughovHa' jaw *be'terIS* jay'!
joH qoH! ghay'cha', ghaytan pongvam lo'lu' jItlhaQmo'
ghaytan qaS, 'ach ghuvammo' jIquvHa''eghlaH
ghu'vam 'oHbe'bej jInoyghach
noDbogh taHqeq Damo' *be'terIS*,
wo'vaD ja'wI' ghaHmeH Sugh'egh ghaH, 'ej mubuSbogh QIchvam maqlI'
vaj, jInoD jInoDDI'
'el joH *pe'tlho*, *Hero*, *le'ona'to* je
qP: toH, jaw, nuqDaq ghaH jaw *tlhaw'DIyo*'e'?
Daleghpu''a'?
Ben: va, joHwI', joSjoH vIData'
naDev vItu'DI', yaHDaq SaHbogh yaS rur, mobmo'
vIja'neS ;ej vIt vIja' 'e' vIHarneS:
jawbe'vam muSHa'ghach Suqta' joH
'ej banglojghachSorDaq vItlhej 'e' vIchup
choSlu'mo', mobbogh ghaHvaD mop vIchenmoHmeH vItlhej
pagh, Huplu'nISmo', ghaHvaD 'oy'naQ vIchenmoHmeH vItlhej
qP: Huplu'nIS'a'? nuq HeSDaj?
Ben: DuSaQghot 'urmang
chalHa'DIbaH juH Sampu'mo', Quchqu'
vaj, tlhejwI'DajvaD 'oH 'ang
'ej nIH latlh
qP: 'urmang 'oH voqghach'e' 'e' DarHarmoHqang'a'?
'urmang vangta' nIHwI''e'
Ben: 'ach 'oy'naQ chenmoHlu'chugh, lI'bej,
mop chenmoHlu'chugh je
mop tuQlaH ghaH,
'ej 'oy'naQ lo'taHvIS, SoH'e' DuqIplaH,
chalHa'DIbaH juHDaj DanIHmo' 'e' vIHar
qP: bIHvaD chuSchu'ghach neH vIghojmoH
'ej tugh ghajwI'vaD vIchegh
Ben: Dajatlhghach tobchugh chuSchu'ghachchaj,
va, DajatlhvIS bI'Il
qP: DuSollaw' jaw *be'terIS*
ghaH ja' vIHtaHvIS tlhejbogh ghot:
nI'oy'law'qu' pumDaj
Ben: Qu'vatlh, tIchtaHvIS, jIH SIQ law' nagh SIQ puS'!
jangqang wa' beQwI' SuD ghajbogh Sor'e'
yInchoH 'ej qunchoH qabjechwIj'e'
mujatlh, jIH jIH 'e' Harbe'taHvIS:
joH qoH *be'neDIq*
ghaH Dal law' vulqan ghIQghach Dal puS
jIHDaq tlhaQghach tlhaQghach latlh je vI'moHtaHvIS,
po'ghachDaj vIyajlaHbe'
ghu'vammo' DoS vIrur, 'ej mubach mangghom naQ
taj jatlh, 'ej DuQ mu' Hoch
DelghachDaj rurchugh tlhuHpIwDaj rIQmoHmo',
vaj, retlhDajDaq yInlaH pagh;
vaj, mungHov ngejba'
Hoch'e' nobbogh qeylIS ghajchugh ghaH, vISawQo'
ghojmoq Da SuvwI' 'e' raDlaH ghaH
'ej qul chenmoHmeH pu'beHDaj nge'laH
Ha', ghaH wIbuSQo'jaj
Sut QaQ tuQ veqlargh 'e' Datu'ba'
ghaH DoHmoHjaj wa' qa'yaS jay'
chaq ghe''orDaq jay vay';
chaq chIrghDaq jat vay';
naDev ghaHtaHvIS, ghu'vetlh rap ghu'vam
'ej ghe''or lujaHmeH quvHa'eghmoH ghotpu',
ghaH tlhejmo' jatHa'ghach, Hajghach, Sotghach je Hoch
'el *tlhaw'DIyo*, *be'terIS* je
qP: yIqIm
chol ghaH
Ben: qo' HeHDaq SoHvaD Qu' vay' vIvangmeH bIra'rupneS'a'?
yuQbIngDaq jIjaHrup, Qu' ramqu'vaD chongeHmeH Da'oghchugh
DaH DenIbya' mIch Hopqu'vo' mavjop qaSuqrup
neHmaHvo' yuch qaqemrup
*qarDaS* voDleH rol wa' pob qaSuqrup
SoHvaD tera'Daq neH Duy'a' vIDarup
ghu'meyvam Hoch vImaS law' wanI'vam vImaS puS:
wej mu' wIjatlhtaHvIS, veqlarghHeyvam vItlhej
pagh Qu' chovangmoHqang'a'?
qP: pagh, 'oHbechugh jutlhejghach QaQ'e'
Ben: Qu'vatlh, qaH, nay'vam vIpar
qawwI' *jat* vISIQlaHbe'
mej
qP: Ha', jaw, Ha'
jaw *be'neDIq* DachIllaw'
Bet: HIja', joHwI'
tIqDaj munoj, qaStaHvIS ru'wI'
'ej 'oHmo' Huchpop vInob
wa' tIqDajvaD cha' tIqwIj vInob
ghay'cha', SuDghach ngor lo'taHvIS, jIHvo' 'oH SuqmeH ta'pu'
vaj, Dachal bIja'laHlaw'neS
qP: DanaDHa'ba'ta', jaw, DanaDHa'ba'ta'
Bet: munaDHa'law'ta' vIneHQo'ba'
munaDHa'chugh, qoH SoS jIH net tob
jaw *tlhaw'DIyo*'e' vISammeH chongeHbogh vIqemta'
qP: toH, nuqneH, jaw?
qatlh bI'IQ?
tlh: jI'IQbe', joHwI'
qP: vaj, chay'? bIrop'a'?
tlh: ghobe', joHwI'
Bet: 'IQbe' 'ej ropbe' 'ej Quchbe' 'ej pIvbe' jaw
'ach Hoj jaw
Hoch chaw'
'ej Hochmo' Qay'rup
qP: va, jawwI', teH DaDelghach 'e' vIHar
'ach Qay'rupchugh, vI'Ip: ngeb vuDDaj
SuH, *tlhaw'DIyo*, ponglIj vIlo'taHvIS, muSHa'moHghach vIjatlh
'ej laj *Hero* 'IH
vavDajvaD vIQumta' 'ej puQHa'ghachDaj vISuqta'
tlhogh jaj yImaq, 'ej bIQuchjaj
L: jaw, jIHvo' puqbe'wI' yItlhap
'ej ghaH tlhejjaj mIpghachwIj
tlhoghvam qaSmoHta' joH
tlhoghvam QaHmeH tay' juH
Bet: yIjatlh, jaw
'e' chup tlha'ghach
tlh: QuchghachvaD QumyaS pupqu' 'oHchu' jatlhQo'ghach'e'
puS jIQuchghach, 'ar jIQuch vIjatlhlaHchugh
jaw, choghaj, vaj, qaghaj
SoHvaD jIjegh'egh 'ej mechghachvam vIHo'
Bet: yIjatlh, be'nI''a'
bIjatlhbe'chugh, chopghach Dalo'taHvIS nujDaj yInIS
'ej jatlh 'e' yIchaw'Qo'
qP: va, jaw, tIq Quch Daghajba'
Bet: HISlaH, joHwI'
qoHoyvam, tIqwIj vItlho'
SaHghach 'o'Daq ratlhtaH
nachDajDaq jatlh be'nI''a'wI':
tIqwIjDaq SoH
tlh: Dochvam jatlhbej, be'nI''a'
Bet: QI'yaH, pay' qaS boq
ghu'vetlh lughoS Hoch
vIghoSQo' jIH neH 'ej Hurgh DIrwIj
HeHDaq jIpa'laH 'ej jIjachlaH:
loDnal vISuqjaj, Ha'
qP: jaw *be'terIS*, SoHvaD wa' vISuq
Bet: wa' Sung'e' ngaSbogh qorDu'lIj vImaS
Dururbogh loDnI' vay' DaghajneS'a'?
loDnalpu' pov lIngpu' vavlI',
wa' SulaHchugh be'
qP: choSuqqang'a', jaw?
Bet: ghobe', joHwI', vumghach jajvaD latlh vIghajlaHbe'chugh
jaj Hoch qatuQghachvaD bIwarghqu'
'a chonoDHa'neSjaj
tlhaQghach Hoch, pagh potlh je vIjatlhmeH jIbong
qP: mumaw bIjatlhQo'ghach
'ej SoHvaD qaq bItlhaQghach, bIboghbejmo' qaStaHvIS rep Quch
Bet: ghobe', joHwI'
SaQtaH SoSwI', qaSDI'
'ach pa' vIHchu' Hov
'ej Hovvam bIngDaq jIboghpu'
be'nI''a' loDnI''a' je, SuQuchjaj!
L: be'nI'puq, Doch vItlhobbogh DaQorghrup'a'?
Bet: QI'yaH, jIHvaD pung Daghajjaj, SoSloDnI'
chonoDHa'neSjaj
mej
qP: ghay'cha', belmoH jawvam Daghach
L: ghaHDaq puS 'Itghach 'Iw
not 'IQ Qongbe'chugh
'ej QongtaHvIS pIj 'IQbe'
ja' puqwI' 'e' vIQoypu':
pIj QuchHa'ghach naj, 'ej vemDI' Hagh
qP: loDnal buSbogh QIch'e' SIQQo'
L: not SIQ
SawqangwI' Hoch vaq 'ej chaHvaD vaQ
qP: *be'neDIq*vaD be'nal pov mojlaH
L: botjaj joH'a', joHwI'
qaSpu'DI' tlhoghchaj Hogh, jawtaHmo' maw'choH chaH
qP: jaw *tlhaw'DIyo*, chIrgh DajaH, ghorgh 'e' DaHech?
tlh: wa'leS, joHwI'
Qong poH, tayDaj'e' wej ghajtaHvIS muSHa'ghach
L: wej qaSDI' jajwa', Qo', puqloDoy
Soch jaj 'oH chuqDaj'e'
nI'be'qu' je poHvam, yabwIj luyonchugh ghu' Hoch
qP: Ha', nachlIj Datlhe', nI'mo' bIloSghach
'ach qalay', *tlhaw'DIyo*, maHvaD Dalbe' juSbogh poH
wej qaStaHvIS, ra'ghomquv wa' Qu' vInID
muSHa'chuqghach HuDDaq jaw *be'neDIq* jaw *be'terIS* je vIqem
tlhogh vIqaSmoHqang
'ej vIqaSmoH 'e' vIHonbe', boQghach SaghojmoHbogh bovangchugh wej tlhIH
L: joHwI', qatoy'rup, jIHvo' wa'maH ram Qongghach nge'chugh
tlh: qatoy'rup je, joHwI'
qP: chotoy'rup'a' je, *Hero* quv?
H: loDnal QaQ naymeH be'nI''a'wI' vIboQmeH, Qu' qetlh Hoch vIvangrup, joHwI'
qP: 'ej *be'neDIq* 'umbe' law'be' SawlaHwI' Hoch latlh 'umbe' puSbe'
wanI'vammo' vInaDlaH:
quvwI' Da
yoHghachDaj tob
'ej yuDHa'ghachDaj 'ang
chay' *be'neDIq* muSHa'choHmeH be'nI''a'lI' Dangor, 'e' qaghojmoH
'ej *be'neDIq* vISIghmo', SuboQtaHvIS cha' tlhIH,
*le'ona'to*, *tlhaw'DIyo* je jatlh
qP: *be'terIS* muSHa'choH 'e' lubotbe' tlhaQghachDaj ghuH, burghDaj bergh je
ghu'vam wIta'laHchugh, SuvwI' ghaH 'e' mev bangjoH'a'
quvDaj wIghaj, muSHa'ghach joH'a'pu' chaHmo' maH, pagh latlh je
jI'eltaHvIS, HItlhej 'ej vIHechghach Saja'
mej chaH
2.2.
'el qaH *jon*, *bora'chIyo* je
qJ: qaS ghu'vam
*le'ona'to* puqbe' Saw jaw *tlhaw'DIyo*
Bor: HIja', joHwI', 'ach vIbotlaH
qJ jIHvaD Hergh 'oH tuchghach Hoch'e', botghach Hoch'e', nISghach Hoch'e' je
mubelHa'moHmo' jIrop
neHghachDaj boQHa'chugh vay', neHghachwIjvaD qay'Ha'
chay' tlhoghvam DabotlaH?
Bor: jIyuDHa'taHvIS, vIbotlaHbe', joHwI'
'ach jIpeghlaHmo', jIHvaD nargh pagh yuDHa'ghach
qJ: nom chay' Dabot 'e' HIQIj
Bor: muparHa' *ma'rIgharet*, *Hero* boQtoy'wI',
wa'ben qaja'neS 'e' vIHar
qJ: vIqaw
Bor: qaSDI' nuQbogh ram poH Hoch,
pInDaj QongDaqpa' lojmItHomDaq bejmeH vIra'laH
qJ: tlhoghvam HeghvaD ghu'vam yIn nuq?
Bor: ghu'vam tar DaDuDnIS SoH
loDnI'lI'Daq, joHDaq yIjaH
Dajatlh 'e' yIlIjQo'
bIquvHa'eghlaw', batlhDaj vIvuvghach *tlhaw'DIyo* noyvaD,
taHqeq lam rurbogh *Hero*'e' DanaymoHmo'
qJ: wanI'vammo' nuq tobghach vInob?
Bor: yapbogh tobghach
'oHmo' joH mISmoHlu',
*tlhaw'DIyo* SotmoHlu',
*Hero* quvHa'moHlu',
'ej *le'ona'to* HeghmoHlu'
pop latlh Danej'a'?
qJ: chaH vIrIQmoHmeH, Hoch vInIDrup
Bor: vaj, yIjaH
qaH *pe'tlho*, jaw *tlhaw'DIyo* je mob DatlhejmoHmeH, rup HISam
*bora'chIyo* muSHa' *Hero* 'e' vISov, tIjatlh
joHvaD *tlhaw'DIyo*vaD je bIngotlh 'e' tImaq
tlhoghvam SawmoHghach loDnI'lI' batlh Davuv je
'ej be'qoqmo' noyghachDaj Davuvghach jupDaj ngorlu'
vaj, Datu'ta' yIjatlh
qaSbe'chugh meqba', luHar
DuHqu'bogh tobghachmey tIchup
QongDaqpa' lojmItHomDaq mulegh chaH
*ma'rIgharet*vaD *Hero* vIpong 'e' luQoy
jIHvaD *tlhaw'DIyo* mupong *ma'rIgharet* 'e' luQoy
qaSDI' ramvam, luleghmeH tIqem, qaSpa' tlhogh Hechlu'bogh
qaStaHvIS poHjoj, Dach *Hero* 'e' vIqaSmoH
narghchoH *Hero* matlhHa'ghach vItHey
vaj, DIchvaD voqHa'ghach ponglu'
'ej qeqghach Hoch nISchu'lu'
qJ: mojlaHbogh ghu' joch mojchugh, vIvangqang
DavangtaHvIS bI'ongchugh, SoHvaD pop 'oH SanID DeQ'e'
Bor: bIpumtaHvIS bIqapchugh, mutuHmoHbe' jI'ongghach
qJ: DaH tlhoghchaj jaj vISovmeH jIjaH
mej chaH
--
***
"Relax." -- "yIleS." [Three seconds pause.] "Stop Relaxing!" -- "yIleSHa'!"
--- the Conversational Klingon tape.
Nick "I am not a Klingon. Much." Nicholas. [email protected]
nIchyon jIH. nIchyon SoHbe'. nIchyon ghaHbe'. nIchyon tlhIHbe'. nIchyon jIHqu'.