tlhIngan-Hol Archive: Sun Dec 12 20:21:17 1993
[Date Prev][Date Next][Thread Prev][Thread Next]
KBTP: _marqoS_ 'ay' jav
- From: [email protected] (Nick NICHOLAS)
- Subject: KBTP: _marqoS_ 'ay' jav
- Date: Mon, 13 Dec 93 15:20:37 EDT
pa'vo' mej 'ej juHpuHDaj ghoS 'ej ghaH lutlha' ghojwI'pu'Daj
qaSDI' *Sabat* chIrghDaq ghojchoHmoH
'ej 'Ijbogh law'wI' merlu' jatlhtaHvIS chaH:
nuqvo' ghotvamvaD Dochvam noblu'?
ghotvamvaD valghach noblu'bogh,
ghopDuDajmo' qaSbogh HoSghajmeyvam je nuq?
'aHchenmoHwI'vetlh ghaH ghotvam'e',
*marI'ya* puqloD,
*ya'qoboS* *yoSeS* je *yu'DaS* je *SImon* je loDnI' ghaH, qar'a'?
naDev retlhmajDaq yIn be'nI'pu'Daj, qar'a'?
'ej chaH maw ghaH
chaH jatlh *yeSuS*:
pagh nemSovwI' quvHa'moHlu',
juHpuHDajDaq qorDu'Daj jojDaq je juHDajDaq je tu'lu'be'chugh
pa' pagh HoSghaj vanglaH, ropwI' puS vorbe'chugh, HotDI' ghopDu'Daj
ghaH mer voqbe'ghachchaj
vemghommey SumDaq leng ghojmoHtaHvIS
lucholmeH wa'maHcha' lura'
cha' cha' je ngeHchoH ghaH
chaHvaD qa' lam woQ nob
HevaD pagh lutlhapmeH lura', wa' naQ 'oHbe'chugh
Soj, ngaSwI', DeQ'e' ngaSbogh qogh je lutlhapQo'
'ach *SanDal* baghghach waq tuQ 'ej cha' yIvbeH tuQQo'
chaH jatlh:
vogh'e'Daq juH bo'elchugh, pa' peratlh, Sepvetlhvo' wej SuDoHtaHvIS
lIlajQo'chugh mIch vay''e' 'ej lI'IlQo'chugh
pa'vo' SuDoHtaHvIS, pummeH tobmeH qamDu'raj bIng lam yIteq
mejDI' chaH, yemghachchaj paymeH SoQ luja'
qa' lam law' DoHmoHtaH 'ej HumghachtIQ lulo'taHvIS ropwI' law' ngoHtaH
'ej vortaH
Qoy ta' *Hero'DeS*, noychoHmo' pongDaj 'ej lujatlh:
Heghpu'wI'vo' vempu'law' taymo' Say'moHbogh *yo'a'neS*
wanI'vammo' ghaHDaq HoSghajmey luchu'lu'
jatlh latlh:
ghaH *'elIya*'e'
jatlh latlh:
ghaH leSSovghot'e' rapbogh wa' leSSovghotpu'vetlh quv
QoyDI' jatlh *Hero'DeS*:
vempu'law' *yo'a'neS* vImuHbogh
ngeHDI' *Hero'DeS*vam, *yo'a'neS* qop
'ej loDnI'Daj *pI'lIpoS* be'nal *HeroDIyaS*mo' bIghHa'Daq yon, ghaH Sawmo'
*Hero'DeS* jatlhmo' *yo'a'neS*:
loDnI'Daj be'nal DaSaw ney chaw'be'
ghaHvaD noDqang *HeroDIyaS*
HoHqang 'ej HoHlaHbe'
*yo'a'neS* Hajmo' *Hero'DeS*
ghaH ruv quv je loD'e' 'e' Sov
QantaH 'ej 'IjDI' mISqu' 'ej 'IjtaHvIS tIvtaH
qaSDI' poH lo'laH, qoSDajmo' chuQunDajvaD la'pu'DajvaD je,
*ghalIla'ya* potlhghotpu'vaD je 'uQ qaSmoHDI' *Hero'DeS*,
'elDI' *HeroDIyaS*vam puqbe' 'ej vIHchu'taHvIS,
*Hero'DeS* ghomwI'pu' je belmoH
be'Hom jatlh *Hero'DeS*:
vay''e' DaneHbogh HItlhob, vaj qanob
'ej ghaHvaD 'Ip:
vay''e' DaneHbogh qanobrup
wo'wIj bIDDaq 'e' vIvuS
'elDI', SoSDaj jatlh:
nuq vItlhob?
'ej jatlh:
taymo' Say'moHbogh *yo'a'neS* nach
ta'Daq SIbI' 'elDI' moDtaHvIS, tlhob jatlhtaHvIS:
SIbI' beQwI'Daq Say'moHwI' *yo'a'neS* nach qanob vIneH
'IQqu'choHtaHvIS ta', 'Ipmeymo' SaHwI'pu'mo' je ghaHvaD nobQo' neHbe'
SIbI' 'avwI' ngeHDI' ta', nachDaj qemmeH ra'
mejpu'DI', bIghHa'Daq nachDaj teq 'ej beQwI'Daq nachDaj qem 'ej be'HomvaD nob
SoSDajvaD nob be'Hom
luQoyDI' ghojwI'pu'Daj, ghoS 'ej lomDaj luwoH 'ej molDaq lulan
*yeSuS*Daq ghom ghojwI'pu'Daj
Hoch luvangpu'bogh 'ej ghojmoHpu'bogh lumaq
chaH jatlh:
Ha', Daq chImDaq nIteb loQ peleS,
law'mo' ghoSwI'pu' yaHwI'pu' je 'ej chaHvaD yapbe' Soj'e'
'ej Daq chImDaq nIteb DujDaq mej chaH
yaH chaH 'e' lulegh 'ej lutlhoj law'wI'
qamDu'chaj lo'taHvIS, venH Hochvo' pa' ghommeH qet 'ej chaH nung
'elDI', ghom'a' tIn legh, 'ej chaH vup, rurmo' 'avwI' lughajbe'bogh Qoghmey'e'
'ej chaHvaD law'wI' ghojmoHchoH
paSchoHDI', ghaH lucholDI', lujatlh ghojwI'pu'Daj:
chIm Daqvam 'ej paSchoH
mejDI', Du'mey venghommey je DechDaq luSopmeH vay' luDIlmeH,
lumejmeH tIra'
jangtaHvIS jatlh:
SopmeH chaH bonob tlhIH
'ej lujatlh:
mamejDI', cha'vatlh DeQ tIrSoj wIDIl'a' 'ej SopmeH DInob'a'?
chaH jatlh:
ghorgh tIrSoj boghaj? 'e' boleghmeH peyaH
luSovDI' jatlh:
vagh, cha' bIQHa'DIbaH je
tI SuDDaq QotmeH ghomHom ghomHom je, Hoch lura'
Qot vaghmaH ghot ghommey, vatlh ghot ghommey je
vagh tIrSoj cha' bIQHa'DIbaH je tlhapDI', chal bejDI',
tIrSojmey noDchu' 'ej ghor
'ej chaHDaq lanmeH ghojwI'pu'DajvaD nob 'ej HochvaD cha' bIQHa'DIbaH wav
Sop Hoch 'ej luyonlu'
chuvmey wa'maHcha' ngaSwI' naQ woH
bIH je bIQHa'DIbaH chuvmey'e'
vaghSaD chaH tIrSoj Sopbogh ghotpu''e'
SIbI' Duj lutIjmeH 'ej *betlhSayDa* retlhDaq lunungmeH ghojwI'pu'Daj luraD,
ghom'a''e' wej mejmoHtaHvIS
chaHvo' mejDI', HuDDaq joH'a'vaD jatlhmeH DoH
ram qaSchoHDI', ngeng botlhDaq 'oH Duj'e' 'ej puHDaq mob ghaH
Duj luvo'taHvIS luqay'lu' 'e' leghDI', chaH boQHa'mo' SuS,
qaSDI' ram 'avwI'poH loSDIch SumwI',
chaH chol, ngengDaq vIttaHvIS
'ej chaH puS neHlaw' ghaH
ngengDaq vIt ghaH 'e' luleghDI', ghaH Heghpu'wI' qa''e' 'e' luHar 'ej jach,
luleghmo' Hoch 'ej Sot
SIbI' Hochchaj ja' 'ej jatlh:
peyoH! jIHbej; peHajQo'!
chaHDaq Duj Sal 'ej pujchoH SuS
yay'qu'bej chaH,
tIrSoj ghu' luyajbe'mo' 'ach ley tIqchaj
puH lupawDI', *gheneSaret* lughoS 'ej vergh
Dujvo' mejDI', SIbI' lughovDI',
mIch naQDaq leng qettaHvIS chaH, 'ej QongDaqDaq rupwI'pu' qemchoH,
vogh'e'Daq ghaH 'e' luQoychugh
venghom veng ghap Du' ghap vay' 'elchugh, ngevghachyotlhDaq pIvHa'wI'pu' lan,
'ej mopDaj HeH neH luHotmeH lutlhob
ghaH luHotbogh Hoch'e' lutoDlu'
--
***
"Relax." -- "yIleS." [THree SeconDS pauSe.] "Stop RelaxIng!" -- "yIleSHa'!"
--- tHe ConverSatIonal KlIngon tape.
NIck "I am not a KlIngon. Much." NIcholaS. [email protected]
nIchyon jIH. nIchyon SoHbe'. nIchyon ghaHbe'. nIchyon tlhIHbe'. nIchyon jIHqu'.