tlhIngan-Hol Archive: Mon Dec 06 18:44:45 1993
[Date Prev][Date Next][Thread Prev][Thread Next]
KBTP: _marqoS_ 'ay' vagh
- From: [email protected] (Nick NICHOLAS)
- Subject: KBTP: _marqoS_ 'ay' vagh
- Date: Tue, 7 Dec 93 13:43:56 EDT
ngeng Dop latlhDaq, *gheraSenoS* puH lughoS
Dujvo' mejDI' ghaH,
SIbI' molveyvo' qIH molmeyDaq juH ghaHbogh qa' lam ghot'e'
mIr, latlh Hoch joq lo'taHvIS, baghlaH pagh
pIj qamnaQ mIr je lo'lutaHvIS baghlu'
'ej mIr ghor 'ej qamnaQ Qaw'
ghaH SeHmeH HoSlaH pagh
qaStaHvIS pem ram je Hoch, molmeyDaq HuDmeyDaq je ghaHtaH,
jachtaHvIS 'ej nagh lo'taHvIS pe''eghtaHvIS
HopwI'Daq *yeSuS* leghDI', qet 'ej ghaHDaq tor
QIch HoS jachtaHvIS jatlh:
jIHvaD SoHvaD je malja' nuq, *yeSuS*, joH'a' jenqu' puqloD?
joH'a'vaD qa'IpmoH: HIjoy'Qo'
ghaH jatlhmo':
ghotvo' yIDoH, qa' lam!
ghaH yu':
SoHvaD nuq pong?
'ej jatlh:
jIHvaD pong 'oH yo', malaw'mo'
puH HurDaq chaH ngeHbe'meH qoy'qu'
pa', HuD retlhDaq 'oHtaH Sopbogh *pIgh*mey Ha'DIbaH quvHa' ghom tIn
luqoy' lujatlhtaHvIS:
*pIgh*mey DI'elmeH, bIHDaq ghongeH
chaH luchaw'
mejDI' qa'mey lam, *pIgh*mey 'el
qoj ghIrtaHvIS, ngengDaq moD ghom
cha'SaD bIH
ngengDaq bIQmo' luvoQ
Haw' bIH Qorghbogh ghotpu''e' 'ej vengDaq lumaq
'ej qaS nuq 'e' luleghmeH ghoS chaH
*yeSuS* lughoS
pa'taHvIS, tuQmoHlu'ta' 'ej maw'Ha' yo' ghajbogh qa' lam ghot'e',
'e' lulegh 'ej Haj
chaHvaD qa' lam ghot qaSghach, *pIgh* qaSghach je ja' luleghpu'bogh ghot
veHchajvo' mejmeH ghaH luqoy'choH
Duj tIjtaHvIS ghaH, ghaH tlhejmeH qoy' lam ghajpu'wI'
chawbe' 'ach ghaH jatlh:
juHlIjDaq ghotpu'lI' yIjaH
nuq Duvang joH'a' 'ej pungghot Da, 'e' tImaq
mej
ghaHvaD nuq vang *yeSuS*, *Deqa'polIS*Daq 'e' maqchoH
'ej yay' Hoch
DujDaq ngeng Dop latlh ghoSqa'pu'DI' *yeSuS*, ghaHDaq ghom ghom'a' tIn
ngeng retlhDaq ghaH
ghoS wa' chIgh DevwI'
pongDaj 'oH *ya'eyroS*
ghaH leghDI', qamDu'DajDaq pum
'ej ghaHvaD qoy'qu' jatlhtaHvIS:
tugh Heghlaw' puqbe'oywI'
bIghoSDI' ghaHDaq, toDlu'meH 'ej yInmeH, ghapDu'lIj Dalanjaj
ghaH tlhejmeH mej
tlha' ghom'a' tIn 'ej ghaH 'uy
qaStaHvIS wa'maHcha' DIS, be'vo' chIl 'Iw
be''e' Qorgh Qel law'
Huch Hoch ghajbogh lo'ta'
'ej Dubbe' 'ach ghaytan 'argh
*yeSuS* buSbogh QIch'e' Qoypu'DI', ghom'a' ghoSpu'DI', mopDaj Hot,
jatlhmo':
mopDaj neH vIHotchugh, vItoDlu'
SIbI' QaDchoH 'IwDaj Hal
Sengvo' vor, porghDajmo' 'e' tlhoj
ghaHvo' Haw' HoSghaj, SIbI' 'e' tlhojDI' *yeSuS*,
ghom'a'Daq tlhe''egh 'ej jatlh:
mopwIj Hot 'Iv?
'ej lujatlh ghojwI'pu'Daj:
Du'uybogh ghom'a' Dalegh, 'ej Hot 'Iv Dayu''a'?
wanI'vetlh vangwI' leghmeH bejchu' ghaH
HajchoHtaHvIS 'ej QomtaHvIS, ghaHvaD qaS nuq 'e' SovtaHvIS,
ghoS 'ej ghaHDaq pum be' 'ej ghaHvaD vIt Hoch ja'
jatlh ghaH:
puq, DutoDpu' bIvoqghach
qojDaq yIyaH
SenglIjvo' yIpIv
wej jatlhpu'taHvIS, chIrgh DevwI' juHvo' ghoS, jatlhtaHvIS:
Heghpu' puqbe'lI'
ghojmoHwI' DaSeng, qatlh wej 'e' Damevbe'?
bong QIch lujatlhbogh QoyDI' *yeSuS*, chIrgh DevwI' jatlh:
yIHajQo' 'ach yIvoqtaH
ghaH tlhejmeH pagh chaw',
*pe'tlhoS* *ya'qoboS* ghap, *ya'qoboS* loDnI' *yo'a'neS* ghap ghaHbe'chugh
chIrgh DevwI' juH lughoS
chuSghach legh
SaQlu' je 'ej jachqu'lu'
'elDI' chaH jatlh:
qatlh SuchuS 'ej SuSaQ?
Heghpu'be' puq 'ach Qong
lunuS
Hoch DoHmoHpu'DI' ghaH, puq vav, SoS je, ghotpu'Daj je tlhejmoH
'ej puq Daq 'el
puq ghap HotDI', ghaH jatlh:
talItlha qum
'oH mughpu'bogh 'oHbej
puqbe'oy, qajatlh, yIQotHa'!
SIbI' QotHa' puqbe' 'ej yIt
wa'maHcha' DIS ghaj
yay'ghach Dun lughajtaHvIS yay'choH
wanI'vam SovmeH pagh, lura'qu', 'ej jatlh:
SojmeH ghaH yInob
--
***
"Relax." -- "yIleS." [THree SeconDS pauSe.] "Stop RelaxIng!" -- "yIleSHa'!"
--- tHe ConverSatIonal KlIngon tape.
NIck "I am not a KlIngon. Much." NIcholaS. [email protected]
nIchyon jIH. nIchyon SoHbe'. nIchyon ghaHbe'. nIchyon tlhIHbe'. nIchyon jIHqu'.