Oregon Shakespeare Festival

qonta' pagh

qen Ashland, Oregon vIjaH 'ej wej Oregon Shakespeare Festival much vIbej. pagh much vIbejbogh qon Shakespeare, 'ach Daj 'ej pov Hoch.

much wa'DIchvaD Oo-Bla-Dee ponglu'. Jazz SuSwI', QoQ ghom muvbogh je qel lut. Gin Del Sol (jIn) pong'egh. be' ghaH SuSwI''e', 'ej qIj DIrDaj. yInDaj QatlhmoH ngoDvam. tera' DIS wa'SaD Hutvatlh loSmaH jav qaS wanI'. qen rIn noH'a'. juHchaj cheghlI' Harghta'bogh loDpu', 'ej choHqa' be'pu' Qu'. DachtaHvIS loD law', loD Qu' motlh ta'nIS be'pu', 'ach DaH cheghmo' loDpu', loDpu', juH, qorDu' je Qorgh be'pu' net pIH. Qatlhqu' qIjwI' yIn. batlh Harghta' qIjbogh mang law', 'ach cheghDI', qIjwI' neH chaH 'e' Har rewbe' law'. rut lengtaHvIS muchwI'pu' luHoHlu' 'e' lupIH, qIjmo' neH DIrchaj.

tlham lobQo' jIn. wejben HarghmeH mej loDDaj 'e' wItu', 'ach loSqangbe' jIn. ngoQDaj'e' pabnISmo', lengchoH ghaH 'ej QoQ much. po'qu' ghaH - Dunbogh SuSwI' law' rurlaH - 'ach wej QoQna'Daj jonta'. tugh QoQ ghom muv. be' chaH Hoch muchwI'pu''e'. Huj ghomvam net tu', 'ej pIj nuSlu', 'ach po'qu' 'ej pov QoQDaj. noy ghom DevwI' - Dunbogh muchwI' law' tlhejpu' - 'ach qen lIjlu'law'. wej ben QoQ taDaj Qav qonta', 'ej not latlh qon net pIH. SanDaj choHlaH ghomvam 'e' tul. noybe' latlh muchwI'pu', 'ach noychoH luneHbej. lengtaH ghom 'ej muchtaH, 'ej loQ muchwI' yIn lu'anglu'. parmaq Dach luqel, 'ej qorDu' lonbogh luqaw. Qap ghom: Chicago lujaH, 'ej pa' Dojchugh, vaj QoQ ta chu' luqon net lay'.

reH jIn qel lut, 'ej reH QoQna'Daj nejtaH jIn. QoQ le' jonlaHchugh, vaj yIn, poH je yajlaH net Har. ChicagojaHbej muchwI'pu', 'ach pa' qaS wanI'mey Huj vI'angQo'bogh. HoSghaj QoQ muchlu'bogh, 'ej wab Qav QoyDI' chaq mev poH. jIn lIjlaw'lu'pu', 'ach ramvetlh qawlu'taH.

much cha'DIchvaD Fuddy Meers ponglu'. taghDI' much, QongDaqDaq vem be'. pa' 'el be' loDnalHey 'ej QIjchoH: Hoch jaj vemDI' be' pagh qawlaH. tlhetlhtaHvIS jaj, jaj wanI' qawlaHbej, 'ach QongchoHDI', Hoch lIjchu'. Hoch po QIjnIS loDnal, 'ej be'vaD ghojmeH paq'e' gherta'bogh loDnal nob loDnal. motlhlaw' povam, 'ach tugh pImqu' net tu'. DachtaHvIS loDnalHey, QongDaq bIngvo' nargh loD, 'ej be' quch. be' loDnI' ghaH loD 'e' maq. be' HoH neH loDnalHey 'e' maq. be' SoS juH lujaH. loQ QapHa'mo' SoS yab, jatlhlaHchu'be'. jatlhDI' DapHey lIng. rut yajlu', 'ej rut tlhaQqu'. tugh paw latlhpu', 'ej QatlhchoHtaH ghu'.

tlhetlhtaHvIS much, qunDaj qawchoH be', 'ej latlh nuvpu' ghovchoH. 'Iv ghaH loDnalHey'e'? 'Iv ghaH loDnI'Hey'e'? 'Iv ghaH loDnI'Hey tlhejbogh DoghwI''e', 'ej qatlh sock puppet qengtaH? qatlh Hoch lIjtaH be'? rut tlhaQqu' wanI'mey 'anglu'bogh. rut Qob qoj Dogh qoj QeHmoH qoj QIp qoj 'IQmoH. qorDu' chaH HochHom nuvpu''e', 'ej qorDu' luDa. rut SaHchuq, 'ej rut QIDchuq. rInDI' much, roj chavlu', 'ej tlhetlh yIn.

much wejDIchvaD The Trip To Bountiful ponglu'. nap muchvam: motlh ghotpu''e' Delbogh lut, 'ej motlh poH, yoS je luDabbogh. qaSbe' wanI'mey Huj; HoSDo' tu'be'lu'. yIntaH neH wej nuv. HoustonDaq juH mach luDab loD, SoSDaj, be'nalDaj je. mIpbe' qorDu'. qaStaHvIS muchvam poH, roD Huch bajmeH vum loDpu' neH; juH, qorDu' je Qorgh be'pu' net pIH. 'ach wejben ropchoH loD, 'ej qaStaHvIS cha' DIS vumlaHbe'. pIvqa' 'ej vumqa', 'ach Hoch Huch polta'bogh natlhpu'. qanmo' SoS, qumvo' Huch puS Hev, 'ej Huchvam poQbej qorDu'. quv loD. be'nal SoS je SaHqu'. quv je SoS, be'nal je, 'ach parchuq. SoltaH SoS, be'nal je, 'ej rojnIStaH loD.

ben law', QuptaHvIS loD, vengHom mach luDab SoS, loD je 'ej Du' lughaj. vengHomvaD Bountiful (chepwI') ponglu'. Huj pongvam - DaH chepHa'qu' vengHom, Du'mey je. QIt ngablI' vengHom. DaH Dab SoS jupna' qan neH. vengHomDaj chegh neHqu' SoS, 'ach chaw'Qo' loD. SoSDaj Qan 'e' nIDlaw', 'ach 'IQmoH 'ej moghmoH neH. Huch Hevbogh So' SoS, 'ej lupwI' jey laDtaH. pIj chegh 'e' nID, 'ach not Qap. 'ach wa' jaj, vumtaHvIS loD 'ej DachtaHvIS be'nal, lupwI' vergh jaH. ghaH luSampa' loD, be'nal je, lupwI' tIj 'ej lengchoH.

lengtaHvIS, yInDaj qel SoS, 'ej wIqel je maH. latlh lengwI', vengHom retlh DabwI' je qIH ghaH. qaSpu'bogh poHmey'e' ja'chuq. tagha' chepwI'Daq paw be'. ben law' Du' ngevpu' be', 'ach Du' juH ngevbe'. DaH juHDaj chegh. ngaj ratlhmeH poHDaj, 'ach 'eyqu'. tugh paw puqloD, be'nal je (jup Duj ngIpta'), 'ej Houston luchegh. mejpa' be' qan, bIQ'a' SuS tlhuH, juHDaj letlhDaq ba', 'ej juHDaj Hot. ngoQDaj chavta', 'ej leS law' HeghDI', batlh Heghrup.

paQDI'norghHom

qonta' SuStel

tlhIngan Hol vIghojtaHvIS mutlhejtaHbe' jatlhmeH qoch. nIteb Hol vIghoj. rut qep'a'Daq jIjeS. ngugh loQ jIqeqlaH. jIHvaD yapbe'. 'a tlhIngan Hol ghojqangbe' Hoch vISovbogh.

Cold Spring Harbor Qulpa'mey De'wI' chamwI' jIH. mIpHa'be' Qulpa'mey. 'IH Qulpa'mey puH: Datvo' Cold Spring Harbor leghlu'; Dat Sormey lutu'lu'; naDev vum noybogh tej law'. yIn QeD luQul. pIj James Watson vIlegh megh vISoptaHvIS.

naDev jIvumchoHDI' Quintin vIqIH. Qulpa'mey chom ghaH. jIvIt: Qulpa'meyDaq tach tu'lu'! tach lutIv ghot law', 'ej Quintin parHa' Hoch. jIHvaD jatlhlu'pu': «Quintin yIqIH; tlhIngan nuHmey chenmoH.» toH! SIbI' vIqIH.

Daj tlhIngan Hol 'e' Qub Quintin, 'ej tlhIngan Hol pong wIv: vagh. (pongna'Daj mugh neH.) 'a maja'chuqDI' nuH Daj law' Hol Daj puS 'e' noH vagh. HetaQ paq tlhIngan tonSaw' ghaj 'ej laDpu'. tonSaw' Sar HaDtaH vagh. pIj tachDaq vIghom 'ej maja'chuq. tlhIngan Hol wIlo'be'.

wej Hogh ret qech chu' vIqel: tach'e' qelbogh mu'mey vagh vIghojmoHlaH! mupIlmoH Holtej «DaHjaj tlhIngan Hol mu'». vaghvaD DaHjaj tlhIngan Hol tach mu''e' vInob!

jItagh: HIq'e' ghaH vIghojmoH. ghIq qa'vIn'e' ghaH vIghojmoH. ghIq Dargh'e' ghaH vIghojmoH. mu'tlhegh'e' ghaH vIghojmoH: «DaH yIDIl!» QIt tlhIngan Hol ghojqu'lI' vagh!

tugh tlhIngan Hol wIlo'laH jIH vagh je maja'chuqtaHvIS. wej DuH 'a tugh qaSbej. tach vISuchDI' tlhIngan Hol neH wIlo'taH. chaq nuQoy latlhpu' 'ej Daj 'e' lunoH. maDo'chugh tugh tlhIngan Hol luSov tej law'!

yaHwIjDaq tlhIngan Hol vI'ang je. DaHjaj tlhIngan Hol mu'tlhegh vI'ogh 'ej vI'agh. DIvI' Hol jatlhwI'vaD vImugh je. motlh tlhaQ mu'tlhegh: DaHjaj mu'tlheghvam vIghItlh: «nIm ghaj'a'?» "Got milk?" Hagh Hoch 'a Do'Ha' pagh ghoj. 'a Qulpa'meyDaq jInoy: tlhIngan Hol jatlhwI' jIHbej!

chaq tlhIngan Hol'e' yaHlIjDaq DaghojmoHlaH je. DaHjaj mu' yIlo'choH. Dat tlhIngan Hol ghajbogh navHommey Hum'e' yIlan. ghogh HablI' DajangDI' yIjatlh nuqneH. bIDo'chugh vay' DapIlmoH 'ej tlhIngan Hol ghojchoH neH!