Jonah

qonwI': Seqram

‘amItay puqloD ghaHbogh yona’e’ Qum joH’a’, ‘ej ja’ <<SuH yIHu'! nInveyDaq veng tInDaq yIghoS 'ej 'oHvaD yIjach jIHDaq SIchpu'mo' mIghghachchaj.>> 'ach joH'a'vo' tarSISDaq Haw'meH Hu' yona 'ej yapoDaq ghIr 'ej tarSISDaq ghoSbogh Duj'e' Sam, 'ej HuchDaj DIl 'ej joH'a'vo' tarSISDaq chaH tlhejmeH 'oH 'el. 'ach bIQ'a'Daq SuS'a' qaSmoH joH'a', 'ej bIQ'a'Daq jev, 'ej Duj ghorlu' net pIH. 'ej beq Haj, 'ej joHpu'chajvaD jach Hoch, 'ej chaHvaD tISmoHmeH Dochmey'e' ngaSbogh Duj woD. 'ach Duj DopDaq ghIr yona, 'ej Qot 'ej Dum. vaj ghaHDaq ghoS Duj HoD 'ej ghaHvaD ja' <<nuq Data' DumwI'? SuH yIHu', joHlI'vaD yIjach. chaq joH'a' wIbelmoH vaj maHeghbe'.>> ‘ej ja’chuq <<‘Ivmo’ maHvaD qaSbogh wanI’vam qab ‘e’ wISovchoHmeH maSuDjaj. vaj SuD, 'ej yona 'anglu'. vaj luja' <<ghoja', SoHmo' maHvaD qaSbogh wanI'vam qab, Qu’lIj nuq? 'ej nuqDaqvo’ bIghoS? nuq 'oH wo'lIj'e'? 'ej nuq 'oH qorDu''a'lIj'e'?>> 'ej chaHvaD jang <<'IbrIyngan jIH, 'ej joH'a', bIQ'a' yav je chenmoHbogh chal joH'e' vItoy'.>> 'ej loDpu' ghIjqu'lu' 'ej luja' <<nuq'e' Data'ta'?>> joH'a'vo' Haw' 'e' luSovmo', chaHvaD ja'ta'mo'. 'ej luja' <<maHvaD jotchoHmeH bIQ'a' SoHvaD nuq wIta'nIS?>> 'ej chaHvaD ja' <<HIwoH 'ej bIQ'a'Daq HIwoD, vaj tlhIHvaD jotchoH bIQ'a', jIHmo' tlhIHvaD jevqu' 'e' vISovmo'.>> 'ach puHDaq ghoSqa' 'e' lunID, 'ach QaplaHbe', chaHvaD jevqu'taH bIQ'a'. 'ej joH'a'vaD jach chaH, 'ej luja' <<SuH joH'a', yIn loDvammo' maHeghbe'jaj, 'ej 'Iw chunmo' ghopIchQo'. joH'a' SoH, Doch DaneHbogh Data' rIntaH.>> 'ej yona luwoH, 'ej bIQ'a'Daq luwoD, 'ej jev 'e' mev bIQ'a'. 'ej loDpu' ghIj joH'a', 'ej joH'a'vaD nob lumeQ, 'ej 'Ipmey 'Ip.

'ach nabmo' joH'a' yona ghup bIQ'a' Ha'DIbaH tIn. 'ej wej jaj wej ram je bIQ'a' Ha'DIbaH burghDaq ghaHtaH yona. 'ej bIQ'a' Ha'DIbaH burghDaq ghaHtaHvIS joH'a' joHDaj qoy' yona. 'ej jatlh: <<'oy'wIjDaq jIHtaHvIS joH'a'vaD jIjachpu' 'ej mujang, ghe''or burghDaq jIHtaHvIS jIqoy'pu'; ghoghwIj DaQoypu'. bIngDaq, bIQ'a' tIqDaq chongeHpu', 'ej muDech bIQtIq, mujuSpu' yu'eghlIj HoSghaj Hoch. 'ej jIjatlh jIH <<mInDu'lIjvo' vInge'lu'pu',>> 'ach chIrghlIj quvDaq jInejqa'taH. qa'wI' Dech bIQ, muDech ghe''or, nachwIjDaq bIQ tI qatlu'. HuD HeHDaq vIghIrpu', reH yav mo'Daq qama' jIH, 'ach QIHvo' yInwIj DaSalmoH, joH'a' joHwI'. pujchoHDI' qa'wI', joH'a' vIqaw, 'ej SoHDaq, chIrghlIj quvDaq ghoS qoy'ghachwIj. pungchaj ghajHa' ramwI' ngeb toy'wI'pu', 'ach ghogh tlho' vIlo'taHvIS qatoy' jIH'e', Dochmey vI'Ippu'bogh vInob, toDghach ghajmo' joH'a'.>> 'ej bIQ'a' Ha'DIbaH ra' joH'a', vaj puHDaq yona SopHa'.

yona Qumqa’ joH’a’, ‘ej ja’ <<SuH yIHu'! nInveyDaq veng tInDaq yIghoS 'ej 'oHvaD jachghach qajatlhbogh yIjach.>> vaj Hu' yona 'ej nInveyDaq ghoS, ra'mo' joH'a'. 'ej [joH'a' 'etDaq]] veng tIn 'oH nInvey'e', wej jaj nI' lengDaj. vaj vengDaq wa' jaj leng ghoS 'e' tagh yona 'ej jach 'ej ja' <<loSmaHleS nInvey Qaw'lu'!>> 'ej joH'a' luHar nInvey nganpu', vaj SopQo'ghach lura', 'ej Sut ghegh tuQ potlhchaj ramwI'chaj je. 'ej De' Hev nInvey ta', 'ej quSDajvo' Hu', 'ej ghaHvo' ngupDaj tuQHa' 'ej Sut ghegh tuQ 'ej lamDaq ba'. 'ej jach, 'ej ra'mo' ta' chuQunDaj je nInveyDaq jatlhlu' <<SopQo'jaj nuvpu' Ha'DIbaHmey je, 'ej bIQ lutlhutlhQo'jaj. 'ach Sut ghegh tuQ nuvpu' Ha'DIbaHmey je 'ej HoSjaj 'ej joH'a'vaD jachjaj, 'ej Hechaj mIghvo' ralghachchajvo' ngaSbogh ghopDu'chaj je chegh'eghjaj. vaj wuqqa' joH'a' 'ej QeH 'e' mev 'ej maHeghbe' 'e' Sov 'Iv?>> ej Dochmey ta'bogh legh joH'a', Hechaj mIghvo' chegh'eghpu'mo', vaj chaHvaD qabwI' ta'meH jatlhpu'bogh wuqqa', 'ej ta'be'.

'ach belHa’qu’ yona, 'ej QeHqu'. 'ej joH'a' qoy' yona 'ej ja' <<SuH, joH'a', wo'wIjDaq jIHtaHvIS vuDwIj 'oH Dochvam'e', qar'a'? 'ej Dochvammo' tarSISDaq jIHaw'pu'; pung ghajbogh 'ej qejHa'bogh 'ej QIt QeHchoHbogh 'ej mIghghach qelqa'bogh joH'e' SoH 'e' vISovmo'. vaj DaH, joH'a', jIHvo' yInwIj yItlhapneS, HeghwIj QaQ law' yInwIj QaQ puS.>> 'ach ja' <<QaQ'a' bIQeHghach?>> vaj veng mej yona, 'ej veng 'et Daq yInchoH. 'ej vengvaD qaS nuq 'e' leghmeH pa' juHHom cher, 'ej QIbDaq bIngDajDaq ba'. 'ej nabmo' joH'a' nachDajDaq QIb chenmoHmeH 'ej mIghghachDajmo' toDmeH yona DungDaq Sal naH Sor. vaj naH Sormo' Quchqu' yona. 'ach nabmo' joH'a' tlha'bogh jaj jajlo' naH Sor HIv ghargh, 'ej QaDchoH. vaj tujDI' Hov, nabmo' joH'a' qaS 'et SuS, vaj nach yona HIv Hov, 'ej vulchoH. 'ej Hegh neH, 'ej ja' <<HeghwIj QaQ law' yInwIj QaQ puS.>> 'ej yonavaD ja' joH'a' <<QaQ'a' naH Sormo' bIQeHghach?>> 'ej ja' <<HeghvaD QaQ jIQeHghach>> 'ach ja' joH'a' <<naH Sormo' bIvumpu'be'bogh 'ej Dapeppu'be'bogh 'ej wa' ram SaHbogh 'ej wa' ram lojbogh pung Daghaj SoH, 'ej nInveymo' veng tInmo', nIHchajmo' poSchajmo' mISbogh wa'bIp cha'netlh nuv latlhpu' je Ha'DIbaHmey law' je ngaSbogh 'oH pung vIghajbe''a'?>>

Esther

Ruth

Psalm 117

Klingon Bible Translation Project